बालपणाचा शेवट! नातवाने आजीला बॅटने मारलं; `ती` फक्त रडत राहिली; व्हिडीओ व्हायरल होताच संपूर्ण कुटुंब झालं फरार

छत्तीसगडच्या रायपूर येथील एक धक्कादायक व्हिडीओ व्हायरल झाला आहे. व्हिडीओत तरुण आपल्या वयस्कर आजीला बॅटने निर्दयीपणे मारहाण करताना दिसत आहे. आजी हतबलपणे रडत असतानाही नातू मात्र तिला सतत मारहाण करतो.

सोशल मीडियावर अनेक व्हिडीओ व्हायरल होत असतात जे पाहिल्यानंतर या जगात आता माणुसकी उरली आहे की नाही असा प्रश्न पडतो. यामध्ये अनेकदा कौटुंबिक हिंसाचाराचे व्हिडीओ असतात ज्यामध्ये पती, पत्नी, लहान मूल किंवा वयस्कर आई-वडिलांवर अत्याचार होताना दिसत असतात. छत्तीसगडच्या रायपूरमधील असाच एक व्हिडीओ सध्या सोशल मीडियावर व्हायरल झाला आहे. हा व्हिडीओ पाहिल्यानंतर तुमच्याही तळपायाची आग मस्तकात जाईल. 

घरात बाळाचा जन्म झाला की आई-वडिलांपेक्षाही जास्त आनंद आजी-आजोबांना होत असतो. त्यांच्यासाठी नातू म्हणजे पुन्हा एकदा आई-वडील होण्याचा अनुभव असतो. नातवाच्या निमित्ताने त्यांना पुन्हा एकदा ते क्षण जगता येतात. पण जेव्हा तोच नातू मोठा झाल्यावर हात उगारतो तेव्हा होणाऱ्या वेदनाही कदाचित तेवढ्याच गंभीर असतात, असाच काहीसा प्रकार छत्तीसगडमध्ये झाला आहे. येथे एका तरुणाने आपल्या वयस्कर आजीला अत्यंत निर्दयीपणे मारहाण केली. तरुण आपल्या आजीला घराच्या बाहेर चपला आणि बॅटने मारहाण करताना दिसला. मारहाण केल्यानंतर तो घऱात जाताना दिसत आहे. 

नातू आजीला मारहाण करत असताना शेजारी राहणाऱ्या एका व्यक्तीने हा व्हिडीओ शूट केला. त्यानंतर हा व्हिडीओ व्हायरल झाला. व्हिडीओ व्हायरल झाल्यानंतर कुटुंबीय आणि आरोपी नातू घराला कुलूप लावून फरार झाले आहेत. अमरपुरी परिसरात ही घटना घडली आहे. 

माणुसकीला काळी फासणाऱ्या अशा अनेक घटना याआधीही समोर आल्या आहेत. एक महिन्यापूर्वी उत्तर प्रदेशच्या बांदा जिल्ह्यात एका सुनेने आपल्या सासूला मारहाण करत हत्या केली होती. सासू आणि सुनेत नेहमी वाद होत होते. कौटुंबिक वादातून अखेर सुनेने सासूची हत्या केली. 

घटनेची माहिती मिळताच पोलिसांनी मृतदेह ताब्यात घेऊन शवविच्छेदनासाठी पाठवला. तसंच सूनेला अटक केली आहे. सासू नेहमी सूनेला छोट्या गोष्टींवरुन ओरडत असे. यामुळेच संतापलेल्या सूनेने सासूची हत्या केली.