ଯାହା ହେଇଛି ଭଲ ହେଇଛି ବାବୁ, ପୈତୃକ ସମ୍ପତ୍ତି ଫେରାଇ ଦିଅ...

ଗଲା ପୁତ୍ର ଆଉ କେବେ ବାହୁଡ଼ି ନୋହିଲା

ଶେଷଦେବ ମହାପାତ୍ର, ନୂଆଦିଲ୍ଲୀ: ଜଣେ ଦାର୍ଶନିକ କହିଥିଲେ, ମଣିଷ ନିଜ ପିତାଙ୍କ ମୃତ୍ୟୁକୁ ଭୁଲିଯାଇପାରେ, କିନ୍ତୁ ପୈତୃକ ସମ୍ପତ୍ତିକୁ ନୁହେଁ । (“Men sooner forget the death of their father than the loss of their patrimony”: Niccolò Machiavelli) । ପ୍ରତ୍ୟେକ ବ୍ୟକ୍ତି ବିଶେଷ ପାଇଁ ତାର ପୈତୃକ ସମ୍ପତ୍ତି ବେଶ ଗୁରୁତ୍ୱବହନ କରିଥାଏ । କିନ୍ତୁ ପୁଅ ଯେତେବେଳେ ବିଭିନ୍ନ କୁକର୍ମରେ ଲିପ୍ତ ରହି ପିତାଙ୍କ ସାମ୍ନାରେ ହିଁ ପୈକୃକ ସମ୍ପତ୍ତି ନଷ୍ଟ କରିବସେ, ତାଠୁ ବଡ଼ ଦୁଃଖ ଜଣେ ପିତାଙ୍କ ପାଇଁ ଆଉ କ'ଣ ବା ହୋଇପାରେ । କୁଖ୍ୟାତ ଅପରାଧୀ ବିକାଶ ଦୁବେ ଏବଂ ତାର ପିତା ରାମକୁମାର ଦୁବେଙ୍କ କ୍ଷେତ୍ରରେ ଠିକ ଏମିତି କିଛି ହିଁ ଦେଖିବାକୁ ମିଳିଛି । ନିଜ ଆଖିଆଗରେ ନିଜର ପୈତୃକ ସମ୍ପତ୍ତିକୁ ନଷ୍ଟ କରିଦେଇଥିବା ପୁଅ ବିକାଶର ଏନକାଉଣ୍ଟର ପରେ ଏହାକୁ ଉଚିତ କାର୍ଯ୍ୟାନୁଷ୍ଠାନ ବୋଲି କହିଛନ୍ତି ରାମକୁମାର । କେବଳ ଏତିକି ନୁହେଁ, ନିଜେ ପୈତୃକ ସମ୍ପତ୍ତିକୁ ପୁଣି ଥରେ ଦଖଲ କରିବାକୁ ଏବେ ତାଙ୍କୁ ଅନୁମତି ଦିଆଯାଉ ବୋଲି ଅନୁରୋଧ ମଧ୍ୟ କରିଛନ୍ତି । 

୮ ପୋଲିସ କର୍ମଚାରୀଙ୍କୁ ହତ୍ୟା କରିବା ଘଟଣାର ମୁଖ୍ୟ ଅଭିଯୁକ୍ତ ବିକାଶ ଦୁବେକୁ ଏନକାଉଣ୍ଟର କରିଛି ୟୁପି ପୋଲିସ । ଦୁର୍ଘଟଣାଗ୍ରସ୍ତ ଗାଡ଼ିରୁ ଖସି ପଳାଇବାକୁ ଉଦ୍ୟମ କରୁଥିବା ଏହି କୁଖ୍ୟାତ ଅପରାଧୀକୁ ୟୁପି ପୋଲିସର ଏସଟିଏଫ ଏନକାଉଣ୍ଟର କରିଥିଲା । ତେବେ ଏହି ଏନକାଉଣ୍ଟରକୁ ନେଇ ସରକାରଙ୍କ ଉପରେ ହମଲା କରିଛନ୍ତି ବିରୋଧୀ । ବିକାଶକୁ କୋର୍ଟରେ ହାଜର କରାଯାଇଥିଲେ, ବହୁ ଗୁମର ଖୋଲିଥାନ୍ତା । ସରକାରଙ୍କ ଅସଲ ଚେହେରା ପଦାରେ ପଡ଼ିଥାନ୍ତା । ରାଜନୈତିକ ଲିଙ୍କ୍ ସାମ୍ନାକୁ ଆସିଥାନ୍ତା । ତେଣୁ ତାକୁ ଜାଣି ଶୁଣି ଏନକାଉଣ୍ଟର କରାଯାଇଥିବା ବିରୋଧୀ କହିଛନ୍ତି । ଆଉ ଠିକ୍ ଏହି ସମୟରେ ନିଜ ପୁଅର ଏନକାଉଣ୍ଟରକୁ ଠିକ ବୋଲି କହିଛନ୍ତି ବିକାଶ ଦୁବେର ପିତା ରାମକୁମାର ଦୁବେ । 

 ପୁଅର ଏନକାଉଣ୍ଟର ପରେ ରାମକୁମାର କହିଛନ୍ତି, ''ଉତ୍ତର ପ୍ରଦେଶ ପୋଲିସ ମୋ ପୁଅ ବିରୋଧରେ କାର୍ଯ୍ୟନୁଷ୍ଠାନ ନେଇ ଠିକ୍ କରିଛି । ମୋ ପୁଅ ୮ ପୋଲିସ କର୍ମଚାରୀଙ୍କୁ ମାରିଥିଲା, ଯାହା ଅକ୍ଷମଣୀୟ ଅପରାଧ ।''

ଖବର ସରୋବରାହ ସଂସ୍ଥା ଏଏନଆଇକୁ ପ୍ରତିକ୍ରିୟା ଦେଇ ସେ କହିଛନ୍ତି, ''ସେ(ବିକାଶ ଦୁବେ) କ'ଣ ଆମ କଥା ମାନିଲା ? ଯଦି ଆମ କଥା ମାନିଥାନ୍ତା, ତା' ଜୀବନ ଏମିତି ଶେଷ ହୋଇ ନ ଥାନ୍ତା । ବିକାଶ କେବେ ମଧ୍ୟ କୌଣସି ପ୍ରକାରରେ ଆମର ସାହାଯ୍ୟ କରିନାହିଁ । ତା' ଯୋଗୁ ଆମ ପୈତୃକ ସମ୍ପତ୍ତି ନଷ୍ଟ ହୋଇଗଲା । ସେ ୮ ପୋଲିସ କର୍ମଚାରୀକୁ ମାରିଲା, ଯାହା ଅକ୍ଷମଣୀୟ ଅପରାଧ । ତେଣୁ ପ୍ରଶାସନ ଠିକ କରିଛି । ଯଦି କାର୍ଯ୍ୟାନୁଷ୍ଠାନ ନିଆଯାଇ ନ ଥାନ୍ତା, ସେ ଆଗକୁ ପୁଣି ଆଉ କିଛି ହରକତ କରିଥାନ୍ତା ।''

ରାମ କୁମାର ଦୁବେ ଆଗକୁ ଆହୁରି ମଧ୍ୟ କହିଛନ୍ତି, ''ମୁଖ୍ୟମନ୍ତ୍ରୀଙ୍କ ଦାୟିତ୍ୱ ଏହା ଯେ, ସେ ପ୍ରତ୍ୟେକ ଲୋକଙ୍କ ସୁରକ୍ଷା କରିବେ । ପୋଲିସ ମଧ୍ୟ ଏହା ସହ ଜଡ଼ିତ । ବିକାଶ ଦୁବେ ପୋଲିସ ଉପରେ ହମଲା କଲା, ଯାହାକୁ କ୍ଷମା ଦିଆଯାଇପାରିବ ନାହିଁ ।''
ବିକାଶ ଦୁବେର ଅନ୍ତିମ ସଂସ୍କାର ସମୟରେ ମଧ୍ୟ ପିତା ରାମକୁମାର ଦୁବେ ଉପସ୍ଥିତ ରହି ନ ଥିଲେ । ବିକାଶର ମା', ସ୍ତ୍ରୀ, ପୁଅ ଓ ଅନ୍ୟ କିଛି ସମ୍ପର୍କୀୟ ଅନ୍ତିମ ସଂସ୍କାର ବେଳେ ଉପସ୍ଥିତ ଥିଲେ । କିନ୍ତୁ ରାମକୁମାର ଯିବାକୁ ମନା କରିଦେଇଥିଲେ । କେବଳ ଏତିକି ନୁହେଁ, ପୁଅର କ୍ରିୟାକର୍ମ ବେଳେ ମଧ୍ୟ ଯିବି ନାହିଁ ବୋଲି  ସଫା ସଫା କହିଦେଇଛନ୍ତି ରାମକୁମାର । ସରକାରଙ୍କୁ ସେ କେବଳ ଗୋଟିଏ ଅପିଲ କରିଛନ୍ତି । ମୋତେ ମୋ ପୈତୃକ ସମ୍ପତ୍ତି ପୁଣିଥରେ ଦଖଲ କରିବାକୁ ଦିଆଯାଉ ଓ ମୁଁ କେବଳ ଏତିକି ଚାହୁଁଛି ବୋଲି କହିଛନ୍ତି ରାମକୁମାର ଦୁବେ । କୁଳାଙ୍ଗାର ପୁଅ ଯେତେବେଳେ ପିତାଙ୍କ ସାମ୍ନାରେ ପୈତୃକ ସମ୍ପତ୍ତି ନଷ୍ଟ କରେ, ତାହା ଜଣେ ବାପ ପାଇଁ କେତେ ଯେ କଷ୍ଟ ଦାୟକ ରାମକୁମାରଙ୍କ ପ୍ରତିକ୍ରିୟାରୁ ବୁଝାପଡ଼ୁଛି ।