`स्वरगंधर्व सुधीर फडके`चा दुसरा टीझर प्रदर्शित, `या` दिवशी होणार प्रदर्शित
SwarGandharva Sudhir Phadke Teaser : `स्वरगंधर्व सुधीर फडके` या चित्रपटाचा दुसरा टीझर प्रदर्शित. या चित्रपटातून आपल्याला `बाबुजीं`चा संपूर्ण प्रवास पाहायला मिळणार आहे.
SwarGandharva Sudhir Phadke Teaser : ज्यांच्या अवीट सुरांनी साऱ्यांनाच वेड लावले, ज्यांच्या 'गीतरामायणा'नं प्रत्येक संगीतप्रेमीच्या मनात स्थान निर्माण केले, त्या बाबुजींचा आयुष्यपट लवकरच रुपेरी पडद्यावरून आपल्या भेटीला येत आहे. नुकताच 'स्वरगंधर्व सुधीर फडके' या चित्रपटाचा दुसरा टीझर प्रदर्शित झाला आहे. एका प्रतिभाशाली आणि हरहुन्नरी गायकाचं जीवन या चित्रपटातून उलगडणार आहे. टीझरमध्ये 'माझ्या आयुष्याच्या खडतर प्रवासात पदोपदी सोसलेल्या जाणिवेतून, ही आर्तता माझ्या स्वरात उतरते, असे एक वाक्य आहे. या वाक्यातूनच 'बाबुजीं'च्या व्यक्तिमत्वाची ओळख होते.
चित्रपटाबद्दल दिग्दर्शक योगेश देशपांडे म्हणतात, ''एखाद्या नावाजलेल्या व्यक्तिमत्वाचा जीवनपट पडद्यावर दाखवणे नक्कीच सोपे नसते. त्यासाठी सखोल अभ्यास अत्यंत गरजेचा आहे. 'बाबुजी' हे अवघ्या महाराष्ट्राचे लाडके व्यक्तिमत्व. मला त्यांचा जीवनपट पडद्यावर दाखवायचा होता. यासाठी मी जमेल तितकी त्यांच्याविषयी माहिती मिळवली. त्यांच्या संपर्कात आलेल्या अनेकांना मी भेटलो. त्यांच्याविषयी काही अशा गोष्टी कळल्या, ज्या अनेकांना माहित नाही. त्यांचे तेच आयुष्य मी पडद्यावर दाखवण्याचा प्रयत्न केला आहे. त्यांची गाणी आपल्या सगळ्यांना माहित आहे, परंतु त्यामागचा संघर्ष खूप कठीण होता. त्यांचा हा प्रवास 'स्वरगंधर्व सुधीर फडके'मध्ये पाहायला मिळणार आहे.''
आपल्या मंत्रमुग्ध आवाजाने रसिक श्रोत्यांच्या मनावर अधिराज्य गाजवणाऱ्या सुधीर फडके स्वरगंधर्वांच्या सप्तसुरांचा प्रवास आपल्याला या चित्रपटात पाहता येणार आहे. तर मृणमयीनं शेअर केलेल्या या टीझरवर नेटकऱ्यांनी कमेंट करत तिला शुभेच्छा दिल्या आहेत. तर काही नेटकऱ्यांनी चित्रपट पाहण्याची प्रतिक्षा करु शकत नाही असं म्हटलं आहे. अखेर तारीख ठरली याचा आनंद आहे.
हेही वाचा : मुलांनी पळून जाऊन लग्न करावं ट्विंकल खन्नानं व्यक्त केली इच्छा, म्हणाली 'माझा पती रात्री...'
रिडिफाईन प्रॉडक्शन्स निर्मित, योगेश देशपांडे दिग्दर्शित या चित्रपटात सुनील बर्वे, आदिश वैद्य, शरद पोंक्षे, सागर तळाशीकर, मृण्मयी देशपांडे, अपूर्वा मोडक, अविनाश नारकर यांच्या प्रमुख भूमिका आहेत. या चित्रपटाची कथा, पटकथा, संवाद योगेश देशपांडे यांचे असून सौरभ गाडगीळ, योगेश देशपांडे या चित्रपटाचे निर्माते आहेत. 'स्वरगंधर्व सुधीर फडके' हा चित्रपट 1 मे अर्थात महाराष्ट्र दिनाच्या मुहूर्तावर प्रदर्शित होणार आहे. आजवरचा हा सर्वात मोठा स्वरमयी बायोपिक ठरेल. तर हा चित्रपट पाहण्यासाठी सगळे आतुर आहेत.