Asia Cup 2023, IND vs SL: ಶ್ರೀಲಂಕಾ ಮಣಿಸಿ ಫೈನಲ್ ಪ್ರವೇಶಿಸಿದ ಟೀಂ ಇಂಡಿಯಾ!

Asia Cup 2023, IND vs SL: ಕೊಲಂಬೊದ ಆರ್.ಪ್ರೇಮದಾಸ ಸ್ಟೇಡಿಯಂನಲ್ಲಿ ಮಂಗಳವಾರ ನಡೆದ ಏಷ್ಯಾಕಪ್ ಟೂರ್ನಿಯ ಸೂಪರ್ 4ರ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ ಭರ್ಜರಿ ಜಯ ಸಾಧಿಸಿದ ಟೀಂ ಇಂಡಿಯಾ ಫೈನಲ್ ಪ್ರವೇಶಿಸಿದೆ.

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಭಾರತ 49.1 ಓವರ್‍ಗಳಲ್ಲಿ ತನ್ನೆಲ್ಲಾ ವಿಕೆಟ್‍ಗಳನ್ನು ಕಳೆದುಕೊಂಡು 213 ರನ್ ಗಳಿಸಿತ್ತು. ಸಾಧಾರಣ ಮೊತ್ತದ ಗುರಿ ಬೆನ್ನತ್ತಿದ ಶ್ರೀಲಂಕಾ ಭಾರತೀಯ ಬೌಲರ್‍ಗಳ ಮಾರಕ ಬೌಲಿಂಗ್ ದಾಳಿಗೆ ಸಿಲುಕಿ ನಲುಗಿಹೋಯಿತು.

ಕುಲದೀಪ್ ಯಾದವ್, ರವೀಂದ್ರ ಜಡೇಜಾ ಮತ್ತು ಬುಮ್ರಾ ದಾಳಿಗೆ ಸಿಲುಕಿದ ಶ್ರೀಲಂಕಾ ತಂಡ 41.3 ಓವರ್‍ಗಳಲ್ಲಿ ತನ್ನೆಲ್ಲಾ ವಿಕೆಟ್‍ಗಳನ್ನು ಕಳೆದುಕೊಂಡು ಕೇವಲ 172 ರನ್‍ ಗಳಿಸಲಷ್ಟೇ ಶಕ್ತವಾಯಿತು. 41 ರನ್‍ಗಳ ಭರ್ಜರಿ ಗೆಲವು ಸಾಧಿಸಿದ ಭಾರತ ಏಷ್ಯಾಕಪ್‍ ಟೂರ್ನಿಯಲ್ಲಿ ಫೈನಲ್ ಪ್ರವೇಶಿಸಿತು.

ರೋಹಿತ್ ಶರ್ಮಾ ಅರ್ಧಶತಕ!

ಟಾಸ್ ಗೆದ್ದು ಬ್ಯಾಟಿಂಗ್ ಮಾಡಿದ ಟೀ ಇಂಡಿಯಾ ಪರ ನಾಯಕ ರೋಹಿತ್ ಶರ್ಮಾ(53) ಆಕರ್ಷಕ ಅರ್ಧಶತಕ ಭಾರಿಸಿ ಮಿಂಚಿದರು. ಕೆ.ಎಲ್.ರಾಹುಲ್(39), ಇಶಾನ್ ಕಿಶನ್(33), ಅಕ್ಸರ್ ಪಟೇಲ್(26) ಮತ್ತು ಶುಭಮನ್‍ ಗಿಲ್(19) ರನ್ ಗಳಿಸಿದರು. ಶ್ರೀಲಂಕಾ ಪರ ಬೌಲಿಂಗ್‍ನಲ್ಲಿ ದುನಿತ್ ವೆಲ್ಲಲಾಗೆ 5 ಮತ್ತು ಚರಿತ್ ಅಸಲಂಕಾ 4 ವಿಕೆಟ್ ಪಡೆದು ಮಿಂಚಿದರು.

ಕುಲದೀಪ್ ಯಾದವ್ ಮಾರಕ ದಾಳಿ!

214 ರನ್‍ಗಳ ಗುರಿ ಬೆನ್ನತ್ತಿದ ಶ್ರೀಲಂಕಾ ಆರಂಭದಲ್ಲಿಯೇ ಆಘಾತ ಅನುಭವಿಸಿತು. ಬಳಿಕ ಕೊಂಚ ಚೇತರಿಸಿಕೊಂಡ ಗೆಲುವಿನ ಆಸೆ ಮೂಡಿಸಿದ್ದ ಲಂಕಾ ಕೊನೆಗೆ ಸೋಲು ಒಪ್ಪಿಕೊಂಡಿತು. ಲಂಕಾ ಪರ ದುನಿತ್ ವೆಲ್ಲಲಾಗೆ(ಅಜೇಯ 42) ಹೋರಾಟ ನಡೆಸಿದರು. ಧನಂಜಯ ಡಿ ಸಿಲ್ವ(41), ಚರಿತ್ ಅಸಲಂಕಾ(22), ಸದೀರ ಸಮರವಿಕ್ರಮ(17) ಮತ್ತು ಕುಸಾಲ್ ಮೆಂಡಿಸ್(15) ರನ್ ಗಳಿಸಿದರು. ಲಂಕಾ ಬ್ಯಾಟಿಂಗ್ ಬಲವನ್ನು ಮುರಿದ ಕುಲದೀಪ್ ಯಾದವ್ 4 ವಿಕೆಟ್ ಕಬಳಿಸಿ ಮಿಂಚಿದರು. ಜಸ್ಪ್ರೀತ್ ಬುಮ್ರಾ ಮತ್ತು ರವೀಂದ್ರ ಜಡೇಜಾ ತಲಾ 2 ವಿಕೆಟ್ ಪಡೆದರು.