ಒಂದು ಕಾಲದಲ್ಲಿ ಬೀದಿಯಲ್ಲಿ ಕಸ ಹೆಕ್ಕಿ ಜೀವನ ನಡೆಸಿದಾತ... ಇಂದು ಕ್ರಿಕೆಟ್ ಜಗತ್ತಿಗೇ ʼಅರಸʼ! RCBಯ ಈ ಸ್ಟಾರ್ ಬ್ಯಾಟ್ಸ್ಮನ್ ವಿರಾಟ್‌ ಕೊಹ್ಲಿಯ ಜೀವದ ಗೆಳೆಯನೂ ಹೌದು
ಮನಸ್ಸಿದ್ದರೆ ಮಾರ್ಗ... ಎಂಬ ಮಾತಿದೆ. ಯಾವುದೇ ಸಾಧನೆಗೂ ಸಮರ್ಪಣೆ ಮುಖ್ಯವಾಗಿ ಬೇಕಾಗಿರುವುದು. ಇದರ ಆಧಾರದ ಮೇಲೆಯೇ ಎಂಥಾ ಬಡವನೂ ಕೋಟ್ಯಾಧಿಪತಿಯಾಗಿ ಬದಲಾಗಬಹುದು. ಅಷ್ಟಕ್ಕೂ ಈ ಪೀಠಿಕೆ ಹಾಕಲು ಕಾರಣ ಓರ್ವ ಕ್ರಿಕೆಟಿಗ.
ಈ ಕ್ರಿಕೆಟಿಗ ಒಂದೊಮ್ಮೆ ಬೀದಿಯಲ್ಲಿ ಕಸ ಹೆಕ್ಕಿ ಜೀವನ ನಡೆಸುತ್ತಿದ್ದನಂತೆ, ಆದರೆ ಇಂದು ಕ್ರಿಕೆಟ್‌ನಿಂದ ಕೊಂಚ ಅಂತರ ಕಾಯ್ದುಕೊಂಡಿದ್ದರೂ ಸಹ, ಇಂದಿಗೂ ʼಯೂನಿವರ್ಸಲ್‌ ಬಾಸ್ʼ ಎಂದೇ ಹೆಗ್ಗಳಿಕೆ ಪಡೆದು ಮೆರೆಯುತ್ತಿದ್ದಾನೆ.
ಒಂದಷ್ಟು ಮಂದಿಗೆ ಆತ ಯಾರೆಂದು ಅರಿತಿರಬಹುದು. ಇನ್ನೂ ಕೆಲವರು ಗೊಂದಲದಲ್ಲಿರಬಹುದು. ಆತ ಬೇರಾರು ಅಲ್ಲ, ವೆಸ್ಟ್ ಇಂಡೀಸ್ ಸ್ಟಾರ್ ಬ್ಯಾಟ್ಸ್ಮನ್ ಕ್ರಿಸ್ ಗೇಲ್.
T-20 ಕ್ರಿಕೆಟ್‌ನಲ್ಲಿ ಅಪಾರ ಸಾಧನೆ ಮಾಡಿರುವ ಕ್ರಿಸ್ ಗೇಲ್, ಆರ್‌ಸಿಬಿ ತಂಡದ ಮಾಜಿ ಆಟಗಾರ ಮತ್ತು ವಿರಾಟ್‌ ಕೊಹ್ಲಿ ನೆಚ್ಚಿನ ಕ್ರಿಕೆಟಿಗ ಕೂಡ ಹೌದು.
ಟಿ-20 ವಿಶ್ವಕಪ್ ಆರಂಭವಾದಾಗ ಅಂದರೆ 2007ರ ಮೊದಲ ಋತುವಿನಲ್ಲಿ ಬ್ಯಾಟಿಂಗ್ ಮೂಲಕ ಸಂಚಲನ ಮೂಡಿಸಿದವರು ಕ್ರಿಸ್ ಗೇಲ್. ಟಿ-20 ವಿಶ್ವಕಪ್‌ನ ಮೊದಲ ಶತಕ ಕ್ರಿಸ್ ಗೇಲ್ ಹೆಸರಿನಲ್ಲಿದೆ. ಮೊದಲ ಟಿ20 ವಿಶ್ವಕಪ್‌ನಲ್ಲಿ ಭಾರತ ಚಾಂಪಿಯನ್ ಆಗಿದ್ದರೂ, ಗೇಲ್ ಇತಿಹಾಸದಲ್ಲಿ ತಮ್ಮ ಹೆಸರನ್ನು ದಾಖಲಿಸಿದ್ದರು.
ಇದರೊಂದಿಗೆ ಟಿ-20 ಕ್ರಿಕೆಟ್’ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ದಾಖಲೆಯೂ ಕ್ರಿಸ್ ಗೇಲ್ ಹೆಸರಿನಲ್ಲಿದೆ. ಈ ಸ್ವರೂಪದಲ್ಲಿ, ಕ್ರಿಸ್ ಗೇಲ್ 463 ಪಂದ್ಯಗಳಲ್ಲಿ 22 ಶತಕಗಳನ್ನು ಗಳಿಸಿದ್ದು, ಇದು T-20 ಕ್ರಿಕೆಟ್’ನಲ್ಲಿ ಗರಿಷ್ಠವಾಗಿದೆ.
ಕ್ರಿಸ್ ಗೇಲ್ ಟೆಸ್ಟ್ ಕ್ರಿಕೆಟ್‌ನಲ್ಲಿ ತ್ರಿಶತಕ ಬಾರಿಸಿದ ಮೊದಲ ಬ್ಯಾಟ್ಸ್ಮನ್ ಆಗಿದ್ದು, ಎರಡು ಬಾರಿ ಈ ಸಾಧನೆ ಮಾಡಿದ್ದಾರೆ. ODI ನಲ್ಲಿ ದ್ವಿಶತಕ, T-20 ನಲ್ಲಿ ಅತಿ ಹೆಚ್ಚು ರನ್, ಶತಕ ಮತ್ತು ಸಿಕ್ಸರ್ ಬಾರಿಸಿದ ವಿಷಯದಲ್ಲಿ ಗೇಲ್’ಗೆ ಸರಿಸಾಟಿ ಯಾರೂ ಇಲ್ಲ.
ಇನ್ನು ಕ್ರಿಕೆಟ್ ಜಗತ್ತಿನಲ್ಲಿ ಇಷ್ಟೆಲ್ಲಾ ಸಾಧನೆ ಮಾಡಿರುವ ಕ್ರಿಸ್ ಗೇಲ್ ಅವರು, ಬಾಲ್ಯದಲ್ಲಿ ಪಡಬಾರದ ಕಷ್ಟಗಳನ್ನು ಅನುಭವಿಸಿದವರು. ಬಡ ಕುಟುಂಬದಲ್ಲಿ ಜನಿಸಿದ ಗೇಲ್, ಬೀದಿ ಬದಿಯ ಕಸ ಆಯ್ದು ಅವುಗಳನ್ನು ಮಾರಾಟ ಮಾಡಿ, ಜೊತೆಗೆ ಸಣ್ಣಪುಟ್ಟ ಕೆಲಸ ಮಾಡುತ್ತಾ ತಮ್ಮ ಕುಟುಂಬವನ್ನು ಪೋಷಿಸುತ್ತಿದ್ದರು.
ತಮ್ಮ ಕಷ್ಟದ ದಿನಗಳ ಬಗ್ಗೆ ಸ್ವತಃ ಕ್ರಿಸ್ ಗೇಲ್ ಅವರೇ ಸಂದರ್ಶನವೊಂದರಲ್ಲಿ ಬಹಿರಂಗಪಡಿಸಿದ್ದಾರೆ. ಆದರೆ ಇಂದು ಗೇಲ್ ಐಷಾರಾಮಿ ಜೀವನ ನಡೆಸುತ್ತಿದ್ದು, ಸದ್ಯ ಇವರು ವಾಸಿಸುವ ಮನೆ 20 ಕೋಟಿ ರೂಪಾಯಿ ಮೌಲ್ಯದ್ದು ಎಂದು ಹೇಳಲಾಗುತ್ತದೆ.