काँग्रेस - भाजप पुन्हा आमनेसामने; खासदार मनोज कोटक यांच्या कार्यालयाबाहेर राडा

मुंबई : पंतप्रधान नरेंद्र मोदी यांनी महाराष्ट्रविरोधी केलेल्या वक्तव्याविरोधात काँग्रेसने भाजप खासदार मनोज कोटक यांच्या कार्यालयाबाहेर आज आंदोलन केलं. तत्पूर्वी मनोज कोटक यांच्या कार्यालयाबाहेर भाजप कार्यकर्त्यांनी शक्तिप्रदर्शन केलं.

मुंबई प्रदेश काँग्रेसचे अध्यक्ष भाई जगताप यांच्या नेतृत्वाखाली सकाळी भाजप खासदार मनोज कोटक यांच्या मुलुंड येथील सेवालय ऑफिसबाहेर आंदोलन करण्यात येणार होतं. मात्र, काँग्रेसचं आंदोलन सुरु होण्यापूर्वीच भाजप कार्यकर्त्यांची येथे एकच गर्दी केली होती.

खासदार मनोज कोटक आणि आमदार राम कदम यांनी यावेळी महाराष्ट्र विकास आघाडी सरकारविरोधात जोरदार घोषणाबाजी केली. येथे मोठ्या प्रमाणात कार्यकर्ते जमल्यामुळे पोलिसांनी मुलूंडचा आरपी रोड बंद केला होता. एमजी रोडपासून भक्ती मार्गला जाणारा रस्ता बंद करण्यात आला होता.

दुपारी बाराच्या दरम्यान मुंबई प्रदेश काँग्रेस अध्यक्ष भाई जगताप यांच्या नेतृत्वाखाली काँग्रेस कार्यकर्ते येथे जमले. यावेळी त्यांना पोलिसांनी अडवलं. त्यामुळे होणारा संभाव्य राडा टळला.