ଜମ୍ମୁ କାଶ୍ମୀର: ଅନନ୍ତନାଗରେ ଆତଙ୍କୀ ଆକ୍ରମଣ, ଜଣେ ଯବାନ ସହିଦ

ଶ୍ରୀନଗର: ଜମ୍ମୁ କାଶ୍ମୀରର ଅନନ୍ତନାଗରେ ଆତଙ୍କବାଦୀମାନେ ସୁରକ୍ଷା ବାହିନୀକୁ ଟାର୍ଗେଟ କରିଛନ୍ତି । ଏହି ଆକ୍ରମଣରେ ଜଣେ ସିଆରପିଏଫ(CRPF) ଯବାନ ସହିଦ ହୋଇଛନ୍ତି । ମିଳିଥିବା ସୂଚନା ଅନୁଯାୟୀ, ଅନନ୍ତନାଗର ବିଜବେହେରା ଠାରେ ସୁରକ୍ଷା କର୍ମୀମାନେ ପାଟ୍ରୋଲିଂ କରୁଥିଲେ । ଏହି ସମୟରେ ସଶସ୍ତ୍ର ଆତଙ୍କବାଦୀମାନେ ଏକ ମୋଟରସାଇକେଲରେ ଆସି ପାଟ୍ରୋଲିଂ କରୁଥିବା ଦଳ ଉପରେ ଆକ୍ରମଣ କରିଥିଲେ । ଏହାର ଜବାବରେ ସୁରକ୍ଷା କର୍ମୀ ଦ୍ୱାରା ମଧ୍ୟ ଗୁଳି ଚାଳନା କରାଯାଇଥିଲା । କିନ୍ତୁ ଆତଙ୍କବାଦୀମାନେ ସେଠାରୁ ଖସି ପଳାଇବାରେ ସଫଳ ହୋଇଥିଲେ । ଏହି ଘଟଣା ପରେ ସୁରକ୍ଷା ବାହିନୀ ସର୍ଚ୍ଚ ଅପରେସନ ଚଳାଉଛନ୍ତି । ଏଥି ସହିତ ଜଣେ ୧୨ ବର୍ଷର ଶିଶୁଙ୍କୁ ଗୁଳି ଲାଗିବାରୁ ମୃତ୍ୟୁ ଘଟିଛି ।

ଜଣେ ପୋଲିସ ଅଧିକାରୀ କହିଛନ୍ତି ଯେ, ଦକ୍ଷିଣ କାଶ୍ମୀର ଜିଲ୍ଲାର ବିଜବେହେରା ଅଞ୍ଚଳର ପଦଶାହୀ ବାଗ ବ୍ରିଜ ନିକଟରେ ମଧ୍ୟାହ୍ନ ପ୍ରାୟ ୧୨.୧୦ ମିନିଟ ସମୟରେ ସିଆରପିଏଫର ୯୦ ବାଟାଲିୟନର ସଡକ ସୁରକ୍ଷା ଦଳ ଉପରେ ଆତଙ୍କୀମାନେ ଗୁଳି ଚଳାଇଥିଲେ । ଏଥି ସହ ଆଜି ସକାଳେ ପୁଲୱାମା ଟ୍ରାଲରେ ସୁରକ୍ଷା ବାହିନୀ ଓ ଆତଙ୍କବାଦୀ ମୁହାଁମୁହିଁ ହୋଇଥିଲା ।

Add Zee News as a Preferred Source