Budget 2024 : ವೇತನ ವರ್ಗಕ್ಕೆ ದೊಡ್ಡ ಪರಿಹಾರ : ಸ್ಟ್ಯಾಂಡರ್ಡ್ ಡಿಡಕ್ಷನ್ ಮಿತಿಯಲ್ಲಿ ಬದಲಾವಣೆ?

Budget 2024 : 2024-25 ನೇ ಹಣಕಾಸು ವರ್ಷದ ಬಜೆಟ್ ಅನ್ನು ಫೆಬ್ರವರಿ 1, ರಂದು ಮಂಡಿಸಲಾಗುವುದು. ಈ ವರ್ಷ ಸಾರ್ವತ್ರಿಕ ಚುನಾವಣೆ ನಡೆಯಲಿರುವುದರಿಂದ ಈ ಬಜೆಟ್ ಮಧ್ಯಂತರ ಬಜೆಟ್ ಆಗಲಿದೆ. ಚುನಾವಣೆಯ ನಂತರ ಹೊಸ ಸರ್ಕಾರ ರಚನೆಯಾದ ನಂತರ ಜುಲೈನಲ್ಲಿ ಪೂರ್ಣ ಪ್ರಮಾಣದ ಬಜೆಟ್ ಮಂಡಿಸಲಾಗುವುದು. ಇದು ಮಧ್ಯಂತರ ಬಜೆಟ್ ಆಗಿರುವುದರಿಂದ ಯಾವುದೇ ಪ್ರಮುಖ ಘೋಷಣೆಗಳನ್ನು ನಿರೀಕ್ಷಿಸಲಾಗಿಲ್ಲ.ಆದರೂ ಮತದಾರರನ್ನು ಸೆಳೆಯಲು ಸರ್ಕಾರ ಕೆಲವು ಪ್ರಮುಖ ಘೋಷಣೆಗಳನ್ನು ಮಾಡಬಹುದೆಂದು ಮೂಲಗಳು ಹೇಳುತ್ತವೆ.  

ಬಜೆಟ್ ನಿರೀಕ್ಷೆಗಳು :
ಯಾವುದೇ ಹೂಡಿಕೆ ಮಾಡದೆಯೇ ಹಣವನ್ನು ಉಳಿಸಲು ಸ್ಟ್ಯಾಂಡರ್ಡ್ ಡಿಡಕ್ಷನ್ ಅತ್ಯಂತ ಪ್ರಮುಖ ಮತ್ತು ವ್ಯಾಪಕವಾಗಿ ಬಳಸಲಾಗುವ ವಿಧಾನಗಳಲ್ಲಿ ಒಂದಾಗಿದೆ.ಸ್ಟ್ಯಾಂಡರ್ಡ್ ಡಿಡಕ್ಷನ್ ಮಿತಿಯನ್ನು ಹೆಚ್ಚಿಸುವಂತೆ ವೇತನ ವರ್ಗ ಬಹಳ ದಿನಗಳಿಂದ ಒತ್ತಾಯಿಸುತ್ತಿದೆ. ಕಳೆದ ವರ್ಷ ಹೊಸ ತೆರಿಗೆ ಪದ್ಧತಿಯೊಂದಿಗೆ ಸರ್ಕಾರವು ಸ್ಟ್ಯಾಂಡರ್ಡ್ ಡಿಡಕ್ಷನ್ ಅನ್ನು ಸೇರಿಸಿದಾಗ ಈ ಬೇಡಿಕೆಯು ಇನ್ನಷ್ಟು ಹೆಚ್ಚಾಗಿದೆ. 

ಇದನ್ನೂ ಓದಿ : Arecanut today price January 18: ರಾಜ್ಯದ ಮಾರುಕಟ್ಟೆಯಲ್ಲಿ ಅಡಿಕೆ ಧಾರಣೆ ಮತ್ತಷ್ಟು ಏರಿಕೆ!

ಸ್ಟ್ಯಾಂಡರ್ಡ್ ಡಿಡಕ್ಷನ್ :
ಸ್ಟ್ಯಾಂಡರ್ಡ್ ಡಿಡಕ್ಷನ್ ಅನ್ನು ಪರಿಷ್ಕರಿಸಿ ಸುಮಾರು ಐದು ವರ್ಷಗಳಾಗಿವೆ . ಸ್ಟ್ಯಾಂಡರ್ಡ್ ಡಿಡಕ್ಷನ್ ಅನ್ನು ಕೊನೆಯದಾಗಿ 2019 ರಲ್ಲಿ ಬದಲಾಯಿಸಲಾಗಿದೆ. 2024ರ ಬಜೆಟ್ ಮಧ್ಯಂತರ ಬಜೆಟ್ ಆಗಿ ಉಳಿಯುತ್ತದೆಯಾದರೂ ಮಧ್ಯಮ ವರ್ಗದ ವೇತನದಾರರು ಹೆಚ್ಚಿನ ನಿರೀಕ್ಷೆಗಳನ್ನೂ ಹೊಂದಿದ್ದಾರೆ. ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಕೆಲವು ತೆರಿಗೆಗಳಲ್ಲಿ ರಿಯಾಯಿತಿ ನೀಡಬಹುದು ಎಂದು ನಿರೀಕ್ಷಿಸಲಾಗಿದೆ. ಸಾಮಾನ್ಯ ವೇತನದಾರರು 2024 ರ ಬಜೆಟ್‌ನಲ್ಲಿ ಸ್ಟ್ಯಾಂಡರ್ಡ್ ಡಿಡಕ್ಷನ್ ಅನ್ನು 50,000 ರೂಪಾಯಿಗಳಷ್ಟು ಹೆಚ್ಚಿಸಬೇಕೆಂದು  ಆಗ್ರಹಿಸಿದ್ದಾರೆ. 

ಸ್ಟ್ಯಾಂಡರ್ಡ್ ಡಿಡಕ್ಷನ್ ಎಂದರೇನು? : 
ಸ್ಟ್ಯಾಂಡರ್ಡ್ ಡಿಡಕ್ಷನ್ ಎನ್ನುವುದು ತೆರಿಗೆ ಕಡಿತವಾಗಿದ್ದು, ವೇತನ ವರ್ಗವು ಯಾವುದೇ ಖರ್ಚು ಅಥವಾ ಉಳಿತಾಯವನ್ನು ಲೆಕ್ಕಿಸದೆ ತಮ್ಮ ತೆರಿಗೆಯ ವೇತನದ ಮೇಲೆ ಕ್ಲೈಮ್ ಮಾಡಬಹುದು.ವೇತನ ಮತ್ತು ವ್ಯಾಪಾರ ಆದಾಯ ತೆರಿಗೆ ಪಾವತಿದಾರರ ನಡುವೆ ಸಮತೋಲನವನ್ನು ಸಾಧಿಸುವುದು ಇದರ ಗುರಿಯಾಗಿದೆ. ಪ್ರಸ್ತುತ, ಹಳೆಯ ತೆರಿಗೆ ಪದ್ಧತಿ ಮತ್ತು ಹೊಸ ತೆರಿಗೆ ಪದ್ಧತಿಯ ಅಡಿಯಲ್ಲಿ ಸ್ಟ್ಯಾಂಡರ್ಡ್ ಡಿಡಕ್ಷನ್ ಲಭ್ಯವಿದೆ.

ಇದನ್ನೂ ಓದಿ : ದಾವೋಸ್: ಎನ್.ಟಿ.ಟಿ. ಡೇಟಾದಿಂದ 2 ಬಿಲಿಯನ್ ಡಾಲರ್, ಆ್ಯಬ್ ಸಮೂಹದಿಂದ 400 ಕೋಟಿ ರೂ. ಹೂಡಿಕೆಗೆ ಅಸ್ತು

1974ರಲ್ಲಿ  ಮೊದಲ ಬಾರಿಗೆ ಸ್ಟ್ಯಾಂಡರ್ಡ್ ಡಿಡಕ್ಷನ್ ಪರಿಚಯ : 
ಸ್ಟ್ಯಾಂಡರ್ಡ್ ಡಿಡಕ್ಷನ್ ಅನ್ನು ಭಾರತದಲ್ಲಿ ಮೊದಲು 1974 ರಲ್ಲಿ ಪರಿಚಯಿಸಲಾಯಿತು. ವೇತನ ಪಡೆಯುವವರು ಮತ್ತು ಪಿಂಚಣಿದಾರರಿಗೆ ಅವರ ಕೆಲವು ವೆಚ್ಚಗಳನ್ನು ಭರಿಸಲು ಈ ಕಡಿತವು ಲಭ್ಯವಿತ್ತು. ತೆರಿಗೆಯನ್ನು ಸರಳೀಕರಿಸಲು 2004-2005ರಲ್ಲಿ ಇದನ್ನು ರದ್ದುಗೊಳಿಸಲಾಯಿತು. ಯೂನಿಯನ್ ಬಜೆಟ್ 2018 ರಲ್ಲಿ ಇದನ್ನು ಮರುಪರಿಚಯಿಸಲಾಗಿದೆ. 

ಫೆಬ್ರವರಿ 1, 2019 ರಂದು ಮಂಡಿಸಲಾದ ಮಧ್ಯಂತರ ಬಜೆಟ್‌ನಲ್ಲಿ, ಸ್ಟ್ಯಾಂಡರ್ಡ್ ಡಿಡಕ್ಷನ್ ಮಿತಿಯನ್ನು 50,000 ರೂಪಾಯಿಗೆ ಏರಿಸಲಾಗಿದೆ. ಆದರೆ, ಇದು ಹಳೆಯ ತೆರಿಗೆ ಪದ್ಧತಿಗೆ ಸೀಮಿತವಾಗಿತ್ತು.  2023 ಬಜೆಟ್ ನಲ್ಲಿ ಇದನ್ನು ಹೊಸ ತೆರಿಗೆ ವ್ಯವಸ್ಥೆಯೊಂದಿಗೆ ವಿಲೀನಗೊಳಿಸಲಾಯಿತು. ಹೊಸ ತೆರಿಗೆ ವ್ಯವಸ್ಥೆಯಲ್ಲಿ 50,000 ರೂ. ಫ್ಲಾಟ್ ಕಡಿತವನ್ನು ಅನುಮತಿಸಲಾಗಿದೆ.