ಡಿಕೆಶಿ ಭ್ರಷ್ಟಾಚಾರದ ಹಣದಿಂದಲೇ ರಾಜ್ಯ ಕಾಂಗ್ರೆಸ್ ಉಸಿರಾಡುತ್ತಿದೆ: ಬಿಜೆಪಿ

ಬೆಂಗಳೂರು: ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್ ಭ್ರಷ್ಟಾಚಾರದ ಹಣದಿಂದಲೇ ರಾಜ್ಯ ಕಾಂಗ್ರೆಸ್‌ ಉಸಿರಾಡುತ್ತಿದೆ ಎಂದು ಬಿಜೆಪಿ ಆರೋಪಿಸಿದೆ. ಶುಕ್ರವಾರ ಸರಣಿ ಟ್ವೀಟ್ ಮಾಡಿರುವ ಬಿಜೆಪಿ, ‘ಡಿಕೆಶಿ ರಾಜ್ಯ ಕಂಡ ಕಡುಭ್ರಷ್ಟ ಎನ್ನುವುದರಲ್ಲಿ ಅತಿಶಯವಿಲ್ಲ’ವೆಂದು ಟೀಕಿಸಿದೆ.

‘ಕೆಪಿಸಿಸಿ ಅಧ್ಯಕ್ಷರ ಪರ್ಸೆಂಟೇಜ್ ವ್ಯವಹಾರ, ಡೀಲ್, ಲೆಕ್ಕಕ್ಕೆ ಸಿಗದ ಸುಳ್ಳು ಲೆಕ್ಕಾಚಾರಗಳೆಲ್ಲವನ್ನೂ ಕಾಂಗ್ರೆಸ್‌ ನಾಯಕರು ಕೆಪಿಸಿಸಿ ಕಚೇರಿಯಿಂದಲೇ ಬಹಿರಂಗಗೊಳಿಸಿದ್ದರು. ಡಿಕೆಶಿಯವರೇ ನೀವು ಸಚ್ಚಾರಿತ್ರನಂತೆ ವರ್ತಿಸಬೇಡಿ. ನೀವು ಹೇಗಿದ್ದಿರಿ, ಹೇಗಾದಿರಿ, ಏನು ಮಾಡಿದ್ದೀರಿ ಎಂಬುದು ರಾಜ್ಯದ ಜನತೆಗೆ ತಿಳಿದಿದೆ. ಕೆಪಿಸಿಸಿ ಕಚೇರಿಯಿಂದಲೇ ನಿಮ್ಮ ಭ್ರಷ್ಟಾಚಾರದ ಕಹಾನಿ ಜಗದಗಲಕ್ಕೆ ಪಸರಿಸಿದೆ. ನಿಮ್ಮ ಸಂಪಾದನೆಯ ಮಾರ್ಗ ಸಕ್ರಮವಾಗಿದ್ದರೆ ಜೈಲುಪಾಲಾಗುವ ಪ್ರಸಂಗ ಎದುರಾಗುತ್ತಿತ್ತೇ?’ ಎಂದು ಪ್ರಶ್ನಿಸಿದೆ.

‘ಬೇನಾಮಿ ಡೀಲ್‌ ಮತ್ತು ಬೇನಾಮಿ ಡಿಕೆಶಿ.ಪರಮಭ್ರಷ್ಟ ಡಿಕೆಶಿ ಹೋದಲ್ಲೆಲ್ಲಾ ಭ್ರಷ್ಟಾಚಾರದ ಕೂಪದಲ್ಲಿ ಮಿಂದೆದ್ದು ಬರುವ ಚಾಣಾಕ್ಷ. ಮಂತ್ರಿಯಾಗಿದ್ದಾಗ ಲೆಕ್ಕವಿಲ್ಲದಷ್ಟು ಅಕ್ರಮ ಎಸಗಿದ ಮಹಾ ಭ್ರಷ್ಟಾಚಾರಿ ಈಗ ದಾಖಲೆ ಇಲ್ಲದೆ ಗಾಳಿಯಲ್ಲಿ ಗುಂಡು ಹೊಡೆಯುತ್ತಿರುವುದು ವಿಪರ್ಯಾಸ’ ಅಂತಾ ಕುಟುಕಿದೆ.

ಡಿ.ಕೆ.ಶಿವಕುಮಾರ್. ಅಕ್ರಮವಾಗಿ ಧನ ದಾಸ್ತಾನು ಮಾಡಿದ ಆರೋಪದಲ್ಲಿ #DealDK ಅವರ ಮೇಲೆ ಐಟಿ ದಾಳಿ ನಡೆದಿತ್ತು.  ಸುಮಾರು 800 ಕೋಟಿಗೂ ಅಧಿಕ ಮೌಲ್ಯದ ಬೇನಾಮಿ ಆಸ್ತಿಯ ಒಡೆಯ ಎಂದು ಡಿಕೆಶಿಯವರನ್ನು ತನಿಖಾ ಸಂಸ್ಥೆ ತಿಹಾರ್‌ ಜೈಲಿಗೆ ಅಟ್ಟಿತ್ತು ಇಷ್ಟೆಲ್ಲ ಆಸ್ತಿ ಸಂಪಾದಿಸಿದ್ದು ಹೇಗೆ? ಕನಕಪುರದಲ್ಲಿ ತರಕಾರಿ ಮಾರಿ ಕೋಟಿಗಟ್ಟಲೆ ಗಳಿಸಲು ಹೇಗೆ ಸಾಧ್ಯ?’ ಎಂದು ಬಿಜೆಪಿ ಪ್ರಶ್ನಿಸಿದೆ.

ಇದನ್ನೂ ಓದಿ: ಮಂಡ್ಯದಲ್ಲಿ ಬಿಜೆಪಿ ಪಕ್ಷದ ಸಮಾವೇಶ ನಡೆಸುವ ಬಗ್ಗೆ ಚರ್ಚಿಸಿ ತೀರ್ಮಾನ : ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ