ದೆಹಲಿ: ಪೀಠೋಪಕರಣ ಅಂಗಡಿ ಅಗ್ನಿಗಾಹುತಿ, ಇಬ್ಬರು ಮಕ್ಕಳ ಸಾವು

ನವದೆಹಲಿ: ಮಂಗಳವಾರ ದೆಹಲಿಯ ಶಹೀನ್ ಬಾಗ್ನಲ್ಲಿ ನಾಲ್ಕು ಅಂತಸ್ತಿನ ಕಟ್ಟಡದಲ್ಲಿ ಅಗ್ನಿ ಅನಾಹುತ ಸಂಭವಿಸಿದ್ದು, ಇಬ್ಬರು ಮಕ್ಕಳು ಮೃತಪಟ್ಟಿದ್ದಾರೆ.

ಆಗ್ನೇಯ ದೆಹಲಿಯಲ್ಲಿರುವ ಅಬು ಫಜಲ್ ಎನ್ಕ್ಲೇವ್ನಲ್ಲಿರುವ ಪೀಠೋಪಕರಣ ಅಂಗಡಿಯೊಂದರಲ್ಲಿ ಬೆಂಕಿ ಕಾಣಿಸಿಕೊಂಡಿದ್ದು, ಆರು ವರ್ಷದ ಓರ್ವ ಬಾಲಕ ಮತ್ತು ಏಳು ವರ್ಷದ ಓರ್ವ ಬಾಲಕ ಈ ಅಗ್ನಿ ಅನಾಹುತದಲ್ಲಿ ಸಾವನ್ನಪ್ಪಿದ್ದಾರೆ ಎಂದು ವರದಿಗಳು ತಿಳಿಸಿವೆ.

"ಇದು ನಾಲ್ಕು ಅಂತಸ್ತಿನ ಕಟ್ಟಡವಾಗಿದ್ದು, ನೆಲಮಾಳಿಗೆಯಲ್ಲಿ ವಾಸಿಸುವ ಕುಟುಂಬವು ಪೀಠೋಪಕರಣ ಅಂಗಡಿಯನ್ನೂ ನಡೆಸುತ್ತಿತ್ತು" ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಪಿಟಿಐಗೆ ತಿಳಿಸಿದರು.

ಈ ಅಗ್ನಿ ಅನಾಹುತದ ಬಗ್ಗೆ ಮಧ್ಯಾಹ್ನ 1.30ರ ವೇಳೆಗೆ ಅಗ್ನಿಶಾಮಕ ಇಲಾಖೆಗೆ ಕರೆ ಬಂದಿದೆ ಎನ್ನಲಾಗಿದೆ.