लता मंगेशकर यांचं ``आजोळ`` दुःखात

लता मंगेशकर आणि खानदेशचं काय खास नातं? दीदींच्या निधनानंतर गावात शोककळा

प्रशांत परदेशी, झी 24 तास, धुळे : गानसम्राज्ञी लता मंगेशकर यांचं निधन झालं आहे. शिवाजीपार्क इथे त्यांच्या पार्थिवावर अंत्यसंस्कार करण्यात आले. या अंत्यसंस्काराला राजकीय नेत्यांपासून कलाविश्वापर्यंत अनेक दिग्गज उपस्थित होते. 

गानसम्राज्ञी लता मंगेशकर यांच्या जाण्याने खानदेशातही हळहळ व्यक्त केली जात आहे. लतादीदी यांचं आजोळ हे धुळे जिल्ह्यातील थाळनेर येथील असल्याने त्यांना खानदेश कन्या देखील म्हटल जात होतं. लतादीदींच्या आई, माई मंगेशकर या थाळनेर गावातील रहिवाशी होत्या.

मंगेशकर कुटुंबाचा याठिकाणी गेल्या 25 वर्षापासून वावर नसला तरी आजही थाळनेर हे मंगेशकर कुटुंबाचं आजोळ म्हणून परिचित आहे. लता मंगेशकर यांच्या जाण्याने संपूर्ण गावावर शोककळा पसरली आहे.

थाळनेर वासियांनी मंगेशकर कुटुंबाच्या जुन्या आठवणींना देखील उजाळा दिला आहे. हृदयनाथ मंगेशकर हे येऊन गेल्याचेही गावकरी सांगतात. लता मंगेशकर यांच्या आई या थाळनेरच्या असल्याने मंगेशकर कुटुंबाला या गावाविषयी विशेष जिव्हाळा होता. 

माई मंगेशकरांच्या हाताने या गावांमध्ये दोन झाडे देखील लावण्यात आली आहेत. ती देखील आज पाहायला मिळतात. मंगेशकर कुटुंबाशी ऋणानुबंध असलेल्या थाळनेरकरवासीयांनी लता मंगेशकर यांच्या निधनाच्या वृत्तानंतर शोक व्यक्त केला आहे.

लतादीदी यांचं निधन, पाहा लता मंगेशकर यांच्याशी संबंधित बातम्या

लता मंगेशकर यांच्या निधनामुळे दुखवटा, सोमवारी राज्यात सार्वजनिक सुट्टी जाहीर