ରୋଟାରାକ୍ଟ କ୍ଲବ୍ ସହାୟତାରେ ଶ୍ରୀ ଶ୍ରୀ ଆୟୁର୍ବେଦ ଚିକିତ୍ସାଳୟ ପରିସରରେ ସୁରକ୍ଷିତ ମାତୃତ୍ୱ ଦିବସ

ମାତୃଶକ୍ତି ହେବ ସଶକ୍ତ: ରୋଟାରାକ୍ଟ କ୍ଲବ୍ ସହାୟତାରେ ଶ୍ରୀ ଶ୍ରୀ ଆୟୁର୍ବେଦ ଚିକିତ୍ସାଳୟ ପରିସରରେ ସୁରକ୍ଷିତ ମାତୃତ୍ୱ ଦିବସ

କଟକ: ପିଲାଟିଏ ଜନ୍ମହେବା ପୂର୍ବରୁ, ଜନ୍ମ ସମୟରେ ଏବଂ ଜନ୍ମ ପରେ ପ୍ରସୂତି ଏବଂ ନବଜାତକମାନଙ୍କ ଉତ୍ତମ ତଥା ସୁରକ୍ଷିତ ସ୍ୱାସ୍ଥ୍ୟ ଉପରେ ଗୁରୁତ୍ୱ ଦେବା ଜରୁରୀ । ଏହା ହିଁ ଏକ ଉତ୍ତମ ମାତୃତ୍ୱ ହୋଇଥାଏ । ଉତ୍ତମ ମାତୃତ୍ୱ ଗର୍ଭାବସ୍ଥା ଏବଂ ପ୍ରସବ ସମ୍ବନ୍ଧୀୟ ଜଟିଳତା ସହ ଜଡ଼ିତ ବିପଦକୁ କମ୍ କରିବା ସହ ଗୁଣବତ୍ତାଯୁକ୍ତ ସ୍ୱାସ୍ଥ୍ୟକୁ ଗୁରୁତ୍ୱ ଦିଏ । ଦାରିଦ୍ର୍ୟ, ଅପର୍ଯ୍ୟାପ୍ତ ସ୍ୱାସ୍ଥ୍ୟସେବା, ଭିତ୍ତିଭୂମି ଓ ସାଂସ୍କୃତିକ ପ୍ରତିବନ୍ଧକ ଭଳି କାରଣଗୁଡ଼ିକୁ ଗୁରୁତ୍ୱ ଦେଇ ଏହାର ନିବାରଣ ସାଙ୍ଗକୁ ମାତୃ ଏବଂ ଶିଶୁ ସ୍ୱାସ୍ଥ୍ୟରେ ସୁଧାର ଆଣିବାକୁ ଏହା ଉଦ୍ୟମ କରିଥାଏ । ମହିଳାମାନଙ୍କୁ ବିକଳ୍ପ ବାଛିବା ପାଇଁ, ସମ୍ମାନଜନକ ସ୍ୱାସ୍ଥ୍ୟସେବା ପାଇଁ ଏବଂ ସୁରୁଖୁରୁରେ ପ୍ରସବ ନିମନ୍ତେ ସଚେତନ କରିବାକୁ ସୁରକ୍ଷିତ ମାତୃତ୍ୱ ଦିବସ ପାଳିତ ହୋଇଥାଏ ।

ଏହି ପରିପ୍ରେକ୍ଷୀରେ ଶ୍ରୀ ଶ୍ରୀ ଆୟୁର୍ବେଦ ମହାବିଦ୍ୟାଳୟ, ଶ୍ରୀ ଶ୍ରୀ ବିଶ୍ୱବିଦ୍ୟାଳୟ ଏବଂ ରୋଟାରାକ୍ଟ କ୍ଲବର ମିଳିତ ଆନୁକୁଲ୍ୟରେ ସୁରକ୍ଷିତ ମାତୃତ୍ୱ ଦିବସକୁ ନେଇ ଏକ ସଚେତନତା କାର୍ଯ୍ୟକ୍ରମ ଶ୍ରୀ ଶ୍ରୀ ବିଶ୍ୱବିଦ୍ୟାଳୟ ପରିସରରେ ଅନୁଷ୍ଠିତ ହୋଇଥିଲା । ଡା. ଦେବାଶିଷ ଶତପଥୀଙ୍କ ନେତୃତ୍ୱରେ ମାତୃତ୍ୱକୁ ସୁରକ୍ଷିତ ଓ ଗୁଣବତ୍ତାଯୁକ୍ତ କରିବାକୁ ଆଲୋଚନା ହୋଇଥିଲା । କାର୍ଯ୍ୟକ୍ରମରେ ଉଭୟ ନବଜା ଶିଶୁ ଓ ପ୍ରସୂତିଙ୍କ ସୁରକ୍ଷିତ ସ୍ୱାସ୍ଥ୍ୟ ଉପରେ ଚର୍ଚ୍ଚା ହୋଇଥିଲା । ଡା. ଶତପଥୀ କହିଥିଲେ, ‘ଏହିପରି କାର୍ଯ୍ୟକ୍ରମ ଦ୍ୱାରା ମହିଳାମାନଙ୍କୁ ସଚେତନ କରିବା ସହ ଗର୍ଭାବସ୍ଥା ଓ ପିଲାଜନ୍ମ ସମୟର ସମସ୍ତ ସ୍ୱାସ୍ଥ୍ୟସେବା ସମ୍ପର୍କରେ ସୂଚନା ପ୍ରଦାନ କରାଯାଇପାରିବ ।’

ଶ୍ରୀ ଶ୍ରୀ ବିଶ୍ୱବିଦ୍ୟାଳୟ ଦ୍ୱାରା ପରିଚାଳିତ ଶ୍ରୀ ଶ୍ରୀ ଆୟୁର୍ବେଦ ମହାବିଦ୍ୟାଳୟ ପ୍ରଥମରୁ ହିଁ ଶିକ୍ଷା, ଅନୁସନ୍ଧାନ ଓ ସାମୂହିକ ସହଯୋଗ ଦ୍ୱାରା ସ୍ୱାସ୍ଥ୍ୟ ସମ୍ପନ୍ଧୀୟ ସମସ୍ୟା ଓ ଏହାର ସମାଧାନ ନିମନ୍ତେ ପ୍ରତିଶ୍ରିତିବଦ୍ଧ ରହି ଆସିଛି ।