LPG cylinder subsidy: ಇನ್ಮುಂದೆ 600 ರೂ.ಗೆ ಸಿಗಲಿದೆ ‘ಉಜ್ವಲಾ’ ಗ್ಯಾಸ್ ಸಿಲಿಂಡರ್!

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಸಂಪುಟ ಬುಧವಾರ (ಅ.4) ಮಹತ್ವದ ನಿರ್ಧಾರ ಕೈಗೊಂಡಿದೆ. ಉಜ್ವಲ ಯೋಜನೆಯ ಫಲಾನುಭವಿಗಳ ಸಹಾಯಧನವನ್ನು 200 ರೂ.ನಿಂದ 300 ರೂ.ಗೆ  ಹೆಚ್ಚಿಸಿದೆ. ರಕ್ಷಾ ಬಂಧನ ಮತ್ತು ಓಣಂ ಸಂದರ್ಭದಲ್ಲಿ ಎಲ್‌ಪಿಜಿಯಲ್ಲಿ 200 ರೂ. ಕಡಿತಗೊಳಿಸುವುದಾಗಿ ಸಂಪುಟ ಘೋಷಿಸಿತ್ತು. ಇಂದು ಉಜ್ವಲ ಫಲಾನುಭವಿಗೆ ಸಹಾಯಧನವನ್ನು 200 ರೂ.ನಿಂದ 300 ರೂ.ಗೆ ಏರಿಕೆ ಮಾಡಲಾಗಿದೆ.

ಸಂಪುಟ ಸಭೆಯ ನಂತರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ಅನುರಾಗ್ ಠಾಕೂರ್, ‘ಪ್ರಧಾನಿ ಮೋದಿಯವರ ಅಧ್ಯಕ್ಷತೆಯಲ್ಲಿ ಸಂಪುಟ ಸಭೆ ನಡೆದಿದೆ. ರಕ್ಷಾ ಬಂಧನ ಮತ್ತು ಓಣಂ ಸಂದರ್ಭದಲ್ಲಿ ನಾವು ಎಲ್‌ಪಿಜಿ ಸಿಲಿಂಡರ್‌ ಬೆಲೆಯಲ್ಲಿ 200 ರೂ. ಕಡಿತಗೊಳಿಸಿದ್ದೇವೆ. ಈ ಬೆಲೆ 1,100 ರೂ.ನಿಂದ 900 ರೂ.ಗೆ ಇಳಿಕೆಯಾಗಿದೆ. ಪ್ರಸ್ತುತ ಉಜ್ವಲ ಯೋಜನೆಯ ಫಲಾನುಭವಿಗಳಿಗೆ 700 ರೂ.ಗೆ ಗ್ಯಾಸ್ ಸಿಗುತ್ತಿದೆ. ಈಗ ಅವರು 300 ರೂ.ಗಳ ಸಹಾಯಧನ ಪಡೆಯುತ್ತಾರೆ, ಹೀಗಾಗಿ 600 ರೂ.ಗೆ ಅವರಿಗೆ ಗ್ಯಾಸ್ ಸಿಲಿಂಡರ್ ಸಿಗಲಿದೆ’ ಎಂದು ಹೇಳಿದ್ದಾರೆ.

ಉಜ್ವಲಾ ಫಲಾನುಭವಿಗಳು ಪ್ರಸ್ತುತ 14.2 ಕೆಜಿ ಸಿಲಿಂಡರ್‌ಗೆ 703 ರೂ.ಗಳನ್ನು ಪಾವತಿಸುತ್ತಿದ್ದಾರೆ. ಮಾರುಕಟ್ಟೆ ಬೆಲೆ 903 ರೂ.ಗೆ ಹೋಲಿಸಿದರೆ ಕೇಂದ್ರ ಸಚಿವ ಸಂಪುಟದ ನಿರ್ಧಾರದ ನಂತರ ಅವರು ಈಗ 603 ರೂ. ಪಾವತಿಸಬೇಕಾಗುತ್ತದೆ.

ಲೆಕ್ಕಾಚಾರ ಹೇಗಿದೆ..?

• ಮೊದಲು ಗ್ಯಾಸ್ ಸಿಲಿಂಡರ್ ಬೆಲೆ 1,100 ರೂ. ಇತ್ತು

• ರಕ್ಷಾ ಬಂಧನ ಮತ್ತು ಓಣಂ ವೇಳೆ 200 ರೂ. ಕಡಿತವಾಗಿತ್ತು

• 900 ರೂ. ಬೆಲೆಯ ಗ್ಯಾಸ್ ಸಿಲಿಂಡರ್ ಬೆಲೆಗೆ 200 ರೂ. ಸಬ್ಸಿಡಿ

• ಇದೀಗ ಮತ್ತೆ 100 ರೂ. ಸಬ್ಸಿಡಿ ನೀಡಲು ಕೇಂದ್ರ ಸಂಪುಟ ನಿರ್ಧಾರ

• ಉಜ್ವಲ ಯೋಜನೆಯ ಫಲಾನುಭವಿಗಳಿಗೆ ಇದೀಗ 603 ರೂ.ಗೆ ಗ್ಯಾಸ್ ಸಿಲಿಂಡರ್ ಸಿಗುತ್ತದೆ

ಇದನ್ನೂ ಓದಿ: ತಿಂಗಳಿಗೆ ಸಿಗುವುದು 50 ಸಾವಿರ ರೂ. ಪಿಂಚಣಿ ! ಭದ್ರವಾಗಿರುವುದು ವೃದ್ದಾಪ್ಯ ಜೀವನ