ସବୁଠାରୁ ୧୦ଟି ଘାତକ ସାମୁଦ୍ରିକ ବାତ୍ୟା

ଜିନୁ ଜେନା(ଭୁବନେଶ୍ୱର): ଏବେ ଓଡ଼ିଶା, ପଶ୍ଚିମବଙ୍ଗ ଏବଂ ବାଲାଂଦେଶରେ ହୃତ୍ କମ୍ପନ ସୃଷ୍ଟି କରିଥିବା ବାତ୍ୟା ଖୋଲିଛି ଅତୀତର ପେଡ଼ି । ମନେ ପଡୁଛି କିଛି ଏମିତିକା ସାମୁଦ୍ରିକ ତାଣ୍ଡବର ଅଲିଭା ତଥ୍ୟ । ଯାହା ଶୁଣିଲେ ହୁଏତ ପାଠକଙ୍କର ଛାତି ଭୟରେ ଥରି ଉଠିବ ନିଶ୍ଚୟ....

ଗ୍ରେଟ୍ ଭୋଲା (ବାଲାଂଦେଶ, ୧୯୭୦)
୧୯୭୦ ନଭେମ୍ବର ୧୨ ତାରିଖ, ଏବେ ବି ମନରୁ ଭୁଲିନାହାନ୍ତି ବାଂଲାଦେଶବାସୀ । ସେଦିନ ସେତେ ଯେମିତି ପୂରା ବାଂଲାଦେଶକୁ ନିଶ୍ଚିହ୍ନ କରିଦେବା ପାଇଁ ସଂକଳ୍ପ ନେଇ ମାଡ଼ି ଆସିଥିଲା ସାମୁଦ୍ରିକ ବାତ୍ୟା ଭୋଲା । ଯାହାର ଆଁ ଭିତରେ ହଜି ଯାଇଥିଲା ୫ ଲକ୍ଷ ଲୋକଙ୍କ ଜୀବନ । ଏହି ଘାତକ ସାମୁଦ୍ରିକ ବାତ୍ୟାର ରେକର୍ଡ ଆଜିଯାଏ ଅନ୍ୟ କୌଣସି ବାତ୍ୟା ଭାଙ୍ଗି ପାରିନାହାନ୍ତି। ଏହି ବାତ୍ୟାରେ ସର୍ବାଧିକ ପବନ ୨୪୦ କିମି ବେଗରେ ବହିଥିଲା । ବାଂଲାଦେଶର ୮୫ ପ୍ରତିଶତ ଘର ଭାଙ୍ଗିଯାଇଥିଲା ସେଥିରୁ କିଛି ନିଶ୍ଚିହ୍ନ ହୋଇଯାଇଥିଲା । ପ୍ରାୟ ୫ ଶହ ମିଲିୟନ ଡଲାର ସମ୍ପତ୍ତି ନଷ୍ଟ କରିଥିଲା ।

ହୁଗୁଲି ବାତ୍ୟା (ଭାରତ ଏବଂ ବାଂଲାଦେଶ, ୧୭୩୭)

ହୁଗୁଳି ନଦୀ ବାତ୍ୟା କଲକାତା ବାତ୍ୟା ଭାବେ ବି ଜଣାଶୁଣା । ଏହି ବାତ୍ୟା ଭାରତର କଲିକତା ସହରକୁ ଧ୍ୱସ୍ତବିଧ୍ୱସ୍ତ କରି ପକାଇଥିଲା । ଗଙ୍ଗାନଦ ଅବବାହିକା ତଥା କଲିକତା ସହରର ଦକ୍ଷିଣରେ ସ୍ଥଳଭାଗ ଛୁଇଁଥିଲା । ଗଙ୍ଗା ନଦୀରେ ୩୦ରୁ ୪୦ଫୁଟ ଯାଏ ଜୁଆର ସୃଷ୍ଟି କରିଥିଲା । ୧୫ ଇଞ୍ଚର ବର୍ଷା ଲଗାତାର ୬ ଘଣ୍ଟା ଧରି ଜାରି ରହିଥିଲା । ଏଥିରେ ବ୍ୟାପକ ଘର ନଷ୍ଟ ହେବା ସହ ପ୍ରାୟ ୩,୦୦୦୦୦ ସାଢେ ୩,୫୦୦୦୦ଲକ୍ଷ ଲୋକଙ୍କର ମୃତ୍ୟୁ ହୋଇଥିଲା । ୨୦ହଜାର ମଟର ବୋଟ୍ ଚୁରମାର ହୋଇଯାଇଥିଲା ।

କୋରିଙ୍ଗା ବାତ୍ୟା (ଭାରତ, ୧୮୩୯)
ବନ୍ଦର ନଗରୀ କୋରିଙ୍ଗା ବିପର୍ଯ୍ୟୟ ୧୮୩୯, ନଭେମ୍ବର ୨୫ରେ ସଂଘଠିତ ହୋଇଥିଲା । ଏହି ବାତ୍ୟାରେ ୪୦ଫୁଟ ଉଚ୍ଚର ଜୁଆର ଆସି ସହରକୁ ଧୋଇ ନେଇଥିଲା । ୩,୦୦୦୦୦ ଲୋକଙ୍କ ଜୀବନ ନେବା ସହ ବନ୍ଦର ନଗରୀକୁ ଶ୍ମଶାନରେ ପରିଣତ କରି ଦେଇଥିଲା ।

ହାଇଫୋଙ୍ଗ (ଭିଏତନାମ, ୧୮୮୧)
ପରବର୍ତ୍ତୀ ବାତ୍ୟା ହେଉଛି ୧୮୮୧, ଅକ୍ଟୋବର ୮ ତାରିଖରେ ଭିଏତନାମରେ ଆସିଥିଲା । ଟୋଙ୍କିନ ଉପକୂଳରେ ଏହି ବାତ୍ୟା ମାଡ଼ ହୋଇଥିଲା । ଏହି ବାତ୍ୟାରେ ୩୦୦୦୦୦ ଲୋକଙ୍କ ଜୀବନ ଯାଇଥିଲା। ବିଶେଷକରି ବାତ୍ୟା ପରେ କ୍ଷୁଧା ଏବଂ ରୋଗରେ ଲୋକମାନେ ପୋକମାଛି ଆଖି ବୁଜି ଥିଲେ । ୨୦,୦୦୦ ସିପ୍ ବାତ୍ୟରେ ଭାଙ୍ଗି ରୁଜିଯାଇଥିଲା । କୋରିଙ୍ଗା ବାତ୍ୟା ପରେ ଆଉ ଅଣ୍ଟା ସଳଖି ଠିଆ ହୋଇପାରିନଥିଲା । ଏହା ଗୋଟିଏ ଛୋଟିଆ ଗାଁ ଭଳି ପରିଚୟ ନେଇ ରହିଯାଇଛି ।

ବକେରଗଂଜ(ବାଂଲାଦେଶ, ୧୫୮୪)
୧୫୮୪ରେ ବଙ୍ଗୋପସାଗରରେ ବାତ୍ୟା ସୃଷ୍ଟ ହୋଇ ବାଂଲାଦେଶରେ ମାଡ଼ ହୋଇଥିଲା । ତାଣ୍ଡବ ରଚିବା ସହ ୨୦୦୦୦୦ ଲୋକଙ୍କୁ ମୃତ୍ୟୁମୁଖକୁ ଠେଲି ଦେଇଥିଲା ବାକେରଗଂଜ ।

ଗ୍ରେଟ ବକେରଗଂଜ ବାତ୍ୟା (ବାଂଲାଦେଶ, ୧୮୭୬)
ଏହା ୧୮୭୬ ବାଙ୍ଗଲା ବାତ୍ୟା ନାଁରେ ବି ଜଣାଶୁଣା । ୧୮୭୬ ଅକ୍ଟୋବର ୩୧ରେ ମାଡ଼ି ଆସିଥିଲା ବାତ୍ୟା । ମୃତ୍ୟୁସଂଖ୍ୟା ଥିଲା ୨,୦୦୦୦୦ । ବଙ୍ଗୋପସାଗରରେ ସୃଷ୍ଟ ବାତ୍ୟା ମେଘନା ରିଭର ଅବବାହିକାରେ ମାଡ଼ ହୋଇଥିଲା । ବାତ୍ୟା ଯୋଗୁଁ ଉଚ୍ଚ ଜୁଆର ମାଡ଼ି ଆସିଥିଲା । ତଳିଆ ଅଞ୍ଚଳରେ ୪୦ଫୁଟ ଉଚ୍ଚର ଜୁଆର ମାଡ଼ିଯାଇଥିଲା ।

ଚିଟାଗଙ୍ଗ (ବାଂଲାଦେଶ, ୧୮୯୭)
୧୮୯୭ ମସିହାରେ ବାଂଲାଦେଶର ଚିଟାଗଙ୍ଗ ସହର ବାତ୍ୟାରେ ଧ୍ୱସ୍ତବିଧ୍ୱସ୍ତ ହୋଇଯାଇଥିଲା । ସହରର ଅଧା ବିଲଡିଂ ସବୁ ମାଟିରେ ମିଶିଯାଇଥିଲା । ଅନ୍ୟ ବାତ୍ୟା ଭଳି ଏଥିରେ ୧,୭୫୦୦୦ ଲୋକଙ୍କର ଜୀବନ ଯାଇଥିଲା ।

ବାତ୍ୟା ୦୨ବି (ବାଂଲାଦେଶ, ୧୯୯୧)
୧୯୯୧ ଏପ୍ରିଲ ୨୯ରେ ବାଂଲାଦେଶର ଚିଟାଗଙ୍ଗରେ ସ୍ଥଳଭାଗ ଛୁଇଁଥିଲା । ଏହାର ଅନ୍ୟନାମ ଥିଲା ବାତ୍ୟା ୦୨ବି । ୧,୩୫,୦୦୦ ଲୋକଙ୍କ ମୃତ୍ୟୁର କାରଣ ହୋଇଥିଲା । ୧୦ ନିୟୁତ ଲୋକ ବାସହରା ହୋଇପଡ଼ିଥିଲେ ୦୨ବି ଲାଗି । ୧୦,୦୦୦ ଗାଈମାନଙ୍କ ମୃତ୍ୟୁ ହୋଇଥିଲା । ଦେଶର ଶସ୍ୟ ନଷ୍ଟ ହୋଇଯାଇଥିବା ବେଳେ ଲୋକଙ୍କ ପରବର୍ତ୍ତୀ ସମୟରେ ଭୋକ ଉପବାସରେ ରହିବାକୁ ପଡ଼ିଥିଲା । ୧.୫ ବିଲିଅନ ଡଲାରର କ୍ଷୟକ୍ଷତି କରି ବିଦାୟ ନେଇଥିଲା ।

ନର୍ଗିସ୍ (ମିଆଁମାର, ୨୦୦୮)
୨୦୦୮ ମଇ ୨ ତାରିଖରେ ମିଆଁମାର ଭୂଖଣ୍ଡ ଛୁଇଁଥିଲା ବାତ୍ୟା ନର୍ଗିସ୍। ମିଆଁମାରର ଆଏୟାରୱାଡ଼ି ଅବବାହିକାରେ ସ୍ଥଳଭାଗ ଛୁଇଁଥିଲା ବାତ୍ୟା ନର୍ଗିସ୍ । ଜାତିସଂଘ ରିପୋର୍ଟ ଅନୁଯାୟୀ ୨.୪ ମିଲିଅନ ଲୋକ ପ୍ରଭାବିତ ହୋଇଥିଲେ । ୮୪,୫୦୦ ଲୋକଙ୍କ ମୃତ୍ୟୁ ହୋଇଥିବା ବେଳେ ୫୩,୮୦୦ ଲୋକ ନିଖୋଜ ହୋଇଯାଇଥିଲେ।

ବାଂଲାଦେଶ ବାତ୍ୟା ୧୯୪୨(ବାଂଲାଦେଶ, ୧୯୪୨)
ବାଂଲାଦେଶ ବାତ୍ୟା ୧୯୪୨ରେ ପ୍ରଳୟ ରଚିଥିଲା । ଅକ୍ଟୋବର ୧୬ରେ ବାଂଲାଦେଶର ପୂର୍ବ ଉପକୂଳରେ ମାଡ଼ ହୋଇଥିଲା । ଘଣ୍ଟାକୁ ୭୦ ମାଇଲ ବେଗରେ ପବନ ବହିଥିଲା । ବାତ୍ୟା ପ୍ରଭାବରେ ୨୦ ଫୁଟ ଉଚ୍ଚ ଜୁଆର ମାଡ଼ି ଆସିଥିଲା । ୩ ହଜାର ଘର ଭାଙ୍ଗିଦେବା ସହ ୬୧,୦୦୦ ଲୋକଙ୍କ ଜୀବନ ନେଇଥିଲା ବାତ୍ୟା ।