गर्ल्स हॉस्टेलमध्ये रॅगिंग, सर्व विद्यार्थिंनींना दंड

पाटणा : बिहारमधील दरभंगा वैद्यकीय महाविद्यालयाच्या रुग्णालयातील एका विद्यार्थिंनी सोबत रॅगिगचं प्रकरण समोर आलं आहे. पीडित तरुणीने मेडिकल काऊन्सिल ऑफ इंडियाकडे तक्रार दाखल केली. महाविद्यालयीन प्रशासनाने तक्रार न करता या तरुणीने एमसीआयकडे सरळ तक्रार केली.

तक्रारीनंतर एमसीआयच्या आदेशानुसार महाविद्यालयाला वसतिगृहातील त्या सर्व विद्यार्थिंनीवर 25-25 हजारांचा दंड लावण्यात आला आहे. या दोषी मुलींना 25 नोव्हेंबरपर्यंत दंड जमा करण्याचे आदेश देण्यात आले आहेत.

कॉलेजने सुरक्षेच्या कारणास्तव त्या पीडित विद्यार्थिनीचं नाव जाहीर नाही केले. पीडित तरुणी समोर न आल्याने आरोपींची ओळख नाही पटू शकली. त्यामुळे हॉस्टेलमधील सर्वच 54 तरुणींवर 25 हजारांचा दंड लावण्यात आला. दंड न भरल्यास विद्यार्थिंनींना ६ महिने वर्गातून निलंबित करण्याचे आदेश देखील कॉलेजला देण्यात आले आहेत.