ରାଜଧାନୀରେ ଗୋଟିଏ ଦିନରେ ୧୨୯୯ ନୂଆ ସଂକ୍ରମିତ ଚିହ୍ନଟ, ସୁସ୍ଥ ହାର ପହଞ୍ଚିଲା ୮୯.୮୨ ପ୍ରତିଶତ

ନୂଆଦିଲ୍ଲୀ: ଦେଶରେ କୋରୋନା ସ୍ଥିତି ଦିନକୁ ଦିନ ଅତି ଭୟାବହ ହେବାକୁ ଲାଗିଛି । ସେହିପରି ଦେଶର ରାଜଧାନୀ ଦିଲ୍ଲୀରେ କୋରୋନା ସଂକ୍ରମିତଙ୍କ ସଂଖ୍ୟା ୧ ଲକ୍ଷ ୪୦ ହଜାର ଅତିକ୍ରମ କରିଛି । ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀରେ ପ୍ରାୟ ୧୩୦୦ ନୂଆ ସଂକ୍ରମିତ ମାମଲା ଚିହ୍ନଟ ହୋଇଛି । ଅଗଷ୍ଟ ୬ରେ ଦିଲ୍ଲୀ ସରକାରଙ୍କ ହେଲଥ ବୁଲେଟିନ୍ ଅନୁଯାୟୀ, ଦିଲ୍ଲୀରେ କୋରୋନା ସଂକ୍ରମିତଙ୍କ ସୁସ୍ଥ ହାର ୮୯.୮୨ ପ୍ରତିଶତରେ ପହଞ୍ଚିଛି । ଅନ୍ୟ ଅର୍ଥରେ ରାଜଧାନୀ ଦିଲ୍ଲୀରେ ସକ୍ରିୟ ରୋଗୀ ୭.୩୧ ପ୍ରତିଶତ ରହିଛି । ଏହା ବ୍ୟତୀତ ଦିଲ୍ଲୀରେ କୋରୋନା ସଂକ୍ରମିତଙ୍କ ମୃତ୍ୟୁ ହାର ୨.୮୬ ପ୍ରତିଶତ ରହିଛି ।

ତଥ୍ୟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀରେ ୧୨୯୯ ନୂଆ କୋରୋନା ମାମଲା ସାମ୍ନାକୁ ଆସିଛି । ଏହି ସମୟ ମଧ୍ୟରେ ୧୫ ଜଣ ରୋଗୀଙ୍କ ମୃତ୍ୟୁ ଘଟିଛି । ଦିଲ୍ଲୀର ବର୍ତ୍ତମାନ ଯାଏ ମୋଟ ସଂକ୍ରମିତଙ୍କ ସଂଖ୍ୟା ୧,୪୧,୫୩୧କୁ ବୃଦ୍ଧି ପାଇଛି । ଗତ ୨୪ ଘଣ୍ଟା ମଧ୍ୟରେ ୧୫ ରୋଗୀଙ୍କ ମୃତ୍ୟୁ ପରେ ଏଠାରେ ସଂକ୍ରମିତଙ୍କ ମୃତ୍ୟୁ ସଂଖ୍ୟା ୪,୦୫୯ରେ ପହଞ୍ଚିଛି ।

ଦିଲ୍ଲୀରେ କୋରୋନା ରୋଗୀଙ୍କ ସୁସ୍ଥ ହେବା ହାର ଭଲ ରହିଛି । ଗତ ୨୪ ଘଣ୍ଟା ମଧ୍ୟରେ ୧,୦୦୮ କୋରୋନା ରୋଗୀ ଆରୋଗ୍ୟ ଲାଭ କରିଛନ୍ତି । ଫଳରେ ଏପର୍ଯ୍ୟନ୍ତ ୧,୨୭,୧୨୪ କୋରୋନା ରୋଗୀ ଆରୋଗ୍ୟ ହୋଇଛନ୍ତି । ବର୍ତ୍ତମାନ ଜାତୀୟ ରାଜଧାନୀରେ କୋରୋନାର ସକ୍ରିୟ ମାମଲା ସଂଖ୍ୟା ହେଉଛି ୧୦,୩୪୮ । ଏଥିରୁ  ହୋମ ଆଇସୋଲେଶନରେ ୫,୨୪୪ ରୋଗୀ ଅଛନ୍ତି । ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀରେ ୨୦,୪୩୬ କୋଭିଡ ପରୀକ୍ଷା ହୋଇଥିଲା । ଏଥିରେ ୫,୭୩୭ RT-PCR ପରୀକ୍ଷା ଏବଂ ୧୪,୬୯୯ ଦ୍ରୁତ ଆଣ୍ଟିଜେନ୍ ପରୀକ୍ଷା ଅନ୍ତର୍ଭୁକ୍ତ ରହିଛି । ଦିଲ୍ଲୀରେ ଏପର୍ଯ୍ୟନ୍ତ ମୋଟ ୧୧,୨୦,୩୧୮ ପରୀକ୍ଷା କରାଯାଇଛି ।