Supertech Twin Tower Demolition: ୯ ବର୍ଷର ଲଢ଼େଇ ୯ ସେକେଣ୍ଡରେ ଶେଷ, ମାଟିରେ ମିଶିଲା ଗଗନଭେଦୀ ଅଟ୍ଟାଳିକା

ମାତ୍ର ୧୦ରୁ ୧୨ ସେକେଣ୍ଡ ମଧ୍ୟରେ ନୋଏଡା ସେକ୍ଟର ୯୩ସ୍ଥିତ ଭାରତ ସର୍ବୋଚ୍ଚ ଅଟାଳିକା ଧୂଳିଶାତ ହୋଇଯାଇଛି। ୧୦୦ ମିଟର ଦୂରରୁ ସୁପରଟେକ୍ ଟ୍ୱନ୍ ଟାୱାରକୁ ବିସ୍ଫୋରଣ କରାଯାଇଛି। ବିସ୍ଫୋରଣ ପରେ ସମଗ୍ର ଅଞ୍ଚଳ ଧୂଆଁମୟ ହୋଇଯାଇଛି। ନୋଏଡା ସେକ୍ଟର ୯୩ ଓ ଏହାର ଆଖପାଖ ଅଞ୍ଚଳର ଆକାଶ କେବଳ ଧୂଳି ଆଚ୍ଛାଦିତ ହୋଇଛି। ପବନର ଦିଗ ସହ ଏହି ବିଷାକ୍ତ ଧୂଳିକଣା ଆଗକୁ ଆଗକୁ ବଢିବାରେ ଲାଗିଛି।

Supertech Twin Tower Demolition, ନୂଆଦିଲ୍ଲୀ: ମାଟିରେ ମିଶିଲା ଭାରତର ଅନ୍ୟତମ ଉଚ୍ଚତମ ଅଟ୍ଟାଳିକା। ପୂର୍ବନିର୍ଦ୍ଧାରିତ ସମୟ ଅପରାହ୍ନ ସାଢେ ଦୁଇଟା ବେଳେ ୩୭୦୦ କିଲୋଗ୍ରାମ ବିସ୍ଫୋରକରେ ନଭଶ୍ଚୁମ୍ୱୀ କୋଠାକୁ ଧ୍ୱଂସ କରାଯାଇଛି। ମାତ୍ର କେଇ ସେକେଣ୍ଡରେ ଦୁଇଟି ବିଲ୍ଡିଂ ଧରାଶାୟୀ ହୋଇଯାଇଛି। ଦୀର୍ଘ ନ ବର୍ଷର ଆଇନଗତ ଲଢେଇ ପରେ ନଅ ମିନିଟରେ ସୁପରଟେକ୍ ଟ୍ୱନ୍ ଟାୱାର ଭୂପୃଷ୍ଟରୁ ଉଭେଇ ଯାଇଛି। ଏହାର ଭଗ୍ନାବଶେଷ ସଫା କରିବାକୁ ପ୍ରାୟ ତିନି ମାସ ସମୟ ଲାଗିବ ବୋଲି ଆକଳନ କରାଯାଉଛି।

ମାତ୍ର ୧୦ରୁ ୧୨ ସେକେଣ୍ଡ ମଧ୍ୟରେ ନୋଏଡା ସେକ୍ଟର ୯୩ସ୍ଥିତ ଭାରତ ସର୍ବୋଚ୍ଚ ଅଟାଳିକା ସମ୍ପୂର୍ଣ୍ଣ ଧୂଳିଶାତ ହୋଇଯାଇଛି। ୧୦୦ ମିଟର ଦୂରରୁ ସୁପରଟେକ୍ ଟ୍ୱନ୍ ଟାୱାରକୁ ବିସ୍ଫୋରଣ କରାଯାଇଛି। ଜବରଦସ୍ତ ଧମାକା ସହ ଟ୍ୱିନ୍ ଟାୱାର ମାଟିରେ ମିଶିଛି। ବିସ୍ଫୋରଣ ପରେ ସମଗ୍ର ଅଞ୍ଚଳ ଧୂଆଁମୟ ହୋଇଯାଇଛି। ନୋଏଡା ସେକ୍ଟର ୯୩ ଓ ଏହାର ଆଖପାଖ ଅଞ୍ଚଳର ଆକାଶ କେବଳ ଧୂଳି ଆଚ୍ଛାଦିତ ହୋଇଛି। ପବନର ଦିଗ ସହ ଏହି ବିଷାକ୍ତ ଧୂଳିକଣା ଆଗକୁ ଆଗକୁ ବଢିବାରେ ଲାଗିଛି। ଧୂଆଁକୁ ନିୟନ୍ତ୍ରୀତ କରିବାକୁ ପ୍ରଶାସନ ପକ୍ଷରୁ ଜଳ ଛିଞ୍ଚନ କରାଯାଉଛି। କିନ୍ତୁ ଧୂଳି କଣା ବାୟୁମଣ୍ଡଳରେ ପ୍ରବେଶ କରିଥିବାରୁ ତାହାକୁ ନିୟନ୍ତ୍ରଣ କରିବା ସମ୍ଭବ ହେଉନାହିଁ।

#WATCH | Once taller than Qutub Minar, Noida Supertech twin towers, reduced to rubble pic.twitter.com/vlTgt4D4a3

— ANI (@ANI) August 28, 2022

ଟ୍ୱିନ ଟାୱାର ବିସ୍ଫୋରଣ ପୂର୍ବରୁ ଲୋକଙ୍କୁ ନିକଟସ୍ଥ ଅଞ୍ଚଳରୁ ୫୦୦୦ରୁ ଊର୍ଦ୍ଧ୍ୱ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିଲା। ତଥାପି ପ୍ରଶାସନ ପୁନଃଯାଞ୍ଚ କରି କୌଣସି ଧନଜୀବନ ହାନୀ ହୋଇନଥିବା ସ୍ପଷ୍ଟ କରିଛି। କିନ୍ତୁ ଟ୍ୱିନ ଟାୱାରର କିଛି ଭଗ୍ନାଂଶ ଗୁଡିକ ନିକଟସ୍ଥ କୋଠା ଗୁଡିକର କାନ୍ଥରେ ପିଟି ହୋଇଛି। ଫଳରେ ସେଠାରେ ଲାଗିଥିବା ଜରି ଆବରଣ ଗୁଡିକ ଫାଟି ଯାଇଛି। ତେବେ କୋଠାର କୌଣସି କ୍ଷତି ହୋଇଛି ନା ନାହିଁ ତାହା ସ୍ପଷ୍ଟ ହୋଇ ନାହିଁ। ରବିବାର ସନ୍ଧ୍ୟା ସାଢେ ଛଅଟା ପରେ ବିସ୍ଥାପିତଙ୍କୁ ନିଜ ନିଜ ଘରେ ଆସିବାକୁ ଅନୁମତି ଦିଆଯିବ। କିନ୍ତୁ ପରିସ୍ଥିତି ଦେଖି ନିଷ୍ପତ୍ତି ନିଆଯିବ ବୋଲି ନୋଏଡା ଅଥରିଟିର ଅଧିକାରୀମାନେ ସୂଚନା ଦେଇଛନ୍ତି।

ଦୁର୍ନୀତିର ପ୍ରତୀକ ଟ୍ୱିନ ଟାୱାରର ଚିହ୍ନବର୍ଣ୍ଣ ଭୂପୃଷ୍ଟରୁ ଉଭେଇ ଯାଇଛି। କିନ୍ତୁ ପଛରେ ବାୟୁ ପ୍ରଦୂଷଣ ଭଳି ଏକ ବିରାଟ ସମସ୍ୟା ସୃଷ୍ଟି କରିଛି। ସାଧାରଣତଃ ଦିଲ୍ଲୀ ଏନସିଆରରେ ସବୁବେଳେ ଏୟାର କ୍ୱାଲିଟି ଇଣ୍ଡେକ୍ସ ସର୍ବାଧିକ ରୁହେ। ଟ୍ୱିନ ଟାୱାର ବିସ୍ଫୋରଣ ପରେ ଏଥିରୁ ନିର୍ଗତ ବିଶାକ୍ତ ଧୂଳି ଓ ବାରୁଦ ବାୟୁମଣ୍ଡଳରେ ପ୍ରବେଶ କରି ଭୟଙ୍କର ସ୍ୱାସ୍ଥ୍ୟ ସମସ୍ୟାର ଆଶଙ୍କା ସୃଷ୍ଟି କରିଛି। କୋଠାର ସିମେଣ୍ଟ ମିଶ୍ରିତ ଧୂଳି ଯୋଗୁଁ ଆଖି ପୋଡାଜଳା ହେବାର ସମ୍ଭାବନା ଅଛି। ଏହା ସହ ଲୋକଙ୍କୁ ଶ୍ୱାସକ୍ରୀୟ ଜନିତ ସମସ୍ୟା ମଧ୍ୟ ହୋଇପାରେ। ତେବେ ଲୋକମାନେ ନିଜ ନିଜ ଘରେ ପହଞ୍ଚିଲା ପରେ ସ୍ଥିତି ଉପରେ ଅଧିକ ସୂଚନା ମିଳିପାରିବ।

ବେଆଇନ ନିର୍ମାଣ ପାଇଁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ସୁପରଟେକ୍ ଟ୍ୱିନ ଟାୱାରକୁ ଧ୍ୱଂସ କରାଯାଇଛି। କିନ୍ତୁ ଏହାକୁ ନିର୍ମାଣ କରିଥିବା ସୁପରଟେକ (Supertech) କମ୍ପାନୀ ନୋଏଡ଼ା ଅଧିକାରୀଙ୍କ ଉପରେ ଦୋଷ ଲଦିଛନ୍ତି। ଦିଲ୍ଲୀରେ (New Delhi) ରିଅଲିଟି ସେକ୍ଟର କମ୍ପାନୀ ସୁପରଟେକ୍ (Supertech) କହିଛି ଯେ, ନୋଏଡା ଡେଭଲପମେଣ୍ଟ ଅଥରିଟି (Noida Development Authority) ଦ୍ୱାରା ଅନୁମୋଦିତ ବିଲଡିଂ ଯୋଜନା ଅନୁଯାୟୀ ଏହି ଟ୍ୱିନ ଟାୱାରର (Twin Tower) ନିର୍ମାଣ କରାଯାଇଛି। ଏଥିରେ କୌଣସି ପରିବର୍ତ୍ତନ କରାଯାଇ ନାହିଁ। ଏହି ଦୁଇଟି ଟାୱାର ପାଇଁ କମ୍ପାନୀର ଅନ୍ୟ ରିଅଲ୍ ଇଷ୍ଟେଟ୍ ପ୍ରକଳ୍ପ ଉପରେ ପ୍ରଭାବ ପଡିବ ନାହିଁ ଏବଂ ଘର କ୍ରେତାଙ୍କୁ ଠିକ୍ ସମୟରେ ସେମାନଙ୍କ ଫ୍ଲାଟ ଯୋଗାଇ ଦିଆଯିବ।