Businessman bankrupt: ಜೂಜಾಟ & ಹುಡುಗಿಯರ ಶೋಕಿಯಿಂದ ಭಿಕ್ಷುಕನಾದ ಬೆಂಗಳೂರಿನ 70 ಲಾರಿಗಳ ಮಾಲೀಕ!

Bengaluru Businessman Bankrupt: ಬೆಂಗಳೂರಿನಲ್ಲಿ ಮನೆ ಹಾಗೂ 70 ಲಾರಿಗಳನ್ನು ಹೊಂದಿದ್ದ ಉದ್ಯಮಿಯೊಬ್ಬ ಜೂಜಾಟ ಹಾಗೂ ಹುಡುಗಿಯರ ಶೋಕಿಯಿಂದ ಇದೀಗ ಎಲ್ಲವನ್ನೂ ಕಳೆದುಕೊಂಡು ಬೀದಿಗೆ ಬಿದ್ದಿದ್ದಾನೆ. ಐಷಾರಾಮಿ ಜೀವನ ನಡೆಸಿದ ಈ ವ್ಯಕ್ತಿ ದುಡಿದು ತಿನ್ನಲಾಗದೆ ಕಳ್ಳತನವನ್ನೇ ಕಸುಬು ಮಾಡಿಕೊಂಡಿದ್ದ. ಬರೋಬ್ಬರಿ 150ಕ್ಕೂ ಹೆಚ್ಚು ಕಳ್ಳತನ ಪ್ರಕರಣಗಳಲ್ಲಿ ಈತ ಹಲವು ರಾಜ್ಯಗಳಲ್ಲಿ ಪೊಲೀಸರಿಗೆ ಬೇಕಾಗಿದ್ದಾನೆ.

ಹೌದು, ಒಂದು ವೇಳೆ ದುಡಿಮೆಯ ದಾರಿ ಬಿಟ್ಟು ಶೋಕಿ ಮಾಡಿದ್ರೆ ನೀವು ದುಡಿದು ಸಂಪಾದಿಸಿದ ಕೋಟಿ ಕೋಟಿ ಹಣವನ್ನೂ ಕಳೆದುಕೊಂಡು ಭಿಕ್ಷೆ ಬೇಡಬೇಕಾಗುತ್ತದೆ ಎಂಬುದಕ್ಕೆ ಬೆಂಗಳೂರಿನ ವಿಶ್ವನಾಥ್ @ ಕೋಳಿವಾಡ ಎಂಬ ವ್ಯಕ್ತಿಯೇ ನಿದರ್ಶನ. ಹೈದರಾಬಾದ್ ಜೈಲಿನಲ್ಲಿದ್ದ ಈತನನ್ನು ಬೆಂಗಳೂರು ಪೊಲೀಸರು ಬಾಡಿ ವಾರೆಂಟ್‌ ಮೇಲೆ ಕರೆತಂದಿದ್ದಾರೆ. 

ಇದನ್ನೂ ಓದಿ: ಒಂದು ರೂಪಾಯಿ ನಾಣ್ಯ ತಯಾರಿಸಲು ತಗಲುವ ವೆಚ್ಚ ಎಷ್ಟು ಗೊತ್ತಾ?

ಐದಾರು ವರ್ಷಗಳ ಹಿಂದಷ್ಟೇ ಬೆಂಗಳೂರು ಸೇರಿದಂತೆ ರಾಜ್ಯದಲ್ಲಿ ಲಾಭದಾಯಕ ಬ್ಯುಸಿನೆಸ್‌ ಹೊಂದಿದ್ದ ವಿಶ್ವಾನಾಥ್‌, 70ಕ್ಕೂ ಹೆಚ್ಚು ಲಾರಿ ಇಟ್ಟುಕೊಂಡು ಉದ್ಯಮ ನಡೆಸುತ್ತಿದ್ದ. ಲಾರಿಗಳಿಂದ ಆತನಿಗೆ ಭರ್ಜರಿ ಆದಾಯವೂ ಬರುತ್ತಿತ್ತು. ಆದರೆ ಆತ ಹಣದ ಮದವೇರಿಸಿಕೊಂಡು ಹಲವಾರು ಚಟಗಳಿಗೆ ದಾಸನಾಗಿ ಶೋಕಿ ಜೀವನ ನಡೆಸಲು ಮುಂದಾಗಿದ್ದಾನೆ. ಸ್ನೇಹಿತರೂ ಸಹ ಆತನನ್ನು ಬಳಸಿಕೊಂಡು ಆರ್ಥಿಕ ದಿವಾಳಿಯಾಗುಂತೆ ಮಾಡಿದ್ದಾರೆ. ಕೆಟ್ಟ ಸ್ನೇಹಿತರ ಸಹವಾಸ ಮಾಡಿದ ವಿಶ್ವನಾಥ್ ಪಬ್, ಕ್ಲಬ್, ಜೂಜಾಟ ಹಾಗೂ ಹುಡುಗಿಯರ ಜೊತೆಗೆ ಮಜಾ ಮಾಡುವ ಶೋಕಿ ಕಲಿಯುತ್ತಾನೆ.

ನಂತರ ಜೂಜಾಟ ಮತ್ತು ಹುಡುಗಿಯರಿಗಾಗಿ ವಿಶ್ವನಾಥ್‌ ತನಗೆ ಬರುತ್ತಿದ್ದ ಹಣ ಹಾಗೂ ಸಂಪಾದಿಸಿದ್ದ ಹಣವನ್ನು ನೀರಿನಂತೆ ಖರ್ಚು ಮಾಡಿದ್ದಾನೆ. ಎಲ್ಲವನ್ನೂ ಕಳೆದುಕೊಂಡ ಆತ ಬೀದಿಗೆ ಬಂದಿದ್ದಾನೆ. ಭಿಕ್ಷುಕನಾದರೂ ಶೋಕಿ ಜೀವನ ಬಿಡದ ವಿಶ್ವನಾಥ್‌, ಹಣಕ್ಕಾಗಿ ಕಳ್ಳತನದ ದಾರಿಯನ್ನು ಹಿಡಿದಿದ್ದಾನೆ. ಚಿನ್ನಾಭರಣಗಳನ್ನು ಹಾಕಿಕೊಂಡು ಓಡಾಡುವ ಮಹಿಳೆಯರನ್ನೇ ಟಾರ್ಗೆಟ್ ಮಾಡುತ್ತಿದ್ದ ವಿಶ್ವನಾಥ್‌, ಬೆಂಗಳೂರು, ಬೆಳಗಾವಿ, ಧಾರವಾಡ, ಹೈದರಾಬಾದ್ ಸೇರಿದಂತೆ ವಿವಿಧೆಡೆ ಸರಗಳ್ಳತನ ಮಾಡುತ್ತಿದ್ದನಂತೆ. 

ಇದನ್ನೂ ಓದಿ: ಪೌರಿಯಿಂದ ರಾಮನಗರಕ್ಕೆ ಬರುತ್ತಿದ್ದ ಬಸ್ ಕುಪಿ ಬಳಿ ಕಂದಕಕ್ಕೆ ಬಿದ್ದು ಅಪಘಾತ: 15 ಮೃತದೇಹಗಳು ಪತ್ತೆ

ಸರಗಳ್ಳತನ ಮಾಡಿ ತಪ್ಪಿಸಿಕೊಳ್ಳುವಾಗ ಪೊಲೀಸರಿಂದ ಕಾಲಿಗೆ ಗುಂಡೇಟು ಸಹ ಹೊಡಿಸಿಕೊಂಡಿದ್ದಾನೆ. ಆದರೂ ತನ್ನ ಕಳ್ಳತನದ ಚಾಳಿಯನ್ನು ಮಾತ್ರ ವಿಶ್ವನಾಥ್ ಬಿಟ್ಟಿರಲಿಲ್ಲವಂತೆ. ಇತ್ತೀಚೆಗಷ್ಟೇ ಬೆಂಗಳೂರಿನ ಗಿರಿನಗರದಲ್ಲಿ ಮಹಿಳೆಯೊಬ್ಬರ ಸರ ಕಳ್ಳತನ ಮಾಡಿ ಎಸ್ಕೇಪ್‌ ಆಗಿದ್ದನಂತೆ. ಪತಿಯ ಬಗ್ಗೆ ವಿಚಾರಿಸುವ ನೆಪದಲ್ಲಿ ಮಹಿಳೆಯ ಹತ್ತಿರ ನಿಂತು ಸರ ಕಿತ್ತುಕೊಂಡು ಓಡಿ ಹೋಗಿದ್ದನಂತೆ. ನಂತರ ಹೈದರಾಬಾದ್‌ಗೆ ಹೋಗಿ ಅಲ್ಲಿಯೂ ಕಳ್ಳತನ ಮಾಡಿ ಸ್ಥಳೀಯ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದನಂತೆ. 

ಹೈದರಾಬಾದ್ ಪೊಲೀಸರು ವಿಶ್ವನಾಥ್‌ನನ್ನು ಬಂಧಿಸಿ ಜೈಲಿಗಟ್ಟಿದ್ದರು. ವಿವಿಧ ಕಳ್ಳತನ ಪ್ರಕರಣಗಳಲ್ಲಿ ಬೇಕಾಗಿರುವ ಆರೋಪಿ ವಿಶ್ವನಾಥ್‌ಗಾಗಿ ಹೈದರಾಬಾದ್ ಪೊಲೀಸರನ್ನು ಸಂಪರ್ಕಿಸಿದ್ದ ಬೆಂಗಳೂರು ಪೊಲೀಸರು ಬಾಡಿ ವಾರೆಂಟ್ ಮೇಲೆ ಆತನನ್ನು ಮತ್ತೆ ಬೆಂಗಳೂರಿಗೆ ಕರೆ ತಂದಿದ್ದಾರೆ. ಈತನ ಬಳಿ 25 ಲಕ್ಷ ರೂ. ಮೌಲ್ಯದ ಚಿನ್ನಾಭರಣ, ಬೈಕ್ ಜಪ್ತಿ ಮಾಡಲಾಗಿದೆ. ಈತನ ವಿರುದ್ಧ ಗಿರಿನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಖಾಕಿಪಡೆ ಹೆಚ್ಚಿನ ವಿಚಾರಣೆ ನಡೆಸುತ್ತಿದ್ದಾರೆ.