राज ठाकरे आणि शरद पवारांनी घेतली एकमेकांची फिरकी...

पुणे :  राज ठाकरे यांनी पुण्यात शरद पवारांच्या घेतलेल्या मुलाखती एका प्रश्नाचे उत्तर देताना दोघांनी एकमेकांची फिरकी घेतली. 

राज ठाकरे  : नरेंद्र मोदींबाबत पूर्वी काय मत होतं आणि आता काय मत आहे? 

या प्रश्नाचे उत्तर देताना शरद पवार म्हणाले, मोदी हे राजकारणी म्हणून खूप मेहनती आहेत.  राज ठाकरेंना टोमणा मारताना म्हटले की ते सकाळी लवकर उठतात... 

त्यावर राज ठाकरे म्हणाले, आता मी रोज उठायला लागो आहे. 

मग आता राज ठाकरे यांची वेळ होती, त्यांनी या शरद पवार यांच्या उत्तरावर प्रतिप्रश्न केला की खरंच लवकर उठून होता येतं का पंतप्रधान...  ( म्हणजे तुम्ही लवकर उठून का नाही झालात पंतप्रधान) 

जागतिक मराठी अकादमीच्या वतीने राष्ट्रवादी काँग्रेसचे अध्यक्ष व माजी केंद्रीय कृषी मंत्री शरद पवार यांच्या प्रकट मुलाखतीचे आयोजन 'शोध मराठी मनाचा' या मालिकेअंतर्गत करण्यात आले होते. महाराष्ट्र नवनिर्माण सेनेचे संस्थापक अध्यक्ष राज ठाकरे यांनी ही मुलाखत घेतली. 

शरद पवारांनी राज ठाकरेंचे ऐकले नाही... 

राज ठाकरे यांनी मुलाखतीत शरद पवार यांना रॅपीड फायर प्रश्न विचाराला सुरूवात केली. पण रॅपीड फायरच्या पहिल्याच प्रश्नावर शरद पवार यांनी राज ठाकरेंचे ऐकले नाही. 

राज ठाकरे यांनी रॅपीड फायरमधील पहिला प्रश्न विचारला इंदिरा गांधी की यशवंतराव चव्हाण.... त्यावर शरद पवार यांनी दोघांपैकी एकाची निवड न करता सविस्तर उत्तर देत राज ठाकरेंना मध्येच थांबविले.  ते म्हणाले, याचं उत्तर एका वाक्यात देण्यासारख नाही.  त्यानंतर पवारांनी इंदिरा गांधीची महती सांगितली. 

कमळीची काळजी करू नका, बाळासाहेबांनी दिला होता शरद पवारांना भरवसा...

 बाळासाहेब ठाकरे यांच्याबद्दल बोलताना राष्ट्रवादी काँग्रेसचे अध्यक्ष आणि माजी केंद्रीय कृषी मंत्री शरद पवार यांनी कृतज्ञता व्यक्त केली. यावेळी त्यांनी ''सुप्रिया सुळे यांच्या राज्यसभेच्या निवडणुकीच्या वेळची गोष्ट सांगितली. बाळासाहेब म्हणाले होते की तुम्ही कमळीची काळजी करू नका. सुप्रिया बिनविरोध निवडून येईल. आणि खरोखरच सुप्रिया राज्यसभेवर बिनविरोध निवडून आली, असा बहारदार किस्सा शरद पवार यांनी सांगितला. 

पवार म्हणाले, सुप्रिया बाळासाहेबांच्या घरी लहान असताना खेळायला जायची. जेव्हा तिला राज्यसभेची उमेदवारी द्यायचे ठरले त्यावेळी बाळासाहेबांनी मला फोन केला. मी त्यांना त्यांची भूमिका विचारली. त्यावेळी ते म्हणाले, आमची मुलगी निवडणूक लढविणार असताना माझी वेगळी भूमिका काय असेल. ती बिनविरोध निवडून येईल. त्यावेळी मी सेनेच्या मित्रपक्षाच्या भूमिकेबाबत विचारलं. त्यावेळी बाळासाहेब म्हणाले होते की तुम्ही कमळीची काळजी करु नका. सुप्रिया बिनविरोध निवडून येईल. आणि खरोखरच सुप्रिया राज्यसभेवर बिनविरोध निवडून आली,''

''तुमच्या काकांशी माझा घरोबा होता. ते व्यासपीठावर माझ्याबाबत काय बोलायचे याबाबत बोलणे नको...मला बारामतीचा म्हमद्या...कुठलं तरी भरलेलं पोतं अशा उपमा द्यायचे. पण त्यांनी व्यक्तिगत सलोखा कधी सोडला नाही,'' असे गौरवोद्गार शरद पवार यांनी स्वर्गीय शिवसेनाप्रमुख बाळासाहेब ठाकरे यांच्याबद्दल काढले.