राज ठाकरे घेणार असलेली पवारांची मुलाखत अनिश्चित कालावधीसाठी पुढे

मुंबई : माजी केंद्रीय मंत्री शरद पवार यांची राज ठाकरे घेणार असलेली बहुप्रतीक्षित मुलाखत पुन्हा एकदा रद्द करण्यात आली आहे. 

‘तारीख पे तारीख’

कोरेगाव- भीमा येथील घटनेच्या पार्श्वभूमीवर राज्यात निर्माण झालेल्या अस्थिर वातावरणाच्या पार्श्वभूमीवर आयोजकांकडून हा निर्णय घेण्यात आलाय. याआधी देखील पवारांच्या कार्यव्यग्रतेमुळे ३ जानेवारी रोजी होणारी ही मुलाखत रद्द करून तिचे नियोजन ६ जानेवारी करण्यात आले होते. पण अखेरीस ती पुन्हा रद्द झाली. 

पुणेकर प्रतिक्षेत

जागतिक मराठी अकादमीचे अध्यक्ष रामदास फुटाणे यांनी ही माहिती दिली आहे. ६ जानेवारीस सायंकाळी ५ वाजता बृहन्महाराष्ट्र वाणिज्य महाविद्यालयाच्या प्रांगणात पवारांची ही मुलाखत होणार होती. राज ठाकरे ती घेणार असल्यामुळे पुणेकर रसिक मोठ्या उत्सुकतेने या मुलाखतीची वाट पाहत होते.

अनिश्चित कालावधीसाठी पुढे

मात्र, आता ती अनिश्चित कालावधीसाठी पुढे ढकलण्यात आली आहे. त्यामुळे ही मुलाखत आता कधी होणार हे माहीत नसल्याने अनेकजण हिरमुसले आहेत. या मुलाखतीतून पवारांचे अनेक नवे पैलू उलगडले जातील, अशी अपेक्षा अनेकांना होती.