Police Suspended: ପୋଲିସ ନୁହଁ ଧର୍ମଗୁରୁ କରିବେ ହତ୍ୟା ମାମଲାର ପର୍ଦ୍ଦାଫାସ, ଉପାୟ ମାଗି ASI ସସ୍ପେଣ୍ଡ

MP Police Suspended,  ଭୋପାଲ: ଅନ୍ଧ ବିଶ୍ୱାସରୁ ଲୋକଙ୍କୁ ଦୂରେଇ ରଖିବା ଯାହାର ଦାୟିତ୍ୱ, ସେହି ବିଭାଗ ଅନ୍ଧ ବିଶ୍ୱାସରେ ବୁଡି ରହିଛି। ହତ୍ୟା ଭଳି ଜଘନ୍ୟ ମାମଲାର ପର୍ଦ୍ଦାଫାସ ପାଇଁ ମଧ୍ୟପ୍ରଦେଶ ଜଣେ ପୋଲିସ ଅଧିକାରୀ ଧର୍ମଗୁରୁଙ୍କ ମାର୍ଗଦର୍ଶନ ଲୋଡୁଥିବାର ଏକ ଭିଡିଓ ସୋସିଆଲ ମିଡିଆରେ ଖୁବ ଭାଇରାଲ ହେଉଛି। ଯାହାପରେ ଅପରାଧିକ ମାମଲା ଏଣିକି ପୋଲିସ ନୁହଁ ଧର୍ମଗୁରୁ ସମାଧାନ କରିବା ନେଇ ଚର୍ଚ୍ଚା ହେଉଛି। ତେବେ ଭିଡିଓ ଭାଇରାଲ ପରେ ସମ୍ପୃକ୍ତ ପୋଲିସ ବାବୁଙ୍କୁ ନିଲମ୍ବନ କରାଯାଇଥିବା ସୂଚନା ମିଳିଛି।

ମଧ୍ୟପ୍ରଦେଶର ଛତ୍ରପୁର ଜିଲ୍ଲାର ଏକ ଭିଡିଓରେ କୁହାଯାଉଛି ଯେ, ହତ୍ୟା ମାମଲା ସମାଧାନ ପାଇଁ ଜଣେ 'ଆଧ୍ୟାତ୍ମିକ ଗୁରୁ'ଙ୍କଠାରୁ 'ମାର୍ଗଦର୍ଶନ' ଭିକ୍ଷା କରୁଥିବା ଜଣେ ପୋଲିସ କର୍ମଚାରୀଙ୍କୁ ୧୮ ଅଗଷ୍ଟ ଗୁରୁବାର ନିଲମ୍ବନ କରାଯାଇଛି। ଭାଇରାଲ ଘଟଣାର ତଦନ୍ତ ଆରମ୍ଭ ହୋଇଛି ବୋଲି ପୋଲିସ ସୂଚନା ଦେଇଛି। ନିଲମ୍ବନ ହୋଇଥିବା ପୋଲିସ ବାକୁଙ୍କୁ ଆସିଷ୍ଟାଣ୍ଟ ସବ୍-ଇନ୍ସପେକ୍ଟର ଅନିଲ ଶର୍ମା ବୋଲି ଚିହ୍ନଟ କରାଯାଇଛି। ସ୍ଥାନୀୟ ଜଣେ ୧୭ ବର୍ଷର ନାବାଳିକାଙ୍କ ମୃତ୍ୟୁ ଘଟଣାରେ ହତ୍ୟା ସନ୍ଦିଗ୍ଧ ବ୍ୟକ୍ତିଙ୍କୁ ଚିହ୍ନଟ କରିବା ଉଦ୍ଦେଶ୍ୟରେ ଏଏସଆଇ ଅନିଲ, ଆତ୍ମଘୋଷିତ ସାଧୁ ପାଣ୍ଡୋଖର ସରକାରଙ୍କ ନିକଟକୁ ଯାଇଥିବା ଅଭିଯୋଗ ହୋଇଛି।

ସାଧୁ ପାଣ୍ଡୋଖର ସରକାର କହୁଥିବା ନାମ ହତ୍ୟାକାରୀଙ୍କୁ ଧରାଇବ ବୋଲି ପୋଲିସ ବିଶ୍ୱାସ କରୁଥିବା କୁହାଯାଉଛି। ଏହି ମାମଲାରେ ଏଏସଆଇ ଅନିଲ ଶର୍ମାଙ୍କୁ ନିଲମ୍ବନ କରାଯାଇଥିବା ବେଳେ ଇନ୍ସପେକ୍ଟର ପଙ୍କଜ ଶର୍ମାଙ୍କୁ ବାମିଥା ଥାନାରୁ ପୋଲିସ ଲାଇନକୁ ବଦଳି କରାଯାଇଛି। ତେବେ ସାଧୁ କଥାକୁ ବିଶ୍ୱାସ କରି ପୋଲିସ ତଦନ୍ତ କରୁଥିବା ମାମଲାକୁ ବୁଦ୍ଧିଜୀବୀମାନେ ସହଜରେ ଗ୍ରହଣ କରିପାରୁନାହାନ୍ତି। ଏପରି କି କିଛି ଲୋକ ଉକ୍ତ ଘଟଣାକୁ ନେଇ ମଧ୍ୟପ୍ରଦେଶ ପୋଲିସର କାର୍ଯ୍ୟ ଉପରେ ପ୍ରଶ୍ନ ଉଠାଇଛନ୍ତି।

ସୂଚନାଯୋଗ୍ୟ, ଗତ ୨୮ ଜୁଲାଇରେ ଛତରପୁର ଜିଲ୍ଲାର ଓଟାପୁରଭା ଗ୍ରାମରେ ଥିବା ଏକ କୂଅରୁ ଜଣେ ୧୭ ବର୍ଷର ନାବାଳିକାଙ୍କ ମୃତଦେହ ଉଦ୍ଧାର କରି ବମିଥା ପୋଲିସ ଯାଞ୍ଚ କରୁଥିଲା। ନାବାଳିକାଙ୍କ ପରିବାର ଅଭିଯୋଗ ପରେ ପୋଲିସ ପ୍ରଥମେ ସେହି ଗ୍ରାମର ତିନି ଜଣଙ୍କୁ ଅଟକ ରଖିଥିଲା ​​କିନ୍ତୁ ସେମାନଙ୍କ ବିରୁଦ୍ଧରେ କୌଣସି ପ୍ରମାଣ ପାଇ ନ ଥିବାରୁ ପରେ ସେମାନଙ୍କୁ ଛାଡି ଦେଇଥିଲା। ଏଏସଆଇ ଅନିଲ ଶର୍ମା ଏହି ମାମଲାର ତଦନ୍ତ କରୁଥିଲେ, ଆଉ ମାମଲାର ସମାଧାନ ପାଇଁ ସେ ଆଧ୍ୟାତ୍ମିକ ଗୁରୁଙ୍କଠାରୁ ମାର୍ଗଦର୍ଶନ ନେବାକୁ ନିଷ୍ପତ୍ତି ନେଇଥିଲେ।

ଶେଷରେ ପୋଲିସ ମୃତକ ନାବାଳିକାଙ୍କ ମାମୁଁ ତିରଥ ଅହିରୱାରଙ୍କୁ ଗିରଫ କରିଥିଲା। ଏହା ପରେ ପରିବାର ଲୋକ ଏହାକୁ ବିରୋଧ କରିଥିଲେ। ଏଏସଆଇ ଏବଂ ଆଧ୍ୟାତ୍ମିକ ଗୁରୁଙ୍କ ମଧ୍ୟରେ କଥାବାର୍ତ୍ତା ବିଷୟରେ କୁହାଯାଇଥିଲା। ତାଙ୍କ ବିରୋଧରେ ପୋଲିସ ସଂଗ୍ରହ କରିଥିବା ପ୍ରମାଣ ଅନୁଯାୟୀ ଅଭିଯୁକ୍ତ ତିରଥ ଅହିରୱାରଙ୍କୁ ଗିରଫ କରାଯାଇଥିଲା। ଏଏସଆଇର ଭିଡିଓ ବିଷୟରେ ସ୍ପଷ୍ଟିକରଣ ଦେଇ ଛତ୍ରପୁର ଜିଲ୍ଲା ଅଧୀକ୍ଷକ ସଚିନ ଶର୍ମା କହିଛନ୍ତି, 'ସେ ବିଭିନ୍ନ କାରଣରୁ ପାଣ୍ଡୋଖର ସରକାରଙ୍କ କାର୍ଯ୍ୟକ୍ରମରେ ଯୋଗଦେବାକୁ ଯାଇଥିଲେ। ଭିଡିଓ ଭାଇରାଲ ହେବା ପରେ ତାଙ୍କୁ ନିଲମ୍ବିତ କରାଯାଇଛି।'