ಉತ್ತರ ಪ್ರದೇಶದ ಕುಶಿನಗರದಲ್ಲಿ ಐಎಎಫ್‌ನ ಜಗ್ವಾರ್ ವಿಮಾನ ಪತನ

ಭಾರತೀಯ ವಾಯುಪಡೆಯ (ಐಎಎಫ್) ಜಗ್ವಾರ್ ವಿಮಾನ  ಸೋಮವಾರ ಉತ್ತರಪ್ರದೇಶದ ಕುಶಿನಗರದಲ್ಲಿ ಪತನಗೊಂಡಿದ್ದು, ಉತ್ತರ ಪ್ರದೇಶ ರಾಜಧಾನಿ ಲಕ್ನೋದಿಂದ ಸುಮಾರು 300 ಕಿ.ಮೀ. ದೂರದಲ್ಲಿ ಈ ಘಟನೆ ಸಂಭವಿಸಿದೆ. ಫ್ಲೈಟ್ ಭೂಮಿಗೆ ಅಪ್ಪಳಿಸಿದೊಡನೆ ಬೆಂಕಿ ಹೊತ್ತಿಕೊಂಡಿದೆ. ವಿಮಾನ ಪತನಕ್ಕೂ ಮೊದಲೇ ಪೈಲಟ್ ಪ್ಯಾರಾಚೂಟ್ ಸಹಾಯದಿಂದ ಧುಮುಕಿ ಪ್ರಾಣ ರಕ್ಷಣೆ ಮಾಡಿಕೊಂಡಿದ್ದಾರೆ. 

ಗೋರಖ್ಪುರ ಏರ್ ಫೋರ್ಸ್ ಬೇಸ್ನಿಂದ ಈ ಫೈಟರ್ ವಿಮಾನವು ಹೊರಟಿತು. ಅಪಘಾತಕ್ಕೆ ಒಳಗಾಗಿರುವ ಈ ಜಗ್ವಾರ್ ಫೈಟರ್ ತನ್ನ ವಾಡಿಕೆಯ ಕಾರ್ಯಾಚರಣೆಯಲ್ಲಿತ್ತು ಎಂದು ಐಎಎಫ್ ತಿಳಿಸಿದೆ. ಈ ಘಟನೆಯನ್ನು ತನಿಖೆ ಮಾಡಲು ಆದೇಶಿಸಲಾಗಿದೆ.

ಈ ಘಟನೆಯ ಸುದ್ದಿ ಮತ್ತು ಸ್ಫೋಟದ ಶಬ್ದದ ಬಳಿಕ ಸಮೀಪದ ಗ್ರಾಮಸ್ಥರು ಗುಂಪು ಸೇರಿದ್ದಾರೆ. ಆದಾಗ್ಯೂ, ಅಪಘಾತದ ಕಾರಣ ಏನು ಎಂಬುದು ಅಸ್ಪಷ್ಟವಾಗಿದೆ. ಘಟನೆಯ ಬಗ್ಗೆ ಮಾಹಿತಿ ತಿಳಿದ ಪೊಲೀಸರು ತಕ್ಷಣ ಸ್ಥಳಕ್ಕೆ ತಲುಪಿದರು. ಅಪಘಾತದಲ್ಲಿ ಯಾವುದೇ ಸಾವುನೋವುಗಳ ಬಗ್ಗೆ ವರದಿಯಾಗಿಲ್ಲ.