ಮಾಲಿನ್ಯ ನಿಯಂತ್ರಣಕ್ಕೆ ಲೆಸ್ ಟ್ರಾಫಿಕ್ ಡೇ

ಬೆಂಗಳೂರು : ನಗರದ ಪರಿಸರ ಮಾಲಿನ್ಯ ತಗ್ಗಿಸುವ ಉದ್ದೇಶದಿಂದ ತಿಂಗಳಲ್ಲಿ ಒಂದು ದಿನ ಲೆಸ್ ಟ್ರಾಫಿಕ್ ಡೇ ಆಚರಿಸಲು ಸರ್ಕಾರ ನಿರ್ಧರಿಸಿದೆ. ಈ ನಿಯಮ 2018ರ ಫೆಬ್ರವರಿ 2ನೇ ವಾರದಿಂದ ಜಾರಿಗೆ ಬರಲಿದೆ. 

ಈ ಕುರಿತು ವಿಧಾನಸೌಧದಲ್ಲಿ ಶುಕ್ರವಾರ ಸುದ್ದಿಗೋಷ್ಠಿ ನಡೆಸಿದ ಸಾರಿಗೆ ಸಚಿವ ಹೆಚ್.ಎಂ.ರೇವಣ್ಣ, ಸಾರಿಗೆ ಇಲಾಖೆ ವತಿಯಿಂದ ಪ್ರತಿ ತಿಂಗಳ ಎರಡನೇ ಭಾನುವಾರ ವಿರಳ ಸಂಚಾರ ದಿನ ( ಲೆಸ್ ಟ್ರಾಫಿಕ್ ಡೇ) ಅಭಿಯಾನ ನಡೆಸಲು ಚಿಂತನೆ ನಡೆಸಲಾಗಿದೆ. ಎರಡನೇ ಭಾನುವಾರದಂದು ಸ್ವಂತ ವಾಹನವನ್ನು ಬಳಸದೇ ಸಮೂಹ ಸಾರಿಗೆ ಬಳಸುವಂತೆ ಸಾರ್ವಜನಿಕರಿಗೆ ಮನವಿ ಮಾಡಿದ್ದಾರೆ. 

ದೆಹಲಿಯಲ್ಲಿ ವಾಯುಮಾಲಿನ್ಯ ಹಾಗೂ ಸಂಚಾರದಟ್ಟಣೆ ತಡೆಗೆ ಕೈಗೊಂಡ ಸಮ-ಬೆಸ ಸಂಖ್ಯೆಗಳ ವಾಹನ ಸಂಚಾರ ವ್ಯವಸ್ಥೆ ಅಷ್ಟೇನೂ ಯಶ ಕಂಡಿಲ್ಲ. ವಿರಳ ಸಂಚಾರ ದಿನದಂದು ಬೆಂಗಳೂರಿನಲ್ಲಿ ಸಾರಿಗೆ ಸಂಸ್ಥೆಯ ಬಸ್​ಗಳು, ಬಾಡಿಗೆ ವಾಹನಗಳು, ಆಟೋರಿಕ್ಷಾಗಳು ಹಾಗೂ ಎಲೆಕ್ಟ್ರಿಕ್ ವಾಹನಗಳ ಸಂಚಾರಕ್ಕೆ ನಿರ್ಬಂಧ ಇರುವುದಿಲ್ಲ. ಈ ವಾಹನಗಳನ್ನು ಸ್ವಂತ ವಾಹನಗಳ ಮಾಲೀಕರು ಕೆಲಸ ಕಾರ್ಯಗಳಿಗೆ ಬಳಸಿಕೊಳ್ಳಬಹುದಾಗಿದೆ ಎಂದು ತಿಳಿಸಿದ್ದಾರೆ.