कोरोना लसींची निर्यात पुन्हा सुरु केल्याने अनेक देशांकडून भारताचं कौतूक

नवी दिल्ली : ऑक्टोबरमध्ये कोरोना लसीची निर्यात पुन्हा सुरू केल्यानंतर, भारताने मैत्री मोहिमेअंतर्गत शेजारील देश नेपाळ, म्यानमार, इराण आणि बांगलादेशमध्ये 10 कोटी लसींची निर्यात केली आहे. भारताने लस निर्यात सुरू केल्याचे अनेक देशांनी कौतुक केले आहे. सरकारी सूत्रांनी सांगितले की, शेजारच्या देशांमध्ये मेड इन इंडिया कोरोना लसीला मोठी मागणी आहे. अनेक राजनैतिक भेटींमध्ये, बहुतेक दक्षिण आशियाई देशांनी भारताला वेळोवेळी लसींची निर्यात पुन्हा सुरू करण्याचे आवाहन केले आहे.

या वर्षी मेच्या सुरुवातीला कोरोनाच्या दुसऱ्या लाटेदरम्यान भारताला आपली लस मैत्री मोहीम थांबवावी लागली. सरकारने गेल्या महिन्यात देशातील परिस्थिती सुधारल्यावर लसीची निर्यात पुन्हा सुरू करण्याची घोषणा केली. चीनी लस सिनाफार्मची कार्यक्षमता (AFKC) नेहमीच प्रश्नाखाली राहिली आहे. शेजारील देश भारतात तयार केलेल्या लसींवर जास्त अवलंबून आहेत.

सिनाफार्मच्या किंमतीतील फरकाने बांगलादेश आणि श्रीलंकेमध्ये गोंधळ निर्माण केला. अहवालानुसार, चीनने वेगवेगळ्या प्रादेशिक भागीदारांना वेगवेगळ्या किंमतीत लस विकल्या. एका सूत्राने एएनआयला सांगितले की, दक्षिण आशियाचे बहुतेक देश लसीसाठी भारताकडे पाहत आहेत. गेल्या काही महिन्यांत, भारताने आपल्या कोविड लसीकरण मोहिमेला मोठ्या प्रमाणात वाढवून त्याचे उत्पादनही वाढवले.

आतापर्यंत भारतात 97 कोटींहून अधिक लस देण्यात आल्या आहेत. कोरोना लसीची निर्यात पुन्हा सुरू करण्याच्या भारताच्या निर्णयाचे आंतरराष्ट्रीय समुदायाने स्वागत केले आहे. क्वाड, अमेरिका आणि युरोपियन युनियन (EU) देशांनी भारताच्या या निर्णयाचे कौतुक केले आहे.