ಒಂದೇ ಮೋಟಾರ್ ಸೈಕಲ್‌ನಲ್ಲಿ ಏರಿ ಸವಾರಿ ಮಾಡಿದ 5 ಮಂದಿ - ವಿಡಿಯೋ ವೈರಲ್ ಬಳಿಕ ಆಗಿದ್ದೇನು?

Viral Video: ನಮ್ಮ ಯುವ ಜನರಿಗೆ ಬೈಕ್ ಅಥವಾ ಮೋಟರ್ ಸೈಕಲ್ ಸಿಕ್ಕರೆ ಸ್ವರ್ಗಕ್ಕೆ ಮೂರೇ ಗೇಣು. ಸಂಚಾರ ನಿಯಮಗಳನ್ನು ಗಾಳಿಗೆ ತೂರಿ, ತಮ್ಮ ಬಗ್ಗೆ ಇರಲಿ ತಮ್ಮನ್ನು ನಂಬಿಕೊಂಡಿರುವ ಮನೆಯವರ ಬಗ್ಗೆಯೂ ಕೂಡ ಕಿಂಚಿತ್ತು ಯೋಚನೆಯಿಲ್ಲದೆ ಮನಬಂದಂತೆ ಗಾಡಿ ಚಲಾಯಿಸುತ್ತಾರೆ. ತರಾವರಿ ಸ್ಟಂಟ್ ಮಾಡಿ ಪ್ರಾಣಕ್ಕೆ ಕುತ್ತು ತಂದುಕೊಳ್ಳುತ್ತಾರೆ. ಅಂತಹದ್ದೇ ಒಂದು ದೃಶ್ಯಕ್ಕೆ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗುತ್ತಿದೆ. 

ಸಾಮಾನ್ಯವಾಗಿ, ಒಂದು ಮೋಟಾರ್ ಸೈಕಲ್‌ನಲ್ಲಿ ಎಷ್ಟು ಜನ ಸವಾರಿ ಮಾಡಬಹುದು ಎಂದು ಕೇಳಿದರೆ ನಿಮ್ಮ ಉತ್ತರ ಎರಡು ಅಥವಾ ಮೂರು ಎಂದಿರಬಹುದು. ಆದರಿಲ್ಲಿ ಒಂದೇ ಮೋಟಾರ್ ಸೈಕಲ್‌ನಲ್ಲಿ ಬರೋಬ್ಬರಿ ಐದು ಜನರು ಸವಾರಿ ಮಾಡುವ ದೃಶ್ಯ ವೈರಲ್ ಆಗಿದೆ. 

ಉತ್ತರ ಪ್ರದೇಶದ ಮೊರಾದಾಬಾದ್‌ನ ಈ ದೃಶ್ಯವು ಇದೀಗ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಸದ್ದು ಮಾಡುತ್ತಿದೆ. ಒಂದು ಮೋಟಾರ್ ಸೈಕಲ್‌ನಲ್ಲಿ ಐದು ಜನರು ಸವಾರಿ ಮಾಡುತ್ತಿರುವ ವಿಡಿಯೋ ವೈರಲ್ ಆದ ಬಳಿಕ ಆರೋಪಿಗಳ ವಿರುದ್ಧ ಕ್ರಮ ಕೈಗೊಂಡಿರುವ ಪೊಲೀಸರು ಸಂಚಾರ ನಿಯಮ ಉಲ್ಲಂಘಿಸಿದ ಐವರನ್ನು ಸೋಮವಾರ (ನವೆಂಬರ್ 28) ದಂದು ಬಂಧಿಸಿ ಕಂಬಿ ಹಿಂದೆ ತಳ್ಳಿದ್ದಾರೆ.

ಇದನ್ನೂ ಓದಿ- Bride Groom Video : ಈ ಪ್ರಿ ವೆಡ್ಡಿಂಗ್ ಫೋಟೋ ಶೂಟ್ Video ನೋಡಿದ್ರೆ ಶಾಕ್ ಆಗ್ತೀರಾ!

ಈ ಕುರಿತಂತೆ ಮಾಹಿತಿ ನೀಡಿರುವ, ಪೊಲೀಸ್ ಸೂಪರಿಂಟೆಂಡೆಂಟ್ (ಎಸ್‌ಪಿ) ಟ್ರಾಫಿಕ್ ಅಶೋಕ್ ಕುಮಾರ್,  ಕೋತ್ವಾಲಿ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಐದು ಜನರು ಮೋಟಾರ್‌ಸೈಕಲ್‌ನಲ್ಲಿ ಸವಾರಿ ಮಾಡುತ್ತಿರುವ ವೀಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದೆ. ವೀಡಿಯೋದಲ್ಲಿ ದ್ವಿಚಕ್ರವಾಹನದ ನಂಬರ್ ಪ್ಲೇಟ್ ಗೋಚರಿಸಿದ್ದು, ಅದರ ಆಧಾರದ ಮೇಲೆ ಆರೋಪಿಗಳನ್ನು ಗುರುತಿಸಿ ಅವರ ವಿರುದ್ಧ ಕ್ರಮ ಕೈಗೊಳ್ಳಲಾಗಿದೆ. ದ್ವಿಚಕ್ರವಾಹನವನ್ನು ವಶಪಡಿಸಿಕೊಳ್ಳಲಾಗಿದ್ದು ಐವರನ್ನು ಬಂಧಿಸಲಾಗಿದೆ ಎಂದು ತಿಳಿಸಿದ್ದಾರೆ. 

ದ್ವಿಚಕ್ರವಾಹನ ರಯೀಸ್ ಅಹಮದ್ ಎಂಬುವವರಿಗೆ ಸೇರಿದ್ದಾಗಿದೆ. ಆರೋಪಿಗಳನ್ನು ಆರೀಫ್, ಆಸಿಫ್, ಇರ್ಷಾದ್, ಶಮೀಮ್ ಮತ್ತು ವಾಸಿಂ ಎಂದು ಗುರುತಿಸಲಾಗಿದೆ. ಎಲ್ಲರೂ ಮೊರಾದಾಬಾದ್‌ನ ಅಸಲಾತ್‌ಪುರ ಪ್ರದೇಶದ ನಿವಾಸಿಗಳು ಎಂದು ತಿಳಿದುಬಂದಿದೆ.

ಎಚ್ಚರಿಕೆ: ಇಂತಹ ಸಾಹಸಗಳು ಸುರಕ್ಷಿತವಲ್ಲ, ಆದ್ದರಿಂದ ಇದನ್ನು ಪ್ರಯತ್ನಿಸಲು Zee ಮೀಡಿಯಾ ನಿಮಗೆ ಸಲಹೆ ನೀಡುವುದಿಲ್ಲ.