ତାମିଲନାଡୁକୁ ବ୍ୟାପିଲା ରାଜସ୍ଥାନ ନିଆଁ; ମୁହାଁମୁହିଁ ମୁଖ୍ୟମନ୍ତ୍ରୀ-ଉପମୁଖ୍ୟମନ୍ତ୍ରୀ!

ଚେନ୍ନାଇ: ଚଳିତ ବର୍ଷ ଜୁଲାଇ ମାସରେ ରାଜସ୍ଥାନ (Rajasthan) ରେ ଦଳ ଓ ସରକାରରେ କ୍ଷମତା ବିସ୍ତାର କରିବାକୁ ନେଇ ମୁହାଁମୁହିଁ ହୋଇଥିଲେ ମୁଖ୍ୟମନ୍ତ୍ରୀ ଅଶୋକ ଗହୋଲତ (CM Ashok Gehlot), ଉପମୁଖ୍ୟମନ୍ତ୍ରୀ ସଚିନ ପାଇଲଟ (Deputy CM Sachin Pilot)। ଏପରିକି ଏହାକୁ ନେଇ କଂଗ୍ରେସର ଦଳୀୟ ମହଲରେ କୁହୁଳିଥିଲା ଅସନ୍ତୋଷର ନିଆଁ । ବର୍ତ୍ତମାନ ଏହାର ପ୍ରଭାବ ଦାକ୍ଷିଣାତ୍ୟ ରାଜ୍ୟ ତାମିଲନାଡୁ (Tamilnadu) ରେ ଦେଖିବାକୁ ମିଳିଛି । 

ରାଜ୍ୟରେ କ୍ଷମତାସୀନ ଥିବା ଅଲ୍ ଇଣ୍ଡିଆ ଆନ୍ନା ଦ୍ରାବିଡ ମୁନେତ୍ରା କାଝାଘମ୍-ଏଆଇଏଡିଏମକେ (AIADMK-All India Anna Dravida Munnetra Kazhagam) ମୁଖ୍ୟମନ୍ତ୍ରୀ ପ୍ରାର୍ଥୀତ୍ୱକୁ ନେଇ ଉପମୁଖ୍ୟମନ୍ତ୍ରୀ ତଥା ଦଳୀୟ ସଂଯୋଜକ (Party Coordinator) ଓ.ପନୀରସେଲଭମ (O.Panneerselvam) ଙ୍କ ଦ୍ୱାରା କରାଯାଇଥିବା ଟ୍ୱିଟକୁ ନେଇ ବର୍ତ୍ତମାନ ଚର୍ଚ୍ଚା ପରିସରକୁ ଆସିଯାଇଛି ଦଳ । 

ତାମିଲନାଡୁ ଉପମୁଖ୍ୟମନ୍ତ୍ରୀଙ୍କ ପକ୍ଷରୁ କରାଯାଇଥିବା ଟ୍ୱିଟରେ ଲେଖାଯାଇଛି ରାଜ୍ୟର ଜନସାଧାରଣ ଏବଂ ଏଆଇଏଡିଏମକେ କ୍ୟାଡରଙ୍କ କଲ୍ୟାଣକୁ ଦୃଷ୍ଟିରେ ରଖି ନିଷ୍ପତ୍ତି ନିଆଯାଇଛି । ଆଗକୁ ମଧ୍ୟ ଏହା ଜାରି ରହିବ । ଯାହା ଘଟିଛି, ଯାହା ଘଟୁଛି ତାହା ମଧ୍ୟ ଭଲ ହେବାରେ ଲାଗିଛି, ଯାହା ଘଟିବ ତାହା ମଧ୍ୟ ଭଲ ହେବ । 

தமிழக மக்கள் மற்றும் அஇஅதிமுக கழகத் தொண்டர்களின் நலனை கருத்தில் கொண்டே எனது முடிவுகள் இதுவரை இருந்துள்ளன. இனியும் அவ்வாறே இருக்கும்.

எது நடந்ததோ அது நன்றாகவே நடந்தது!

எது நடக்கிறதோ அது நன்றாகவே நடக்கிறது!!

எது நடக்கவிருக்கிறதோ அதுவும் நன்றாகவே நடக்கும்!!

— O Panneerselvam (@OfficeOfOPS) October 5, 2020

ଆସନ୍ତାବର୍ଷ ବର୍ଷ ଅନୁଷ୍ଠିତ ହେବାକୁ ଯାଉଛି ତାମିଲନାଡୁ ବିଧାନସଭା ନିର୍ବାଚନ (Tamilnadu Assembly Poll 2021) । ଆଗାମୀ ନିର୍ବାଚନ ଲାଗି ଏଆଇଡିଏମକେର ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା ହେବା ପୂର୍ବରୁ ଏଆଇଏଡିଏମକେ ସଂଯୋଜକ ତଥା ଉପମୁଖ୍ୟମନ୍ତ୍ରୀ ପନୀରସେଲଭମଙ୍କ ଦ୍ୱାରା କରାଯାଇଥିବା ଟ୍ୱିଟ ବର୍ତ୍ତମାନ ବେଶ ଗୁରୁତ୍ୱ ବହନ କରୁଛି । କାରଣ ଆଗାମୀ ନିର୍ବାଚନରେ ଦଳର ମୁଖ୍ୟମନ୍ତ୍ରୀ ପ୍ରାର୍ଥୀ କିଏ ହେବ ସେ ନେଇ ବର୍ତ୍ତମାନର ମୁଖ୍ୟମନ୍ତ୍ରୀ ଇ.ପାଲାନୀସ୍ୱାମୀ (CM E.Palaniswami), ଉପମୁଖ୍ୟମନ୍ତ୍ରୀ ପନୀରସେଲଭମଙ୍କ ଗୋଷ୍ଠୀ ମଧ୍ୟରେ ବେଶ କିଛି ମାସ ଧରି ଛକାପଞ୍ଝା ଜାରି ରହିଛି । 

ଏପରିକି ବିଧାନସଭା ନିର୍ବାଚନ ଆସନ୍ତାବର୍ଷ ହେବାକୁ ଥିବା ବେଳେ ବର୍ତ୍ତମାନ ପନୀରସେଲଭମଙ୍କ ସମର୍ଥନରେ ତାମିଲନାଡୁର ବିଭିନ୍ନ ସ୍ଥାନରେ ପୋଷ୍ଟର ସ୍ଥାନରେ ପୋଷ୍ଟର ଲଗାଇ ସାରିଛନ୍ତି ଦଳୀୟ ନେତା, ସମର୍ଥକ ଓ ଏଆଇଏଡିଏମକେ ସରକାରଙ୍କ କେତେକ ମନ୍ତ୍ରୀ । ଦଳ ତଥା ସରକାରକୁ କିଏ ନିୟନ୍ତ୍ରଣ କରିବ ସେ ନେଇ ଉଭୟ ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀଙ୍କ ମଧ୍ୟରେ କ୍ଷମତାଯୁଦ୍ଧ ଆରମ୍ଭ ହୋଇଯାଇଛି । ଏପରିକି ଗତ ସେପ୍ଟମ୍ବର ମାସ ଶେଷ ସପ୍ତାହରେ  କୋଭିଡ ମାମଲାକୁ ନେଇ ମୁଖ୍ୟମନ୍ତ୍ରୀଙ୍କ ପକ୍ଷରୁ ଡକାଯାଇଥିବା ବୈଠକରେ ଯୋଗ ଦେଇନଥିଲେ ଉପମୁଖ୍ୟମନ୍ତ୍ରୀ ।

ଏଆଇଏଡିଏମକେର ପୂର୍ବତନ ସୁପ୍ରିମୋ ଜୟଲଳିତା (Jayalalithaa) ଙ୍କ ଅନୁପସ୍ଥିତିରେ ପ୍ରଥମ ଥର ପାଇଁ ରାଜ୍ୟ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦିତା କରିବ ଦଳ । ଏହା ପୂର୍ବରୁ ମୁଖ୍ୟମନ୍ତ୍ରୀ ପ୍ରାର୍ଥୀତ୍ୱକୁ ଦଳରେ ଚାଲିଥିବା ବିବାଦକୁ ପ୍ରଶମିତ କରିବା ପାଇଁ ପ୍ରୟାସ ଜାରି ରହିଛି । ୨୦୧୯ ଲୋକସଭା ଏନଡିଏ (NDA) ମେଣ୍ଟରେ ସାମିଲ ଥିବା ଏଆଇଏଡିଏମକେକୁ କେବଳ ଗୋଟିଏ ଆସନ ମିଳିଥିଲା ।

ଚେନ୍ନାଇସ୍ଥିତ ଏଆଇଏଡିଏମକେ କାର୍ଯ୍ୟାଳୟ (Chennai AIADMK Office) ଠାରେ ଆୟୋଜିତ ଦଳର କାର୍ଯ୍ୟକାରୀ ସମିତି ବୈଠକରେ ୨୦୨୧ ବିଧାନସଭା ନିର୍ବାଚନରେ ଦଳୀୟ ମୁଖ୍ୟମନ୍ତ୍ରୀ ପ୍ରାର୍ଥୀ କିଏ ହେବ ତାହାକୁ ନେଇ ପନୀରସେଲଭମ ଓ ପାଲାନିସ୍ୱାମୀଙ୍କ ସମର୍ଥକଙ୍କ ମଧ୍ୟରେ  ବାକଯୁଦ୍ଧ ଦେଖିବାକୁ ମିଳିଥିଲା ।

ଏନେଇ ପାଲାନିସ୍ୱାମୀଙ୍କ କହିବା ଅନୁସାରେ ଦଳକୁ ମାର୍ଗଦର୍ଶନ କରିବା ପାଇଁ 'ଷ୍ଟିୟରିଂ କମିଟି' (Steering Committee) ଗଠନ କରାଯାଉ । ହେଲେ ଏହାକୁ ପନୀରସେଲଭମ ଏକମତ ନୁହଁନ୍ତି ।