WTC Final 2023: ಬಿಗುವಿನ ಬೌಲಿಂಗ್ ದಾಳಿ ನಡೆಸಿದ ಆಸಿಸ್ ತಂಡ, ಸಂಕಷ್ಟದಲ್ಲಿ ಟೀಮ್ ಇಂಡಿಯಾ

ಲಂಡನ್: ಇಲ್ಲಿನ ಓವಲ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಆಸ್ಟ್ರೇಲಿಯಾ ವಿರುದ್ಧದ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ ಪಂದ್ಯದಲ್ಲಿ ಆರಂಭಿಕ ಆಟಗಾರರ ವೈಫಲ್ಯದೊಂದಿಗೆ ಭಾರತ ತಂಡವು ಈಗ ಸಂಕಷ್ಟಕ್ಕೆ ಸಿಲುಕಿದೆ.

ಟಾಸ್ ಗೆದ್ದು ಮೊದಲು ಬೌಲಿಂಗ್ ಮಾಡಿದ ಟೀಮ್ ಇಂಡಿಯಾ ಮೊದಲ ದಿನದಂದು ಲಂಚ್ ವಿರಾಮಕ್ಕೂ ಮುನ್ನ ಆಸಿಸ್ ತಂಡದ ಮೂರು ಪ್ರಮುಖ ಆಟಗಾರರ ವಿಕೆಟ್ ಕಬಳಿಸುವ ಮೂಲಕ ಮುನ್ನಡೆಯನ್ನು ಸಾಧಿಸಿತ್ತು. ಆದರೆ ತದನಂತರ ಟ್ರಾವಿಸ್ ಹೆಡ್ 163, ಹಾಗೂ ಸ್ಟೀವನ್ ಸ್ಮಿತ್ ಅವರ 121 ರನ್ ಗಳ ನೆರವಿನೊಂದಿಗೆ ಎರಡನೇ ದಿನ ಒಟ್ಟು 469 ರನ್ ಗಳಿಸುವ ಮೂಲಕ ಸರ್ವಪತನವನ್ನು ಕಂಡಿತು.

ಟೀಮ್ ಇಂಡಿಯಾದ ಪರವಾಗಿ ಮೊಹಮ್ಮದ್ ಸಿರಾಜ್ ನಾಲ್ಕು ವಿಕೆಟ್ ಪಡೆದರೆ ಶಮಿ ಹಾಗೂ ಠಾಕೂರ್ ತಲಾ ಎರಡು ವಿಕೆಟ್ ಗಳನ್ನು ಕಬಳಿಸಿದರು.

ಇನ್ನೊಂದೆಡೆಗೆ ಮೊದಲ ಇನಿಂಗ್ಸ್ ನ ಬ್ಯಾಟಿಂಗ್ ಆರಂಭಿಸಿದ ಟೀಮ್ ಇಂಡಿಯಾ ತಂಡವು ತಂಡದ ಮೊತ್ತ 74 ಆಗುವಷ್ಟರಲ್ಲಿ ರೋಹಿತ್ ಶರ್ಮ, ಶುಭ್ಮನ್ ಗಿಲ್, ವಿರಾಟ್ ಕೊಹ್ಲಿ,ಚೆತೇಶ್ವರ ಪೂಜಾರ ಅವರ ವಿಕೆಟ್ ಗಳನ್ನು ಕಳೆದುಕೊಳ್ಳುವ ಮೂಲಕ ಭಾರಿ ಆಘಾತವನ್ನು ಎದುರಿಸಿತು. ಭಾರತದ ಪರವಾಗಿ ರವೀಂದ್ರ ಜಡೇಜಾ 48 ರನ್ ಗಳನ್ನು ಗಳಿಸುವ ಮೂಲಕ ಬೃಹತ್ ಇನಿಂಗ್ಸ್ ಕಟ್ಟುವ ಸಂದರ್ಭದಲ್ಲಿಯೇ ವಿಕೆಟ್ ಒಪ್ಪಿಸಿದರು.

ಸದ್ಯ ಕ್ರೀಸ್ ನಲ್ಲಿ ಅಜಿಂಕ್ಯಾ ರಹಾನೆ 29, ಹಾಗೂ ಶ್ರೀಕರ್ ಭರತ್ 5 ರನ್ ಗಳೊಂದಿಗೆ ಆಡುತ್ತಿದ್ದಾರೆ.ಟೀಮ್ ಇಂಡಿಯಾ ಎರಡನೇ ದಿನದ ಮುಕ್ತಾಯಕ್ಕೆ 38 ಓವರ್ ಗಳಲ್ಲಿ ಐದು ವಿಕೆಟ್ ಗಳ ನಷ್ಟಕ್ಕೆ 151 ರನ್ ಗಳನ್ನು ಗಳಿಸಿದೆ. ಮುನ್ನಡೆಯನ್ನು ಪಡೆಯಲು ಟೀಮ್ ಇಂಡಿಯಾಗೆ  ಇನ್ನೂ  318 ರನ್ ಗಳ ಅಗತ್ಯತೆ ಇದೆ.