ದೆಹಲಿಯ AIIMS ನಲ್ಲಿ Covaxin ಲಸಿಕೆಯ ಮಾನವ ಪರೀಕ್ಷೆ ಆರಂಭ, 30 ವರ್ಷದ ವ್ಯಕ್ತಿಗೆ ಮೊದಲ ಡೋಸ್

ನವದೆಹಲಿ: ಕರೋನಾ ವೈರಸ್ ಸೋಂಕಿತರ ಸಂಖ್ಯೆಯಲ್ಲಿ ನಿರಂತರ ಏರಿಕೆಯಾಗುತ್ತಿರುವುದರ ನಡುವೆ, ವಿಶ್ವಾದ್ಯಂತ ತಜ್ಞರು ಕರೋನಾ ವೈರಸ್ ಲಸಿಕೆ ಕುರಿತು ಸಂಶೋಧನೆ ನಡೆಸುತ್ತಿದ್ದಾರೆ. ಕೋವಿಡ್ -19 ಲಸಿಕೆ ಯಾವಾಗ ಬರಲಿದೆ ಮತ್ತು ಈ ಬಿಕ್ಕಟ್ಟಿನಿಂದ ಯಾವಾಗ ಪಾರಾಗಬಹುದು ಎಂಬುದಕ್ಕೆ ಎಲ್ಲರೂ ಕಾಯುತ್ತಿದ್ದಾರೆ. ಏತನ್ಮಧ್ಯೆ, ಭಾರತವೂ ಈ ದಿಕ್ಕಿನಲ್ಲಿ ಹೆಜ್ಜೆ ಇಟ್ಟಿದೆ. ಈ ಹಿನ್ನೆಲೆಯಲ್ಲಿ ಇಂದು ಕರೋನಾ ಲಸಿಕೆಯ ಕುರಿತು ಒಂದು ಮಹತ್ವದ ಸುದ್ದಿ ಪ್ರಕಟಗೊಂಡಿದೆ. ದೆಹಲಿಯ AIIMS ನಲ್ಲಿ ಭಾರತದಲ್ಲಿ ತಯಾರಾದ ಕೋವಾಕ್ಸಿನ್ ಲಸಿಕೆಯ ಮಾನವ ಪ್ರಯೋಗ ಆರಂಭಗೊಂಡಿದೆ.

ದೆಹಲಿಯ AIIMS ನಲ್ಲಿ ಕೊರೊನಾ ವೈರಸ್ ನ ಮೊದಲ ಡೋಸ್ ಅನ್ನು 30 ವರ್ಷದ ವ್ಯಕ್ತಿಯೋರ್ವನಿಗೆ ನೀಡಲಾಗಿದೆ. ವರದಿಗಳ ಪ್ರಕಾರ, ಯಾವ ವ್ಯಕ್ತಿಯ ಮೇಲೆ ಈ ಲಸಿಕೆಯನ್ನು ಪ್ರಯೋಗಿಸಲಾಗಿದೆಯೋ ಆ ವ್ಯಕ್ತಿಯನ್ನು ಆಸ್ಪತ್ರೆಯಲ್ಲಿಯೇ ಇರಿಸಿ ಆತನ ಮೇಲೆ ನಿಗಾ ವಹಿಸಲು ಆಸ್ಪತ್ರೆಯ ಆಡಳಿತ ಮಂಡಳಿ ನಿರ್ಧರಿಸಿದೆ ಎನ್ನಲಾಗಿದೆ. ಈ ಲಸಿಕೆ ಆ ವ್ಯಕ್ತಿಯಲ್ಲಿ ಯಾವ ರೀತಿಯ ಬದಲಾವಣೆಗಳನ್ನು ತರಲಿದೆ ಎಂಬುದನ್ನು ಅಧ್ಯಯನ ನಡೆಸಲಾಗುವುದು ಎನ್ನಲಾಗಿದೆ.

ದೇಶಾದ್ಯಂತ ಒಟ್ಟು 375 ಜನರನ್ನು ಕೊವ್ಯಾಕ್ಸಿನ್ ಟ್ರಯಲ್ ಗಾಗಿ ಆಯ್ಕೆ ಮಾಡಲಾಗಿದೆ. ಇವರಲ್ಲಿ ಒಟ್ಟು 100 ಜನರಿಗೆ ದೆಹಲಿಯ ಎಮ್ಸ್ ನಲ್ಲಿ ಈ ವ್ಯಾಕ್ಸಿನ್ ನ ಡೋಸ್ ನೀಡಲಾಗುತ್ತಿದೆ. ಉಳಿದ ಜನರಿಗೆ ದೇಶದ ವಿವಿಧ ಮೆಡಿಕಲ್ ಸಂಸ್ಥೆಗಳಲ್ಲಿ ಈ ದೇಸೀಯ ವೈರಸ್ ನ ಡೋಸ್ ನೀಡಲಾಗುತ್ತಿದೆ. 

ಮೂಲಗಳಿಂದ ದೊರೆತ ಮಾಹಿತಿಗಳ ಪ್ರಕಾರ ಕೊವ್ಯಾಕ್ಸಿನ್ ಟ್ರಯಲ್ ಒಟ್ಟು ಎರಡು ಹಂತಗಳಲ್ಲಿ ನಡೆಯಲಿದೆ. ಮೊದಲ ಹಂತ 18 ರಿಂದ 55 ವರ್ಷ ವಯಸ್ಸಿನ ವ್ಯಕ್ತಿಗಳ ಮೇಲೆ ನಡೆಯಲಿದ್ದರೆ. ಎರಡನೇ ಹಂತದಲ್ಲಿ 65 ವರ್ಷಗಳವರೆಗಿನ ವ್ಯಕ್ತಿಗಳಿಗೆ ಈ ಲಸಿಕೆ ನೀಡಲಾಗುತ್ತಿದೆ.

ವಿಶ್ವಾದ್ಯಂತ ಕೊರೊನಾ ವೈರಸ್ ಲಸಿಕೆಯ ಕುರಿತು ಸಂಶೋಧನೆಗಳು ಮುಂದುವರೆದಿವೆ. ಇದಕ್ಕೆ ಸಂಬಂಧಿಸಿದಂತೆ ಅಂಕಿ-ಅಂಶಗಳನ್ನು ಬಿಡುಗಡೆ ಮಾಡಿರುವ ವಿಶ್ವ ಆರೋಗ್ಯ ಸಂಸ್ಥೆ, ಪ್ರಸ್ತುತ ಸುಮಾರು 15೦ ವ್ಯಾಕ್ಸಿನ್ ಗಳು ಅಭಿವೃದ್ಧಿಯ ವಿವಿಧ ಹಂತಗಳಲ್ಲಿವೆ ಎಂದಿದ್ದು, ಇವುಗಳಲ್ಲಿ 10 ವ್ಯಾಕ್ಸಿನ್ ಗಳು ಅಡ್ವಾನ್ಸ್ಡ್ ಹಂತಕ್ಕೆ ತಲುಪಿದ್ದು, ವೈರಸ್ ಗೆ ಶೀಘ್ರದಲ್ಲಿಯೇ ಲಸಿಕೆ ಸಿದ್ಧಗೊಳ್ಳಲಿದೆ ಎಂಬುದನ್ನು ನಿರೀಕ್ಷಿಸಲಾಗುತ್ತಿದೆ.