52 ಚೀನಾ ಆಪ್ ಗಳನ್ನು ತೆಗೆದುಹಾಕಲು STF ಆದೇಶ

ನವದೆಹಲಿ:ಉತ್ತರ ಪ್ರದೇಶದ ವಿಶೇಷ ತನಿಖಾ ತಂಡ ತನ್ನ ನೌಕರಿಗೆ ಕಾನ್ಫಿಡೆನ್ಸಿಯಲ್ ಪತ್ರವೊಂದನ್ನು ರವಾನಿಸಿ ತಮ್ಮ ತಮ್ಮ ಮೊಬೈಲ್ ಬಳಲ್ಲಿನ 52 ಚೈನೀಸ್ ಆಪ್ ಗಳನ್ನು ತೆಗೆದು ಹಾಕಲು ನಿರ್ದೇಶನ ನೀಡಿದೆ. ಈ ಅಲ್ಲ 52 ಚೈನೀಸ್ ಆಪ್ ಗಳನ್ನು ಆದಷ್ಟು ಶೀಘ್ರದಲ್ಲಿಯೇ ಸ್ಮಾರ್ಟ್ ಫೋನ್ ನಿಂದ ತೆಗೆದುಹಾಕಲು STF ಆದೇಶ ಜಾರಿಗೊಳಿಸಿದೆ.

STF IG ಅಮಿತಾಭ್ ಯಶ್ ಅವರು ಮೊಬೈಲ್ ನಿಂದ ಈ 52 ಆಪ್ ಗಳನ್ನು ತೆಗೆದುಹಾಕಲು ಆದೇಶ ನೀಡಿದ್ದಾರೆ ಎನ್ನಲಾಗಿದೆ. STF ಸಿಬ್ಬಂದಿ ಹಾಗೂ ಅವರ ಸಂಬಂಧಿಕರು ಈ ಆಪ್ ಗಳನ್ನು ತೆಗೆದುಹಾಕಲು ಈ ಆದೇಶ ನೀಡಿದ್ದಾರೆ. ಕೇಂದ್ರ ಗೃಹ ಇಲಾಖೆಯ ಗೈಡ್ ಲೈನ್ಸ್ ಬಳಿಕ STF ವತಿಯಿಂದ ಈ ಆದೇಶ ಜಾರಿಗೊಳಿಸಲಾಗಿದೆ. ಈ ಆಪ್ ಗಳನ್ನು ಬಳಸಿ ವೈಯಕ್ತಿಕ ಮಾಹಿತಿ ಹಾಗೂ ಇತರೆ ಡೇಟಾ ಕಳುವು ಮಾಡಲಾಗಿದೆ ಎಂಬ ಸಂಶಯ ವ್ಯಕ್ತಪಡಿಸಲಾಗಿದೆ.

ಇದಕ್ಕೂ ಮೊದಲು ಭಾರತೀಯ ಗುಪ್ತಚರ ಇಲಾಖೆ ಒಟ್ಟು 52 ಆಪ್ ಗಳ ಪಟ್ಟಿಯನ್ನು ಭಾರತ ಸರ್ಕಾರಕ್ಕೆ ನೀಡಿದ್ದು, ಈ ಆಪ್ ಗಳು ಚೀನಾ ಜೊತೆ ಸಂಪರ್ಕಹೊಂದಿವೆ ಎಂದು ಹೇಳಿದೆ. ಅಷ್ಟೇ ಅಲ್ಲ ಈ ಆಪ್ ಗಳನ್ನು ಬ್ಲಾಕ್ ಮಾಡುವಂತೆ ಕೋರಿತ್ತು. ಏಪ್ರಿಲ್ ತಿಂಗಳಿನಲ್ಲಿ ಈ ಪಟ್ಟಿಯನ್ನು ಸಿದ್ಧಪಡಿಸಲಾಗಿದ್ದು, ಈ ಲಿಸ್ಟ್ ನಲ್ಲಿ ಟಿಕ್ ಟಾಕ್, ಝೂಮ್, ಯುಸಿ ಬ್ರೌಸರ್, ಕ್ಲೀನ್ ಮಾಸ್ಟರ್, ಜೆಂಡರ್ ಹಾಗೂ ಶೇರ್ ಇಟ್ ಗಳಂತಹ ಜನಪ್ರೀಯ ಆಪ್ ಗಳು ಶಾಮೀಲಾಗಿವೆ.

ಆದರೆ, ಸರ್ಕಾರದವತಿಯಿಂದ ಇದುವರೆಗೆ ಈ ಆಪ್ ಗಳನ್ನು ಬ್ಲಾಕ್ ಮಾಡಲು ಅಥವಾ ಬಳಕೆ ಮಾಡಲು ಯಾವುದೇ ರೀತಿಯ ಅಧಿಕೃತ ಹೇಳಿಕೆ ಪ್ರಕಟವಾಗಿಲ್ಲ. ಏಕೆಂದರೆ ಭಾರತದಲ್ಲಿ ಈ ಆಪ್ ಗಳು ಕೋಟ್ಯಂತರ ಬಳಕೆದಾರರನ್ನು ಹೊಂದಿವೆ. ಈ ಆಪ್ ಗಳು ದಿನನಿತ್ಯ ಭಾರತೀಯ ಬಳಕೆದಾರರ ಡೇಟಾ ಅನ್ನು ಚೀನಾದಲ್ಲಿ ಸ್ಥಾಪಿಸಲಾಗಿರುವ ಸರ್ವರ್ಗಳಿಗೆ ಸವಾನಿಸುತ್ತವೆ ಎಂಬ ಆರೋಪವಿದೆ.

ಗುಪ್ತಚರ ಇಲಾಖೆ ಸಿದ್ಧಪಡಿಸಿರುವ ಈ ಪಟ್ಟಿಯಲ್ಲಿ ಒಟ್ಟು ಐದು ವಿಡಿಯೋ ಶೇರಿಂಗ್ ಆಪ್ ಗಳಿವೆ. ಇಲ್ಲಿ ಆಶ್ಚರ್ಯದ ಸಂಗತಿ ಎಂದರೆ, ಚೈನಾ ಮೊಬೈಲ್ ತಯಾರಕ ಕಂಪನಿಗಳು ಈ ಐದು ಆಪ್ ಗಳಲ್ಲಿ ಒಂದನ್ನಾದರೂ ಇನ್ ಬಿಲ್ಟ್ ರೂಪದಲ್ಲಿ ನೀಡುತ್ತವೆ. ಟಿಕ್ ಟಾಕ್, ವಿಗೋ ವಿಡಿಯೋ, ಬಿಗೋ ಲೈವ್, ವೆಬೋ, ವಿ ಚಾಟ್, ಹಲೋ ಹಾಗೂ ಲೈಕ್ ಗಳು ಸೇರಿದಂತೆ ಹಲವು ಆಪ್ ಗಳೂ ಕೂಡ ಇವುಗಳಲ್ಲಿ ಶಾಮೀಲಾಗಿವೆ.