Odisha News: ବାଟମାରଣା ହେଉଛି ଚାଉଳ ଗହମ, ବର୍ଷକୁ ୬୯ ହଜାର କୋଟି କ୍ଷତି

Odisha News: ଭୁବନେଶ୍ୱର: ସରକାର ଗରିବ ଲୋକଙ୍କୁ ପ୍ରତି ମାସରେ ମାଗଣାରେ ଚାଉଳ ଓ ଗହମ ଦେଉଛନ୍ତି। କିନ୍ତୁ ଚିନ୍ତାର ବିଷୟ ହେଉଛି ସେହି ସବୁ ଶସ୍ୟର ଏକ ବଡ଼ ଭାଗ ହିତାଧିକାରୀଙ୍କ ପାଖରେ ପହଞ୍ଚିବା ପୂର୍ବରୁ ବାଟମାରଣା ହୋଇଯାଉଛି। ଜାତୀୟ ସ୍ତରରେ ୨୮ ପ୍ରତିଶତ ମାଗଣା ଶସ୍ୟ ହିତାଧିକାରୀଙ୍କ ପାଖରେ ପହଞ୍ଚୁନାହିଁ। ଓଡ଼ିଶାରେ ସ୍ଥିତି ସାମାନୟ ଉନ୍ନତ ରହିଥିଲେ ମଧ୍ୟ ଚିନ୍ତାଜନକ ରହିଛି। ରାଜ୍ୟରେ ୨୪.୭ ପ୍ରତିଶତ ମାଗଣା ଚାଉଳ ଓ ଗହମ ହିତାଧିକାରୀଙ୍କ ପାଖରେ ପହଞ୍ଚୁନାହିଁ। ସେହି ଶସ୍ୟକୁ ଖୋଲା ବଜାରରେ ବିକ୍ରି କରାଯାଉଛି କିମ୍ବା ରପ୍ତାନୀ କରାଯାଉଥିବା ସନ୍ଦେ କରାଯାଉଛି। 

ଏହି ସାଂଘାତିକ କାରବାର ଉପରୁ ପରଦା ଉଠାଇଛି ଇଣ୍ଡିଆନ କାଉନସିଲ ଫର ରିସର୍ଚ୍ଚ ଅନ ଇଣ୍ଟରନ୍ୟାସନାଲ ଇକୋନୋମିକ ରିଲେସନ୍ସ ଏହା ଜାରି କରିଥିବା ରିପୋର୍ଟରେ ଜଣାଇଛି ଯେ ଲୋକମାନଙ୍କୁ ମାଗଣାରେ ଦେବା ଲାଗି ୨୦୨୨-୨୩ରେ ଓଡ଼ିଶା ଭାଗରେ ୨.୮୨ ନିୟୁତ ଟନ ଚାଉଳ ଓ ଗହମ ପଡ଼ିଥିଲା। ସେଥିରୁ ୨.୧୩ ନିୟୁତ ଟନ ଶସ୍ୟ ହିତାଧିକାରୀଙ୍କ ନିକଟରେ ପହଞ୍ଚିଥିଲା। ଅବଶିଷ୍ଟ ୭ ଲକ୍ଷ ଟନ ଗହମ ଓ ଚାଉଳର ବାଟମାରଣା ହୋଇଯାଇଥିଲା। ଅର୍ଥାତ ଆବଣ୍ଟିତ ଶସ୍ୟର ୨୪.୭ ପ୍ରତିଶତ ବାଟମାରଣା ହୋଇଯାଇଛି। 

ରିପୋର୍ଟରେ ଜଣାପଡ଼ିଛି ଯେ ଅରୁଣାଚଳ ପ୍ରଦେଶରେ ସର୍ବାଧିକ ୬୩.୨ ପ୍ରତିଶତ ଶସ୍ୟର ବାଟମାରଣା ହେଉଛି। ଏହା ପଛକୁ ରହିଛନ୍ତି ନାଗାଲ୍ୟାଣ୍ଡ (୬୦.୪ ପ୍ରତିଶତ), ଗୁଜରାଟ (୪୩ ପ୍ରତିଶତ), ହିମାଚଳ ପ୍ରଦେଶ ୩୬.୩ ପ୍ରତିଶତ, ଉତ୍ତରାଖଣ୍ଡ ୩୫.୭ ପ୍ରତିଶତ ଓ ମହାରାଷ୍ଟ୍ର ୩୫.୭ ପ୍ରତିଶତ। ସର୍ବଭାରତୀୟ ସ୍ତରରେ ମାଗଣା ଶସ୍ୟ ବାଟମାରଣା ହାର ୨୮ ପ୍ରତିଶତ ରହିଛି। ସେଥିପାଇଁ ବର୍ଷକୁ ଦେଶରେ ୬୯ ହଜାର କୋଟି ଟଙ୍କାର କ୍ଷତି ହେଉଛି। ୨୦୨୨ ଅଗଷ୍ଟରୁ ୨୦୨୩ ଜୁଲାଇ ପର୍ଯ୍ୟନ୍ତ ସମୟର ପାରିବାରିକ ଉପଯୋଗିତା ବ୍ୟୟ ସର୍ବେକ୍ଷଣ ଓ ଭାରତୀୟ ଖାଦ୍ୟ ନିଗମ ତଥ୍ୟ ଆଧାରରେ ଏହି ରିପୋର୍ଟ ପ୍ରସ୍ତୁତ କରାଯାଇଛି। 

୨୦୧୧-୧୨ ବେଳକୁ ୪୬ ପ୍ରତିଶତ ଖାଦ୍ୟଶସ୍ୟ ନଷ୍ଟ ହେଉଥିଲା। ସେହି ତୁଳନାରେ ବର୍ତ୍ତମାନ ସମୟର ବାର୍ଷିକ ବାଟମାରଣା ବେଶ ହ୍ରାସ ପାଇଛି।କିନ୍ତୁ ହିତାଧିକାରୀଙ୍କ ପାଖରେ ପହଞ୍ଚିବା ପୂର୍ବରୁ ଖାଦ୍ୟଶସ୍ୟର ବାଟମାରଣା ଚିନ୍ତାର ବିଷୟ ହୋଇରହିଛି। ଏହି ସମସ୍ୟାର ସମାଧାନ ଲାଗି ୨୦୧୬ରେ ରାସନ ଦୋକାନ ଗୁଡ଼ିକରେ ପଏଣ୍ଟ ଅଫ ସେଲ ମେସିନ ବ୍ୟବହାର ଆରମ୍ଭ ହୋଇଥିଲା। ସେଥିପାଇଁ ଯଦିଓ ବାଟମାରଣ କମିଛି କିନ୍ତୁ ତାହା ସମ୍ପୂର୍ଣ୍ଣ ବନ୍ଦ ହୋଇପାରିନାହିଁ।