राष्ट्रपती कोविंद सैनिकांसोबत साजरा करणार दसरा, लडाख,जम्मू-काश्मीरला देणार भेट

नवी दिल्ली : वर्षानुवर्षे चालत आलेली परंपरा मोडून राष्ट्रपती रामनाथ कोविंद या वर्षी लडाखच्या द्रास भागात सैनिकांसोबत दसरा साजरा करणार आहेत. पारंपारिकपणे, राष्ट्रपती राष्ट्रीय राजधानीत दसरा सोहळ्याला उपस्थित राहायचे. परंतु यावेळी तसे होणार नाही. विशेष म्हणजे, शुक्रवारी देशात दसरा साजरा केला जाईल. राष्ट्रपती भवनने दिलेल्या माहितीनुसार, राष्ट्रपती कोविंद दोन दिवसांसाठी लडाख आणि जम्मू -काश्मीरला भेट देणार आहेत.

राष्ट्रपती कोविंद 14 आणि 15 ऑक्टोबर रोजी लडाख आणि जम्मू -काश्मीरला भेट देतील. या दरम्यान, 14 ऑक्टोबर रोजी ते लेह येथील सिंधू घाटावर सिंधू दर्शन पूजा करतील. त्याच दिवशी संध्याकाळी ते उधमपूरमध्ये सैनिकांशी संवाद साधतील. यानंतर, 15 ऑक्टोबर रोजी दसऱ्याच्या निमित्ताने ते द्रासमधील कारगिल युद्ध स्मारक येथे शहीद सैनिकांना श्रद्धांजली वाहतील. या दरम्यान ते सैनिकांशी संवाद साधणार आहेत.

राष्ट्रपती कोविंद अशा वेळी जम्मू -काश्मीरच्या दौऱ्यावर जात आहेत जेव्हा तेथे दहशतवादी कारवायांमध्ये वाढ झाली आहे. टार्गेट किलिंगच्या घटनाही घडल्या आहेत. याशिवाय पूर्व लडाखमधील प्रत्यक्ष नियंत्रण रेषेवर (एलएसी) चीनसोबत तणाव कायम आहे. अशा स्थितीत त्यांची भेट अत्यंत महत्त्वाची ठरणार आहे. यामुळे सैनिकांचे मनोबलही वाढेल.