ತೆಲುಗಿನಲ್ಲಿ ಅಬ್ಬರಿಸಲಿದ್ದಾರೆ ಕನ್ನಡದ ಈ ಇಬ್ಬರು ನಟಿಯರು..!

ಕನ್ನಡದ ನಟ ನಟಿಯರು ಸದ್ಯ ಪರಭಾಷೆಗಳಲ್ಲಿ ಸಖತ್‌ ಮಿಂಚುತ್ತಿದ್ದಾರೆ. ಎಲ್ಲಿ ನೋಡಿದ್ರೂ ಕನ್ನಡಿಗರ ಹವಾ ಜೋರಾಗಿದೆ. ಇದೀಗ ಕನ್ನಡದ ಮತ್ತಿಬ್ಬರು ನಟಿಯರು ತೆಲುಗು ಪ್ರೇಕ್ಷಕರನ್ನ ರಂಜಿಸೋಕೆ ಸಿದ್ಧರಾಗಿದ್ದಾರೆ. ಹೌದು, ನಮ್ಮ ಕನ್ನಡದ ಮುದ್ದು ಮುಖದ ಚೆಲುವೆಯರು ಟಾಲಿವುಡ್‌ ಕಿರುತೆರೆಯಲ್ಲಿ ಅಬ್ಬರಿಸೋಕೆ ಹೋಗುತ್ತಿರೋದು ಪ್ರತಿಯೊಬ್ಬರಿಗೂ ಖುಷಿ ಕೊಟ್ಟಿದೆ. ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಜನಪ್ರಿಯ ಧಾರಾವಾಹಿಗಳ ಪೈಕಿ ‘ನನ್ನರಸಿ ರಾಧೆ’ ಕೂಡ ಒಂದು. ‘ನನ್ನರಸಿ ರಾಧೆ’ ಧಾರಾವಾಹಿಯಲ್ಲಿ ಇಂಚರ ಪಾತ್ರದ ಮೂಲಕ ಕನ್ನಡಿಗರ ಮನೆ ಮನ ಗೆದ್ದಿರುವವರು ನಟಿ ಕೌಸ್ತುಭ ಮಣಿ. ಈ ಗೊಂಬೆ ನಟನೆಗೆ ಪ್ರೇಕ್ಷಕರು ಫಿದಾ ಆಗಿದ್ದಾರೆ. ಆದರಲ್ಲೂ ಇಂಚರ ಹಾಗೂ ಅಗಸ್ತ್ಯ ನಡುವಿನ ಪ್ರೀತಿ, ಕೋಳಿ ಜಗಳ ಎಲ್ಲವೂ ನೋಡುಗರಿಗೆ ಖುಷಿ ನೀಡಿದೆ. ಒಬ್ಬ ಸೊಸೆ ಅಂದ್ರೆ ಹೀಗೇ ಇರಬೇಕು ಎಂಬುದನ್ನ ಇಂಚರ ಪಾತ್ರ ತೋರಿಸಿಕೊಟ್ಟಿದೆ. 

ಇದನ್ನೂ ಓದಿ: ಮೇ 7-8ಕ್ಕೆ YPL ಶುರು: ಇದು ವಿಷ್ಣುದಾದಾ ಅಭಿಮಾನಿಗಳ ಯಜಮಾನ ಪ್ರೀಮಿಯರ್ ಲೀಗ್

ಮೊನ್ನೆ ಮೊನ್ನೆಯಷ್ಟೇ ಇದೇ ನಟಿ ಕೌಸ್ತುಭ ಮಣಿ ಸ್ಯಾಂಡಲ್‌ವುಡ್‌ಗೆ ಪದಾರ್ಪಣೆ ಮಾಡಿದ್ದಾರೆ. ಯುವ ಪ್ರತಿಭೆ ತೇಜ್ ನಟಿಸಿ, ನಿರ್ದೇಶನ ಮಾಡುತ್ತಿರುವ ಬಹುನಿರೀಕ್ಷಿತ ಸಿನಿಮಾ ‘ರಾಮಾಚಾರಿ 2.0’ ಚಿತ್ರಕ್ಕೆ ಇಂಚರ ಖ್ಯಾತಿಯ ಕೌಸ್ತುಭ ಮಣಿ ನಾಯಕಿಯಾಗಿ ಆಯ್ಕೆ ಆಗಿದ್ದಾರೆ. ‘ರಾಮಾಚಾರಿ 2.0’ ಚಿತ್ರದಲ್ಲಿ ಮಾರ್ಗರೇಟ್ ಪಾತ್ರಕ್ಕೆ ಕೌಸ್ತುಭ ಮಣಿ ಜೀವ ತುಂಬಲಿದ್ದಾರೆ ಎಂಬ ಸುದ್ದಿ ಸೋಷಿಯಲ್ ಮೀಡಿಯಾದ ತುಂಬೆಲ್ಲಾ ಹರಿದಾಡುತ್ತಿದೆ. ಕೌಸ್ತುಭ ಅವರ ಬೆಳವಣಿಗೆ ನೋಡಿ ಅಭಿಮಾನಿಗಳು ಸಖತ್‌ ಖುಷಿ ಪಟ್ಟಿದ್ರು. ಇದೀಗ ಕೌಸ್ತುಭ ಮಣಿ ಟಾಲಿವುಡ್‌ಗೆ ಎಂಟ್ರಿ ಕೊಡುತ್ತಿರುವ ಸುದ್ದಿ ಅಭಿಮಾನಿಗಳಿಗೆ ಇನ್ನೂ ಖುಷಿ ನೀಡಿದೆ. 

ಟಾಲಿವುಡ್‌ಗೆ ಹೋಗುತ್ತಿರುವ ಮತ್ತೊಬ್ಬ  ನಟಿ ಅಂದ್ರೆ ಸದ್ಯ  ಉದಯ ಟಿವಿಯಲ್ಲಿ ಪ್ರಸಾರವಾಗುತ್ತಿರುವ ನೇತ್ರಾವತಿ ಧಾರಾವಾಹಿ ಖ್ಯಾತಿಯ ದುರ್ಗಶ್ರೀ. ಹೌದು, ಬಡವರ ಮನೆ ಮಗಳು ಶ್ರೀಮಂತರ ಮನೆಯ ಹುಡುಗನನ್ನು ಇಷ್ಟಪಟ್ಟಾಗ ಆಗುವ ಸಮಸ್ಯೆ ಏನು, ಅವಳು ನಿಜವಾಗಲೂ ಯಾವ ಕುಟುಂಬಕ್ಕೆ ಸೇರಿದವಳು ಎಂಬ ಹಿಂದಿನ ರಹಸ್ಯ ಹೊಂದಿರುವ ನೇತ್ರಾವತಿ ಧಾರಾವಾಹಿಯಲ್ಲಿ ದುರ್ಗಶ್ರೀ ಪಾತ್ರ ನೋಡಿ ಪ್ರೇಕ್ಷಕರು ಮೆಚ್ಚಿಕೊಂಡಿದ್ದಾರೆ. ಸದ್ಯ ಈ ನಟಿ ತೆಲುಗಿಗೆ ಎಂಟ್ರಿ ಕೊಟ್ಟಿರೋದು ಪ್ರತಿಯೊಬ್ಬರಿಗೂ ಖುಷಿ ನೀಡಿದೆ. 

ಈ ಇಬ್ಬರೂ ನಟಿಯರು ಜೀ ತೆಲುಗಿನಲ್ಲಿ ಲಾಂಚ್‌ ಆಗಲಿರುವ  ಕೋಡಲು ಮೀಕು ಜೋರ್ಹಲು ಎಂಬ ಹೊಸ ಧಾರಾವಾಹಿಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ವಿಶೇಷ ಅಂದ್ರೆ ಈ ಧಾರಾವಾಹಿಯಲ್ಲಿ ಇಬ್ಬರು ನಾಯಕಿಯರಿದ್ದು, ಇದು ಸೊಸೆಯರ ಸುತ್ತ ಹೆಣೆದಿರುವ ಕಥೆಯಾಗಿದೆ. ಇನ್ನು ಒಂದೇ ಧಾರಾವಾಹಿಯಲ್ಲಿ ಕನ್ನಡದ ಇಬ್ಬರು ನಟಿಯರು ಕಾಣಿಸಿಕೊಳ್ಳುತ್ತಿರುವುದು ಕನ್ನಡಿಗರಿಗೆ ಹೆಮ್ಮೆಯ ವಿಚಾರ.

ಇನ್ನು ತಮ್ಮ ಹೊಸ ಪ್ರಾಜೆಕ್ಟ್‌ ಬಗ್ಗೆ ನಟಿ ದುರ್ಗಶ್ರೀ ಒಂದಿಷ್ಟು ಮಾಹಿತಿ ಹಂಚಿಕೊಂಡಿದ್ದಾರೆ. ನನಗೆ ನನ್ನ ಪಾತ್ರ ಖುಷಿ ಕೊಟ್ಟಿದೆ. ತೆಲುಗು ಭಾಷೆ ಬರಲ್ಲ. ಆದ್ರೂ ಕೂಡ ನನ್ನ ಟೀಮ್‌ ನನಗೆ ತುಂಬಾನೇ ಸಪೋರ್ಟ್‌ ಮಾಡ್ತಿದೆ. ವಿಶೇಷ ಅಂದ್ರೆ ಈ ಧಾರಾವಾಹಿಯಲ್ಲಿ ಮತ್ತೊಂದು ನಟಿ ಇರ್ತಾರೆ ಎಂಬ ವಿಚಾರ ತಿಳಿದಿತ್ತು. ಆದ್ರೆ ಕನ್ನಡದ ಕೌಸ್ತುಭ ಮಣಿ ಅಂತ ತಿಳಿದಿರಲಿಲ್ಲ. ಆದ್ರೆ ಈ ವಿಚಾರ ತಿಳಿದಾಗ ಕೊಂಚ ಶಾಕ್‌ ಹಾಗೂ ಸಖತ್‌ ಖುಷಿಯಾಯ್ತು . ನನ್ನ ನೇತ್ರಾವತಿ ಟೀಮ್‌ ಕೂಡ ತುಂಬಾ ಸಪೋರ್ಟ್‌ ಮಾಡಿದೆ. ಎರಡು ಕಡೆ ಶೂಟ್‌ ಇರೋದ್ರಿಂದ ಬ್ಯಾಲೆನ್ಸ್‌ ಮಾಡಿಕೊಂಡು ಹೋಗ್ತಿನಿ ಎಂಬ ಮಾತುಗಳನ್ನಾಡಿದ್ದಾರೆ.

ಇದನ್ನೂ ಓದಿ: ರವಿಚಂದ್ರನ್‌ ಪುತ್ರನ ʻವಿವಾಹ ಆಹ್ವಾನʼ ಪತ್ರಿಕೆ! ಇಲ್ಲಿದೆ ವೈರಲ್ ಫೋಟೋದ ಅಸಲಿಯತ್ತು

ಇನ್ನು ಕೌಸ್ತುಭ ಮಣಿ ಕೂಡ ತಮ್ಮ ಹೊಸ ಪ್ರಾಜೆಕ್ಟ್‌ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ. ಹೊಸ ಪಾತ್ರದ ಬಗ್ಗೆ ತುಂಬಾ ಎಕ್ಸೈಟ್‌ಮೆಂಟ್‌ ಇದೆ. ಅದರ ಜೊತೆಗೆ ಅಷ್ಟೇ ಭಯ ಕೂಡ ಇದೆ. ಕನ್ನಡದ ಜನ ನನ್ನ ಹರಸಿ ಬೆಳೆಸಿದ್ದಾರೆ. ಅದೇ ಪ್ರೀತಿ ಮುಂದೆ ಕೂಡ ಸಿಗಲಿ ಅನ್ನೋದು ನನ್ನ ಆಶಯ ಎಂದಿದ್ದಾರೆ. ಒಟ್ಟಿನಲ್ಲಿ ಕನ್ನಡದ ನಟಿಯರು ಒಂದೇ ಧಾರಾವಾಹಿಯಲ್ಲಿ ಮಿಂಚೋಕೆ ರೆಡಿಯಾಗಿರೋದು ಪ್ರೇಕ್ಷಕರಿಗೆ ಸಂತಸ ತಂದಿದೆ. ತೆಲುಗು ನಾಡಿನಲ್ಲಿ ಕನ್ನಡಿಗರು ಇನ್ನೂ ದೊಡ್ಡ ಮಟ್ಟದಲ್ಲಿ ಬೆಳೆಯಲಿ ಎಂಬುದು ಪ್ರತಿಯೊಬ್ಬರ ಹಾರೈಕೆಯಾಗಿದೆ.