ದಿ.ಜಯಲಲಿತಾ ರೀತಿ ಕಾಣಿಸಿಕೊಳ್ಳಲು ಕಂಗನಾ ಮಾಡಿದ್ದಾಳೆ ಈ ಕೆಲಸ

ನವದೆಹಲಿ: ಖ್ಯಾತ ರಾಜಕೀಯ ಮುಖಂಡೆಯಾಗಿದ್ದ ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ದಿ. ಜಯಲಲಿತಾ ಅವರ 72ನೇ ಜಯಂತಿಯ ಅಂಗವಾಗಿ ತಮ್ಮ ಮುಂಬರುವ ಚಿತ್ರ 'ಥಲೈವಿ'ಯ ಲುಕ್ ಅನ್ನು ಕಂಗನಾ ರಣಾವತ್ ಹಂಚಿಕೊಂಡಿದ್ದಾರೆ. ಅವರ ಈ ಅವತಾರಕ್ಕೆ ಅಭಿಮಾನಿಗಳು ಭಾರಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಈ ಚಿತ್ರ ಜಯಲಲಿತಾ ಅವರ ಜೀವನಾಧಾರಿತ ಕಥಾಹಂದರ ಹೊಂದಿದ್ದು, ಇದರಲ್ಲಿ ಕಂಗನಾ ಜಯಲಲಿತಾ ಅವರ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಸೋಮವಾರ ಬೆಳಗ್ಗೆ ಚಿತ್ರದ ನಿರ್ಮಾಪಕರು ಚಿತ್ರದ ಮೊದಲ ನೋಟವನ್ನು ಬಿಡುಗಡೆಗೊಳಿಸಿದ್ದಾರೆ. ಈ ಮೊದಲ ನೋಟದಲ್ಲಿ ಚಿತ್ರದಲ್ಲಿ ಪ್ರಮುಖ ಭೂಮಿಕೆಯಲ್ಲಿ ಕಾಣಿಸಿಕೊಂಡಿರುವ ಕಂಗನಾ, ಜಯಲಲಿತಾ ಅವರ ಲುಕ್ ನಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಮೊದಲ ನೋಟದಲ್ಲಿ ಕಂಗನಾ ಬಿಳಿ ಬಣ್ಣದ ಸೇರಿ ತೊಟ್ಟಿದ್ದು, ಕೆಂಪು ಬಣ್ಣದ ಬಿಂದಿ ಹಚ್ಚಿಕೊಂಡಿದ್ದಾರೆ. ಅಷ್ಟೇ ಅಲ್ಲ ಅವರ ಮುಖದ ಮೇಲೆ ಒಂದು ಸುಂದರ ಮುಗುಳುನಗೆ ಕೂಡ ಇದೆ. ಈ ಭಾವಚಿತ್ರದಲ್ಲಿ ಕಂಗನಾ ಡಿಟ್ಟೋ ಜಯಲಲಿತಾ ರೀತಿಯೇ ಕಂಡುಬಂದಿದ್ದಾರೆ. ಕಂಗನಾ ರಣಾವತ್ ತಂಡ ಕೂಡ ಈ ಭಾವಚಿತ್ರವನ್ನು ಹಂಚಿಕೊಂಡಿದೆ.

'ಥಲೈವಿ' ಚಿತ್ರದ ಮೊದಲ ನೋಟ ಕಳೆದ ವರ್ಷ ನವೆಂಬರ್ ನಲ್ಲಿ ಬಿಡುಗಡೆಗೊಳಿಸಲಾಗಿತ್ತು. ಈ ವರ್ಷದ ಜನವರಿಯಲ್ಲಿಯೂ ಕೂಡ ಈ ಚಿತ್ರದ ಇನ್ನೊಂದು ಪೋಸ್ಟರ್ ಬಿಡುಗಡೆಗೊಂಡಿತ್ತು. ಕಳೆದ ವರ್ಷ ಸಂದರ್ಶನವೊಂದರಲ್ಲಿ ಮಾತನಾಡಿದ್ದ ಕಂಗನಾ, ಚಿತ್ರದಲ್ಲಿ ಜಯಲಲಿತಾ ಅವರಂತೆ ಕಾಣಿಸಿಕೊಳ್ಳಲು ತಾವು ಹಾರ್ಮೋನ್ ಪಿಲ್ಲ್ಸ್ ಸೇವಿಸಿರುವುದಾಗಿ  ಹೇಳಿಕೊಂಡಿದ್ದರು. ಈ ಕುರಿತು ಮಾತನಾಡಿದ್ದ ಅವರು ನಾನು ನೋಡಲು ತುಂಬಾ ತೆಳ್ಳಗಾಗಿದ್ದು, ಗೋಲಾಕಾರದ ಮುಖ ಹೊಂದಿರದ ಕಾರಣ ಪಿಲ್ಸ್ ಸೇವಿಸಿ, ತೂಕ ಹೆಚ್ಚಳಕ್ಕೆ ತೂಕ ಹೆಚ್ಚಿಸುವ ಆಹಾರ ಕೂಡ ಸೇವಿಸಿರುವುದಾಗಿ ಹೇಳಿದ್ದರು. ಬರುವ ಜೂನ್ 26ರಂದು ಈ ಚಿತ್ರ ಹಿಂದಿ, ತಮಿಳು ಹಾಗೂ ತೆಲಗೂ ಭಾಷೆಗಳಲ್ಲಿ ಮೂಡಿ ಬರಲಿದೆ.