ಮೆಗಾಸ್ಟಾರ್‌ ಫ್ಯಾಮಿಲಿಯಲ್ಲಿ ಕಳೆಗಟ್ಟಿದ ವರುಣ್‌-ಲಾವಣ್ಯ ಮದುವೆ ಸಂಭ್ರಮ..!

Varun tej Lavanya tripathi marriage : ಇಡೀ ಮೆಗಾ ಫ್ಯಾಮಿಲಿ ಒಂದೇ ಕಡೆ ಜಮಾಯಿಸಿದ್ದು, ನಟ ವರುಣ್‌ ತೇಜ್‌ ಮತ್ತು ನಟಿ ಲಾವಣ್ಯ ತ್ರಿಪಾಠಿ ವಿವಾಹಪೂರ್ವ ಸಂಭ್ರಮಾಚರಣೆಯಲ್ಲಿ ಮುಳುಗಿದೆ. ಈ ವರ್ಣರಂಜಿತ ಕಾರ್ಯಕ್ರಮದಲ್ಲಿ ಮೆಗಾಸ್ಟಾರ್ ಚಿರಂಜೀವಿ ದಂಪತಿ ಮತ್ತು ನಾಗಬಾಬು ದಂಪತಿ ಜೊತೆಗೆ ಎಲ್ಲಾ ಮೆಗಾ ಹೀರೋಗಳು ಭಾಗವಹಿಸಿದ್ದರು. ಈ ಕುರಿತು ಫೋಟೋಗಳು ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ.

ಹೌದು.. ಟಾಲಿವುಡ್‌ ನಟ ವರುಣ್ ತೇಜ್ ಮತ್ತು ಲಾವಣ್ಯ ತ್ರಿಪಾಠಿ ಸಪ್ತಪದಿ ತುಳಿಯಲಿದ್ದಾರೆ. ಇತ್ತೀಚೆಗಷ್ಟೇ ಇವರಿಬ್ಬರ ನಿಶ್ಚಿತಾರ್ಥ ನಾಗಬಾಬು ಅವರ ಮನೆಯಲ್ಲಿ ಅದ್ಧೂರಿಯಾಗಿ ನೆರವೇರಿತ್ತು. ಈಗ ಇಡೀ ಮೆಗಾ ಫ್ಯಾಮಿಲಿ ಈ ಸ್ಟಾರ್‌ ಜೋಡಿಯ ಮದುವೆಯ ಸಡಗರದಲ್ಲಿದೆ. 

ʼಮಿಸ್ಟರ್ʼ ಸಿನಿಮಾದಲ್ಲಿ ವರುಣ್ ತೇಜ್ ಲಾವಣ್ಯ ತ್ರಿಪಾಠಿ ಜೊತೆ ನಟಿಸಿದ್ದರು. ಈ ಸಿನಿಮಾವನ್ನು ಇಟಲಿಯಲ್ಲಿ ಚಿತ್ರೀಕರಿಸಲಾಗಿತ್ತು. ಆ ಸಮಯದಲ್ಲಿ ಇವರಿಬ್ಬರ ಲವ್ ಟ್ರ್ಯಾಕ್ ಓಡುತ್ತಿತ್ತು. ಸಿನಿಮಾ ಯಶಸ್ಸು ಕಾಣದಿದ್ದರೂ ಜೋಡಿಯ ಪ್ರೀತಿ ಅರಳಿತ್ತು. ಅದರಂತೆ ಕುಟುಂಬದ ಸಮ್ಮುಖದಲ್ಲಿ ಜೂನ್ 9 ರಂದು ನಿಶ್ಚಿತಾರ್ಥ ಮಾಡಿಕೊಂಡರು. 

ಇತ್ತೀಚೆಗಷ್ಟೇ ಮೆಗಾ ಪವರ್ ಸ್ಟಾರ್ ರಾಮ್ ಚರಣ್ ಮಗಳ ಜನನದಿಂದ ಚಿರು ಕುಟುಂಬದಲ್ಲಿ ಸಂಭ್ರಮ ಮನೆಮಾಡಿತ್ತು, ಇದೀಗ ವರುಣ್‌ ತೇಜ್‌ ಮದುವೆ ಈ ಸಂಭ್ರಮವನ್ನು ಹೆಚ್ಚಿಸಿದೆ. ಸಧ್ಯ ಚಿರಂಜೀವಿ ಅವರು ವರುಣ್ ತೇಜ್-ಲಾವಣ್ಯ ವಿವಾಹ ಪೂರ್ವ ಸಂಭ್ರಮದ ಚಿತ್ರಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದಾರೆ. ಈ ಫೋಟೋಗಳು ಈಗ ಮೆಗಾ ಅಭಿಮಾನಿಗಳಲ್ಲಿ ಸಂತಸ ತಂದಿದೆ.