Crime News : ಸ್ಲೋ ಪಾಯ್ಸನ್‌ ಕೊಟ್ಟು ಪತಿಯನ್ನು ಕೊಂದ ಪತ್ನಿ

ಮುಂಬೈ: ಕಮಲಾಕಾಂತ್‌ ಷಾ ಎಂದು ಗುರುತಿಸಲಾದ ಸಾಂತಾಕ್ರೂಜ್ ಉದ್ಯಮಿಯೊಬ್ಬರು ತಮ್ಮ ಸ್ವಂತ ಪತ್ನಿ ಮತ್ತು ಆಕೆಯ ಪ್ರಿಯಕರನ ಸಂಚಿಗೆ ಬಲಿಯಾಗಿದ್ದಾರೆ. ಸ್ವಾಭಾವಿಕ ಸಾವಿನಂತೆ ತೋರುತ್ತಿದ್ದ ವ್ಯಕ್ತಿಯ ಸಾವು ನಿಜವಾಗಿಯೂ ಯೋಜಿತ ಕೊಲೆ ಎಂದು ತಿಳಿದು ಮುಂಬೈ ಪೊಲೀಸರು ಆಘಾತಕ್ಕೊಳಗಾಗಿದ್ದಾರೆ. ಮೃತನ ಪತ್ನಿ ತನ್ನ ಪ್ರಿಯಕರನ ಸಹಾಯದಿಂದ ಪತಿಗೆ ‘ಸ್ಲೋ ಪಾಯ್ಸನಿಂಗ್’ ನೀಡಿ ಕೊಲ್ಲುವ ಸಂಚು ರೂಪಿಸಿ, ಆ ಪ್ರಕಾರ ಗಂಡನನ್ನು ಸಾಯಿಸಿದ್ದಾಳೆ. ಮುಂಬೈ ಕ್ರೈಂ ಬ್ರಾಂಚ್ ಪೊಲೀಸರು ಈ ಸಂಬಂಧ ಮಹಿಳೆ ಮತ್ತು ಆಕೆಯ ಪ್ರಿಯಕರನನ್ನು ಬಂಧಿಸಿದ್ದಾರೆ.

ಇದನ್ನೂ ಓದಿ : ಕೂದಲು ಕಸಿ ಚಿಕಿತ್ಸೆ ನಂತರ 30 ವರ್ಷದ ಯುವಕ ಸಾವು

ಪೊಲೀಸರ ಪ್ರಕಾರ, ಕವಿತಾ ಹಾಗೂ ಕಮಲಾಕಾಂತ್‌ ಕೆಲವು ವರ್ಷಗಳ ಹಿಂದೆ ಬೇರ್ಪಟ್ಟಿದ್ದರು. ಆದರೆ ನಂತರ ತಮ್ಮ ಮಗುವಿನ ಭವಿಷ್ಯವನ್ನು ಉಲ್ಲೇಖಿಸಿ ಸಾಂತಾಕ್ರೂಜ್‌ನಲ್ಲಿರುವ ಅವರ ಮನೆಗೆ ತೆರಳಿದ್ದರು. ಕಮಲಾಕಾಂತ್‌ ಅವರು ಸೆಪ್ಟೆಂಬರ್ 3 ರಂದು ಅನಾರೋಗ್ಯಕ್ಕೆ ಒಳಗಾಗಿದ್ದರು ಮತ್ತು ಆಸ್ಪತ್ರೆಗೆ ದಾಖಲಾಗಿದ್ದರು. ಅವರು 17 ದಿನಗಳ ನಂತರ ನಿಧನರಾದರು. ಆರಂಭದಲ್ಲಿ ಇದೊಂದು ಸಹಜ ಸಾವಿನಂತೆ ಕಂಡು ಬಂದ ಕಾರಣ ಪೊಲೀಸರು ಆಕಸ್ಮಿಕ ಸಾವು ಎಂದು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ನಂತರ, ಸಂಚು ಶಂಕಿಸಿ, ತನಿಖೆಯನ್ನು ಅಪರಾಧ ವಿಭಾಗಕ್ಕೆ ಹಸ್ತಾಂತರಿಸಲಾಯಿತು.

ಕ್ರೈಂ ಬ್ರಾಂಚ್ ತನಿಖೆ ಆರಂಭಿಸಿದ್ದು, ಪತ್ನಿ ಸೇರಿದಂತೆ ಕುಟುಂಬದ ಸದಸ್ಯರ ಹೇಳಿಕೆಗಳು ಸೇರಿದಂತೆ ಎಲ್ಲಾ ವೈದ್ಯಕೀಯ ವರದಿಗಳನ್ನು ತೆಗೆದುಕೊಂಡಿದ್ದು, ಕಮಲಾಕಾಂತ್‌ ಅವರ ಆಹಾರಕ್ಕೆ ಸಂಬಂಧಿಸಿದ ಮಾಹಿತಿಯನ್ನು ಸಂಗ್ರಹಿಸಿದ್ದಾರೆ. ತನಿಖೆಯಲ್ಲಿ ಪತ್ನಿ ಮತ್ತು ಆಕೆಯ ಸ್ನೇಹಿತ ಉದ್ದೇಶಪೂರ್ವಕವಾಗಿ ಮೃತನ ಆಹಾರ ಮತ್ತು ನೀರಿನಲ್ಲಿ ಸ್ಲೋ ಪಾಯಿಸನ್‌  ಬೆರೆಸಿ ಆತನನ್ನು ಹಂತಹಂತವಾಗಿ ಸಾಯಿಸಿರುವುದು ಬೆಳಕಿಗೆ ಬಂದಿದೆ.