Delhi Metro: ଦିଲ୍ଲୀ ମେଟ୍ରୋରେ ଦୁର୍ଘଟଣା, ଫାଟକରେ ଶାଢୀ ଲାଗି ମହିଳାଙ୍କ ମୃତ୍ୟୁ

Delhi Metro: ଦିଲ୍ଲୀ ମେଟ୍ରୋରେ ଜଣେ ମହିଳାଙ୍କ ମୃତ୍ୟୁ ହେବା ପରେ ମେଟ୍ରୋ ରେଳ ସୁରକ୍ଷା କମିଶନରଙ୍କ ନେତୃତ୍ୱରେ ତୁରନ୍ତ ଏକ କମିଟି ଗଠନ କରାଯାଇଥିଲା । ଏଥିସହିତ ସମଗ୍ର ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଥିଲା । ବର୍ତ୍ତମା ରିପୋର୍ଟ ଆସିବା ପୂର୍ବରୁ ମେଟ୍ରୋ ପ୍ରଶାସନ ଏ ବିଷୟରେ କିଛି କହିବାକୁ ମନା କରିଛି।

Delhi Metro: ଦିଲ୍ଲୀ ମେଟ୍ରୋରେ ଏକ ବଡ଼ ଦୁର୍ଘଟଣା ସାମ୍ନାକୁ ଆସିଛି। ଇନ୍ଦ୍ରାଲୋକ ମେଟ୍ରୋ ଷ୍ଟେସନରେ ରେଡ୍ ଲାଇନ୍ ମେଟ୍ରୋ କୋଚର ଫାଟକରେ ଜଣେ ମହିଳାଙ୍କ ଶାଢୀ ଲାଗିଯିବା କାରଣରୁ ଜଣେ ମହିଳା ଦୁର୍ଘଟଣାର ସମ୍ମୁଖୀନ ହୋଇଥିଲେ । ତାଙ୍କୁ ଗୁରୁତର ଭାବରେ ଡାକ୍ତରଖାନାର ଭର୍ତ୍ତି କରାଯାଇଥିଲା । ବର୍ତ୍ତମାନ ଉକ୍ତ ମହିଳାଙ୍କ ମୃତ୍ୟୁ ହୋଇଥିବାର ଖବର ସାମ୍ନାକୁ ଆସିଛି । ବର୍ତ୍ତମାନ ମହିଳାଙ୍କ ମୃତଦେହକୁ ସଫଦରଜଙ୍ଗ ହସ୍ପିଟାଲରେ ବ୍ୟବଚ୍ଛେଦ କରିବା ପାଇଁ ପଠାଯାଇଛି । ସୂଚନା ମୁତାବକ ଆଜି ପୋଷ୍ଟ ମର୍ଟମ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯିବ । 

ମହିଳାଙ୍କ ଦୁର୍ଘଟଣାଜନିତ ମୃତ୍ୟୁ ପରେ ମେଟ୍ରୋ ରେଳ ସୁରକ୍ଷା କମିଶନରଙ୍କ ନେତୃତ୍ୱରେ ତୁରନ୍ତ ଏକ କମିଟି ଗଠନ କରାଯାଇଥିଲା । ଘଟଣାର ତଦନ୍ତ ପାଇଁ ସୁରକ୍ଷା କମିଶନ ନିର୍ଦ୍ଦେଶ ଦେଇଥିଲେ । କମିଟିର ତଦନ୍ତ ରିପୋର୍ଟ ଆସିବା ପୂର୍ବରୁ ମେଟ୍ରୋ ପ୍ରଶାସନ ପକ୍ଷରୁ ବର୍ତ୍ତମାନ କିଛି ସୂଚନା ଦେବାକୁ ମନା କରାଯାଇଛି । ଅନ୍ୟପଟରେ, ନେତାଜୀ ସୁଭାଷ ପ୍ଲେସ ମେଟ୍ରୋ ପୋଲିସ ସିସିଟିଭି ଫୁଟେଜ ମଗାଇଛି ।

ଗୁରୁବାର ରାତି ପ୍ରାୟ ୧ ଟା ବେଳେ ଏହି ଘଟଣା ଘଟିଥିବା କୁହାଯାଉଛି । ଗୁରୁବାର ଅପରାହ୍ନରେ ଇନ୍ଦ୍ରାଲୋକ ମେଟ୍ରୋ ଷ୍ଟେସନରେ ଜଣେ ମହିଳାଙ୍କ ଶାଢୀ ମେଟ୍ରୋ ଫାଟକରେ ଲାଗିଯାଇଥିଲା । ସେହି ସମୟରେ ଟ୍ରେନ୍ ଆଗକୁ ଗଡିବାରେ ଲାଗିଥିଲା । ଏହି କାରଣରୁ ମହିଳା ଜଣକ ଦୀର୍ଘ ସମୟ ଧରି ପ୍ଲାଟଫର୍ମରେ ଘୋଷାଡି ହୋଇଥିଲେ । ଏହି ଦୃଶ୍ୟ ଦେଖିବା ପରେ ଅନ୍ୟ ଯାତ୍ରୀମାନେ ଖୁବ୍ ଜୋରରେ ପାଟି କରିଥିଲେ ମଧ୍ୟ ମେଟ୍ରୋ ବନ୍ଦ ହୋଇନଥିଲା । ପ୍ଲାଟଫର୍ମରେ ଥିବା ଶେଷରେ ଫାଟକକୁ ଧକ୍କା ଦେବା ପରେ ମହିଳା ଜଣକ ଲୁହା ଧାରଣାରେ ପଡ଼ିଯାଇଥିଲେ। ତେଣୁ ମହିଳାଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା।

ଅନ୍ୟ ଟ୍ରାକରେ ଯାଉଥିବା ଟ୍ରେନ୍ ଅପରେଟର ମହିଳାଙ୍କ ଅବସ୍ଥା ଦେଖିବା ପରେ ସେ ତୁରନ୍ତ କଣ୍ଟ୍ରୋଲ ରୁମକୁ ଏହି ବିଷୟରେ ଜଣାଇଥିଲେ। ମେଟ୍ରୋ ଟିମ୍ ଘଟଣାସ୍ଥଳରେ ପହଞ୍ଚି ମହିଳାଙ୍କୁ ସଫଦରଜଙ୍ଗ ଡାକ୍ତରଖାନାକୁ ଚିକିତ୍ସା ପାଇଁ ପଠାଇଥିଲେ । ମୁଣ୍ଡରେ ଗଭୀର ଆଘାତ ଲାଗିବା କାରଣରୁ ମହିଳା ଜଣକ  କୋମାରେ ଥିଲେ । ଚିକିତ୍ସା ଚାଲିବା ସତ୍ୱେ ମହିଳାଙ୍କ ସ୍ୱାସ୍ଥ୍ୟରେ କୌଣସି ଉନ୍ନତି ହୋଇନଥିଲା। ଶନିବାର ଅପରାହ୍ନରେ ଚିକିତ୍ସା ସମୟରେ ମହିଳାଙ୍କ ମୃତ୍ୟୁ ଘଟିଛି । ମହିଳାଙ୍କ ବୟସ ୩୫ ବର୍ଷ ଏବଂ ତାଙ୍କ ନାଁ ରେନା ବୋଲି ଜଣାପଡିଛି। 

ଦିଲ୍ଲୀ ନାଗଲୋଇରେ ଅଞ୍ଚଳରେ ରେନା ତାଙ୍କର ଦୁଇ ଛୋଟ ପିଲାଙ୍କ ସହିତ ରହୁଥିଲେ। ବ୍ରେନ୍ ଟ୍ୟୁମର କାରଣରୁ ତାଙ୍କ ସ୍ୱାମୀ ରବିଙ୍କର ପୂର୍ବରୁ ମୃତ୍ୟୁ ଘଟିଥିଲା । ନିଜ ପିଲାମାନଙ୍କ ପେଟରେ ଦାନା ଦେବା ପାଇଁ ରିନା ରାସ୍ତା କଡରେ ଥିବା ଏକ ପରିବା ଦୋକାନରେ କାମ କରୁଥିଲେ । ଗୁରୁବାର ଦିନ ସେ ତାଙ୍କ ପୁତୁରାଙ୍କ ବିବାହ ଉତ୍ସବରେ ଯୋଗଦେବା ପାଇଁ ବାହାରିଥିଲେ । ଅପରାହ୍ନ ସମୟରେ ନାଙ୍ଗଲୋଇ ଷ୍ଟେସନରୁ ଗ୍ରୀନ୍ ଲାଇନ୍ ମେଟ୍ରୋ ଧରିଥିଲେ । ଇନ୍ଦ୍ରଲୋକ ଷ୍ଟେସନରେ ମେଟ୍ରୋ ରୁଟ୍ ବଦଳାଇ ରେଡ୍ ଲାଇନରେ ଯାତ୍ରା କରୁଥିଲେ ।

ସୂଚନା ମୁତାବକ ସେ ରେଡ୍ ଲାଇନ୍ ଟ୍ରେନ୍ ଧରିବା ସମୟରେ ତାଙ୍କ ପୁଅ ଟିକିଏ ପଛରେ ରହିଯାଇଥିଲେ । ସେ ପୁଅକୁ ଡାକିବା ପାଇଁ ମେଟ୍ରୋ ଟ୍ରେନରୁ ବାହାରି ଆସିଥିଲେ । ଏହି ସମୟରେ ମେଟ୍ରୋର କବାଟ ବନ୍ଦ ହୋଇଯାଇଥିଲା । ଫଳରେ ତାଙ୍କ ଶାଢୀ ମେଟ୍ରୋ ଫାଟକରେ ଲାଗିଯାଇଥିଲା । ଉକ୍ତ ସମୟରେ ମେଟ୍ରୋ ଫାଟକରେ ଲାଗିଥିବା ସେନ୍ସର କାମ କରିନଥିଲା । ଫଳରେ ମେଟ୍ରୋ ଗେଟ୍ ନଖୋଲି ବନ୍ଦ ହୋଇଯାଇଥିଲା । ଗେଟ୍ ବନ୍ଦ ହେବା ମାତ୍ରେ ମେଟ୍ରୋ ଟ୍ରେନ୍ ଗଡିବା ଆରମ୍ଭ କରିଥିଲା । ଶାଢୀ ଲାଗିଯାଇଥିବା କାରଣରୁ ମହିଳା ଜଣକ ପ୍ଲାଟଫର୍ମରେ ଘୋଷାଡି ହୋଇ ବହୁ ଦୂରକୁ ଚାଲିଯାଇଥିଲେ ।