Russia ukraine war update:ଋଷ-ୟୁକ୍ରେନ୍ ଯୁଦ୍ଧକୁ ଦୁଇ ବର୍ଷ, ୟୁକ୍ରେନର ହାତ ଛାଡୁଛନ୍ତି ନାଟୋ ଦେଶ ?

Russia ukraine war update: 'ର୍ମୁଁ ନିଷ୍ପତ୍ତି ନେଇଛି, ଆମେ ଏକ ସ୍ୱତନ୍ତ୍ର ସାମରିକ ଅପରେସନ କରିବାକୁ ଯାଉଛୁ, ଯଦି କେହି ଆମ ଅପରେସନରେ ହସ୍ତକ୍ଷେପ କରିବାକୁ ଚେଷ୍ଟା କରନ୍ତି, ତେବେ ରୁଷିଆ ମଧ୍ୟ ସମାନ ସ୍ୱରରେ ଜବାବ ଦେବ, ଆପଣଙ୍କୁ ଏହି ହସ୍ତକ୍ଷେପ ପାଇଁ ମୂଲ୍ୟ ଦେବାକୁ ପଡିବ, ଆପଣଙ୍କୁ ଏଭଳି ପରିଣାମ ଭୋଗିବାକୁ ପଡିବ ଯାହା ଆପଣ ପୂର୍ବରୁ କେବେ ମଧ୍ୟ ଚିନ୍ତା କରିନଥିବେ।'  ଫେବ୍ରୁଆରି ୨୪,୨୦୨୨ରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଦୁଇ ବର୍ଷ ପୂର୍ବେ ଏହା ଘୋଷଣା କରିଥିଲେ ଏବଂ ସାରା ବିଶ୍ୱ ସ୍ତବ୍ଧ ହୋଇଯାଇଥିଲା। ରୁଷ୍ ସେନା ୟୁକ୍ରେନରେ ପ୍ରବେଶ କରିବା ଆରମ୍ଭ କଲା। ଯୁଦ୍ଧ ପାଇଁ  ବିଶ୍ୱ ଷ୍ଟକ ବଜାର ଭୁଶୁଡ଼ି ପଡ଼ିଲା, ଅଶୋଧିତ ତୈଳ ଦର ଆକାଶଛୁଆଁ ହେଲା, ୟୁକ୍ରେନବାସୀଙ୍କ ଚିତ୍କାର ଚାରିଆଡେ ଗୁଞ୍ଜରିତ ହେଲା ।

ରୁଷିଆ ଯାହାକୁ ଏକ ସ୍ୱତନ୍ତ୍ର ସାମରିକ ଅଭିଯାନ ବୋଲି କହିଥିଲା, ବିଶ୍ୱ ତାହାକୁ ଏକ ଯୁଦ୍ଧ ବୋଲି ବିବେଚନା କରିଥିଲା। ଗଣମାଧ୍ୟମ ଏହି ଯୁଦ୍ଧର ମାନବିକ ଦୃଶ୍ୟ ଦେଖାଇଥିଲା। ଏହା ଭିତରେ ଦୁଇ ବର୍ଷ ବିତିଛି କିନ୍ତୁ ଯୁଦ୍ଧ ସରିବାର ନାମ ନେଉନାହିଁ।

ଯେତେବେଳେ ଯୁଦ୍ଧ ଆରମ୍ଭ ହେଲା, ସେତେବେଳେ ବିଶ୍ୱାସ କରାଯାଉଥିଲା ଯେ ରୁଷିଆ ଖୁବଶୀଘ୍ର ୟୁକ୍ରେନକୁ ପରାସ୍ତ କରିବ। କିନ୍ତୁ ୟୁକ୍ରେନ ସେନା ଯୁଦ୍ଧର ଅନେକ କ୍ଷେତ୍ରରେ ରୁଷିଆକୁ ପରାସ୍ତ କରିଥିଲା । ଅନେକ ଅଞ୍ଚଳରୁ ରୁଷ୍ ସେନା ପଛକୁ ହଟିବାକୁ ବାଧ୍ୟ ହୋଇଥିଲା। ଯୁଦ୍ଧର ଦୁଇ ବର୍ଷ ପରେ ଆଜି ସ୍ଥିତି ଟିକିଏ ଭିନ୍ନ। ଋଷସେନା ଫ୍ରଣ୍ଟଫୁଟରେ ଥିବା ବେଳେ କିଭ୍ ଅସ୍ତ୍ରଶସ୍ତ୍ରର ଘୋର ଅଭାବର ସମ୍ମୁଖୀନ ହେଉଛନ୍ତି।

ୟୁକ୍ରେନ ସୈନିକଙ୍କ ମନୋବଳ ଭାଙ୍ଗି ଯାଇଥିବା ଜଣାପଡିଛି । ହଜାର ହଜାର ମହିଳା, ବିଧବା ଓ ଶିଶୁ ଅନାଥ ହୋଇଛନ୍ତି। ୪ନିୟୁତରୁ ଅଧିକ ୟୁକ୍ରେନୀୟ ଦେଶ ଛାଡିବାକୁ ବାଧ୍ୟ ହୋଇଥିଲେ। ଏଥିସହିତ ଦେଶରେ ୬୫ ଲକ୍ଷରୁ ଅଧିକ ନାଗରିକ ବିସ୍ଥାପିତ ହୋଇଛନ୍ତି। ଦ୍ବିତୀୟ ବିଶ୍ୱଯୁଦ୍ଧ ପରେ ଏହା ହେଉଛି ସବୁଠାରୁ ବଡ଼ ଶରଣାର୍ଥୀ ସଙ୍କଟ। ୟୁକ୍ରେନର ୩,୦୦,୦୦୦ ସୈନିକ ଏବେ ବି ଠିଆ ହୋଇଛନ୍ତି, କିନ୍ତୁ ସେମାନେ ଥକି ଯାଇଛନ୍ତି ଏବଂ କ୍ରମଶଃ ଦୁର୍ବଳ ହେଉଛନ୍ତି। ମସ୍କୋ ଗତ କିଛି ମାସ ମଧ୍ୟରେ ସାମାନ୍ୟ ସଫଳତା ହାସଲ କରିଛି ଏବଂ ଚଳିତ ମାସରେ ୟୁକ୍ରେନର ପ୍ରମୁଖ ପୂର୍ବ ସହର ଅବଦିଭକାକୁ ଦଖଲ କରି ଏକ ବଡ଼ ବିଜୟ ହାସଲ କରିଛି। ଆଜିର କାହାଣୀରେ ଆମେ ବୁଝିବାକୁ ଚେଷ୍ଟା କରିବୁ କି ଦୁଇ ବର୍ଷ ପରେ ଏହି ଯୁଦ୍ଧର ଭବିଷ୍ୟତ କେମିତି ହେବ ? ଦୁଇ ବର୍ଷରେ କିଏ କ'ଣ ହାସଲ କରିଛି, ଆଉ କ'ଣ ହରାଇଛି?

ଦୁଇ ବର୍ଷରେ ୟୁକ୍ରେନ କ'ଣ କ୍ଷତି ସହିଛି?

ପାଖାପାଖି ୪୩ ନିୟୁତ ଜନସଂଖ୍ୟା ବିଶିଷ୍ଟ ୟୁକ୍ରେନର ୧୭.୬ ନିୟୁତ ୟୁକ୍ରେନବାସୀଙ୍କୁ ରିଲିଫ ସାମଗ୍ରୀ ଉପରେ ନିର୍ଭର କରିବାକୁ ପଡ଼ୁଛି। ୟୁକ୍ରେନର ୧୮ ପ୍ରତିଶତ ଅଞ୍ଚଳକୁ ଏବେ ବି ରୁଷ୍ ନିୟନ୍ତ୍ରଣରେ ରଖିଛି। ରାଷ୍ଟ୍ରପତି ପୁଟିନଙ୍କ ପାଇଁ ଆଭିଦିଭକା ସହର ଦଖଲ ହେବା ଖବର ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ କିନ୍ତୁ ଏହି ସହର ରୁଷିଆ ହାତକୁ ଖସିଯିବା କାରଣରୁ ୟୁକ୍ରେନର ଅନେକ ତ୍ରୁଟି ମଧ୍ୟ ସାମ୍ନାକୁ ଆସିଛି । ସବୁଠାରୁ ବଡ଼ ତ୍ରୁଟି ହେଉଛି ଋଷିଆର ବଡ଼ ଆକ୍ରମଣକୁ ରୋକିବା ପାଇଁ ୟୁକ୍ରେନ ପର୍ଯ୍ୟାପ୍ତ ଅସ୍ତ୍ରଶସ୍ତ୍ର ଏବଂ ମାନବ ସମ୍ବଳର ଘୋର ଅଭାବ ସହ ସଂଘର୍ଷ କରୁଛି। ଏହି ଅଭାବକୁ ଦୂର କରିବା ପାଇଁ ୟୁକ୍ରେନ ସରକାର ସେନାରେ ଯୋଗଦେବା ପାଇଁ ବୟସ ହ୍ରାସ କରିବାକୁ ପ୍ରସ୍ତାବ ଦେଇଛନ୍ତି। ଅନେକ ଲୋକ ଏହାକୁ ବିରୋଧ କରୁଛନ୍ତି।

ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେନସ୍କି ଚଳିତ ବର୍ଷ ମ୍ୟୁନିକର  ବିଶ୍ୱ ସୁରକ୍ଷା ସମ୍ମିଳନୀରେ ଏହି ପ୍ରସଙ୍ଗ ଉଠାଇଥିଲେ। ଅବଦିଭାକାରେ ରୁଷୀୟ ସେନାକୁ ଧୂଳିସାତ କରିଥିବାରୁ ସେ ତାଙ୍କ ସୈନ୍ୟମାନଙ୍କୁ ପ୍ରଶଂସା କରିବା ସହ କହିଛନ୍ତି ଯେ ଅସ୍ତ୍ରଶସ୍ତ୍ରର ଅଭାବ ସିଧାସଳଖ ୟୁକ୍ରେନର ଅବଦିଭକାରେ ପଛଘୁଞ୍ଚା ଦେବାର କାରଣ।  ପାଶ୍ଚାତ୍ୟ ଦେଶଗୁଡ଼ିକ ୨୦୨୨ରେ ଯେଉଁ ଏକତା ପ୍ରଦର୍ଶନ କରିଥିଲେ ତାହା ୨୦୨୩ ପର୍ଯ୍ୟନ୍ତ ଜାରି ରହିଥିଲା କିନ୍ତୁ ବର୍ତ୍ତମାନ ଏହା ହ୍ରାସ ପାଇବାରେ ଲାଗିଛି।

ଋଷର ଅର୍ଥନୀତିରେ ଟ୍ରାକକୁ ଫେରୁଛି

୨୦୨୪ ଫେବ୍ରୁଆରି ୨୩ ରେ ଆମେରିକା ରୁଷିଆରେ ଥିବା ୫୦୦ ନୂଆ ରୁଷୀୟ କମ୍ପାନୀ ଉପରେ ପ୍ରତିବନ୍ଧକ ଲଗାଇଛି। ରୁଷର ବିରୋଧୀ ଦଳ ନେତା ଆଲେକ୍ସି ନାଭାଲନିଙ୍କ ମୃତ୍ୟୁରେ ରୁଷିଆର ଭୂମିକା ପାଇଁ ଏପରି କରାଯାଇଛି। ରୁଷ୍ ଉପରେ ନୂଆ କଟକଣା ଲାଗୁ ହେବା ନେଇ ଚର୍ଚ୍ଚା ହେଉଥିଲେ ହେଁ ସେମାନେ ଋଷ ଉପରେ ୧୬ ହଜାରରୁ ଅଧିକ କଟକଣା ଲଗାଇ ସାରିଲେଣି। ଷ୍ଟାଟିଷ୍ଟା ତଥ୍ୟ ଅନୁଯାୟୀ, ଋଷ ବିଶ୍ୱର ପ୍ରଥମ ଦେଶ ଯିଏ ଏଭଳି ସଙ୍କଟର ସମ୍ମୁଖୀନ ହୋଇଛି କିନ୍ତୁ ଏହା ସତ୍ତ୍ୱେ ରୁଷ୍ ନିଜ ଅର୍ଥନୀତିକୁ ପାଶ୍ଚାତ୍ୟ କଟକଣାରୁ ରକ୍ଷା କରିବାରେ ସକ୍ଷମ ହୋଇଛି। ଆଜି ରୁଷର ଅର୍ଥନୀତି ରେ ଉନ୍ନତି ଘଟୁଛି । ଯାହା ଆମେରିକା ଓ ମିତ୍ର ରାଷ୍ଟ୍ରମାନଙ୍କ ଆଶା ନଥିଲା।

କିନ୍ତୁ ରୁଷ୍  ସୈନିକ ଖୁସି ନାହାନ୍ତି

ୟୁକ୍ରେନର ଅଧିକାରୀଙ୍କ କହିବା ଅନୁ୍ସାରେ, ସେମାନଙ୍କ ସଶସ୍ତ୍ର ବାହିନୀର ସଂଖ୍ୟା ପାଖାପାଖି ୮ ଲକ୍ଷ। ଲକ୍ଷ ଲକ୍ଷ ଲୋକ ପ୍ରାଣ ହରାଇଛନ୍ତି। କିନ୍ତୁ ରୁଷୀୟ ସୈନ୍ୟଙ୍କ ଅବସ୍ଥା ମଧ୍ୟ ଖରାପ ରହିଛି। ସ୍ୱାଧୀନ ସଂସ୍ଥା ମିଡିଆଜୋନା ଅନୁଯାୟୀ, ୨୦୨୨ ଫେବ୍ରୁଆରି ପରଠାରୁ ୟୁକ୍ରେନରେ ଆଗଧାଡ଼ିରେ ଲଢୁଥିବା ପ୍ରାୟ ୪୫ ହଜାର ରୁଷୀୟ ନିହତ ହୋଇଛନ୍ତି। ଆଫଗାନିସ୍ତାନ ଉପରେ ଏକ ଦଶନ୍ଧି ଧରି ଦଖଲ କରିବା ସମୟରେ ଲାଲ ସେନାର କ୍ଷତିର ଏହା ତିନି ଗୁଣ, କିନ୍ତୁ ଏହି ଅଭାବକୁ ଦୂର କରିବା ପାଇଁ ଏକ ଆଦେଶ ଜାରି କରିଛି। ଯେଉଁଥିରେ ରୁଷିଆ ପକ୍ଷରୁ ଲଢୁଥିବା ବିଦେଶୀମାନଙ୍କୁ ରୁଷୀୟ ନାଗରିକତା ପ୍ରଦାନ କରିବାକୁ ପ୍ରସ୍ତାବ ଦିଆଯାଇଛି । ରୁଷ୍ ଏହାର ଜିଡିପିର ୭.୧ ପ୍ରତିଶତ ଯୁଦ୍ଧରେ ଖର୍ଚ୍ଚ କରିଥାଏ। ମାନବ ସମ୍ବଳ ଦୃଷ୍ଟିରୁ ୟୁକ୍ରେନ ତୁଳନାରେ ରୁଷ୍ ପାଖରେ ଅଧିକ ସମ୍ବଳ ରହିଛି ଏବଂ ଏହା ଯୁଦ୍ଧ ଦ୍ୱାରା ହୋଇଥିବା କ୍ଷୟକ୍ଷତିକୁ ଦୀର୍ଘକାଳୀନ ଭାବେ ଗ୍ରହଣ କରିପାରିବ।

ଏହା କ'ଣ ଏହି ଯୁଦ୍ଧର ଅନ୍ତ ନୁହେଁ?

ୟୁରୋପୀୟ ବୈଦେଶିକ ସମ୍ପର୍କ ପରିଷଦ ର ଏକ ସର୍ଭେ ରେ କୁହାଯାଇଛି ଯେ ରୁଷିଆ ବିରୋଧରେ ଯୁଦ୍ଧରେ ଅଧିକାଂଶ ୟୁରୋପୀୟ ୟୁକ୍ରେନକୁ ସମର୍ଥନ କରନ୍ତି, କିନ୍ତୁ ପ୍ରତି ୧୦ ଜଣଙ୍କ ମଧ୍ୟରୁ ମାତ୍ର ୧ ଜଣ ଭାବନ୍ତି ଯେ ୟୁକ୍ରେନ ଜିତିପାରିବ । ଅଧିକାଂଶ ଲୋକ ବିଶ୍ୱାସ କରନ୍ତି ଯେ ବୁଝାମଣା ଏହି ସଂଘର୍ଷର ଅନ୍ତ କରିବ । ଏପରିକି କେତେକ ରୁଷିଆ ସହ ବୁଝାମଣା କରିବା ପରିବର୍ତ୍ତେ ୟୁକ୍ରେନର ପ୍ରତିଶୋଧକୁ ସମର୍ଥନ କରୁଛନ୍ତି।

ଟ୍ରମ୍ପ ୟୁକ୍ରେନକୁ ଆମେରିକାର ସାମରିକ ସହାୟତାକୁ ବିରୋଧ କରିଛନ୍ତି। ୟୁରୋପୀୟ ସଂଘ ଓ ୟୁକ୍ରେନ ପାଇଁ ଟ୍ରମ୍ପଙ୍କ ବିଜୟଠାରୁ ଖରାପ ଆଉ କିଛି ହେବ ନାହିଁ। ଫେବ୍ରୁଆରି ୧୦ ତାରିଖରେ ଟ୍ରମ୍ପ କହିଥିଲେ ଯେ ତାଙ୍କ ନେତୃତ୍ୱରେ ଆମେରିକା ପ୍ରତିରକ୍ଷା କ୍ଷେତ୍ରରେ ଜିଡିପିର ଦୁଇ ପ୍ରତିଶତରୁ କମ୍ ଖର୍ଚ୍ଚ କରୁଥିବା ନାଟୋ ସଦସ୍ୟ ଦେଶକୁ ରକ୍ଷା କରିବ ନାହିଁ। ଯଦି ରାଷ୍ଟ୍ରପତି ଜୋ ବାଇଡେନ ନିର୍ବାଚନ ରେ ବିଜୟୀ ହୁଅନ୍ତି ତେବେ କେବଳ ୟୁରୋପକୁ ଆମେରିକାର ସମର୍ଥନ ମିଳିବ ।

ଯୁଦ୍ଧ ଯୋଗୁଁ ପୁଟିନଙ୍କ ପ୍ରଭାବ ବଢିଲା କି?

ଷ୍ଟାଟିଷ୍ଟା ରିସର୍ଚ୍ଚ ଡିପାର୍ଟମେଣ୍ଟର ଏକ ରିପୋର୍ଟ ଅନୁଯାୟୀ, ଜାନୁଆରୀ ୨୦୨୪ରେ ୧୦ ଜଣଙ୍କ ମଧ୍ୟରୁ ୮ ରୁ  ଅଧିକ ରୁଷୀୟ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ କାର୍ଯ୍ୟ ପଦ୍ଧତିକୁ ସମର୍ଥନ କରିଥିଲେ । ସେପ୍ଟେମ୍ବର ୨୦୨୨ ତୁଳନାରେ ଲୋକପ୍ରିୟତାର ସ୍ତର ୮ ପ୍ରତିଶତ ଅଧିକ ଥିଲା। ବର୍ତ୍ତମାନ ପୁଟିନଙ୍କ ଲୋକପ୍ରିୟତା ବଜାୟ ରହିଛି। ଋଷୀୟ ନାଗରିକମାନେ ପୁଟିନଙ୍କୁ ଦୁଇଟି କାରଣ ପାଇଁ ସମର୍ଥନ କରୁଛନ୍ତି: ପ୍ରଥମ, ଦୁଇ ବର୍ଷର ଯୁଦ୍ଧ ପରେ ମଧ୍ୟ ଅର୍ଥନୀତି ଭୁଶୁଡ଼ି ନାହିଁ, ସାମରିକ ନିଯୁକ୍ତି ବୃଦ୍ଧି ପାଇଛି ଏବଂ ଦ୍ବିତୀୟତଃ, ଏହି ସମୟରେ ଯୁଦ୍ଧ ଉପରେ ରୁଷିଆର ନିୟନ୍ତ୍ରଣ ରହିଛି। ଲୋକମାନେ ଏହି ନୂତନ ଅର୍ଥନୈତିକ ସୁଯୋଗକୁ ଉପଭୋଗ କରୁଛନ୍ତି । ଏବଂ ଏହା ବାସ୍ତବ କଥା ଯେ ପୁଟିନ୍ ଚଳିତ ନିର୍ବାଚନରେ ମଧ୍ୟ ଜିତିବା ପ୍ରାୟ ନିଶ୍ଚିତ। କାରଣ ପୁଟିନଙ୍କ ରୁଷିଆରେ ତାଙ୍କ ବ୍ୟତୀତ ଅନ୍ୟ କୌଣସି ବିକଳ୍ପ ନାହିଁ।