`म्हणून राज्यपालांना नमस्कार केला`, संजय राऊतांचं स्पष्टीकरण

संजय राऊतांनी भगतसिंग कोश्यारींना नमस्कार केला

मुंबई : शिवसेना नेते संजय राऊत यांनी राजभवनात जाऊन राज्यपाल भगतसिंग कोश्यारी यांची भेट घेतली आहे. संजय राऊत यांनी गेल्या काही दिवसांमध्ये राज्यपालांवर बोचरी टीका केली होती. राऊत यांच्या या टीकेमुळे राज्यपाल चांगलेच नाराज झाले होते. या पार्श्वभूमीवर संजय राऊत यांनी आज राज्यपालांची भेट घेऊन या कटुतेला तिलांजली दिल्याचे सांगितले जातंय.

संजय राऊत यांनी या भेटीवेळी राज्यपाल भगतसिंग कोश्यारी यांना वाकून नमस्कार केला. हा फोटो सोशल मीडियावर काही मिनिटांमध्येच व्हायरल झाला. आता या फोटोबाबत संजय राऊत यांनी स्पष्टीकरण दिलं आहे.

भगतसिंग कोश्यारी हे माझ्यापेक्षा मोठे असल्यामुळे त्यांना नमस्कार केला. आमच्या दोघांमध्ये चांगली चर्चा झाली. उद्धव ठाकरेंच्या नेतृत्वात महाविकासआघाडी सरकार चांगलं चालतंय, त्यामुळे तुम्हाला चिंता करण्याची गरज नाही, असं राज्यपालांना सांगितल्याचं ट्विट संजय राऊत यांनी केलं आहे. 

राज्यपाल आणि मुख्यमंत्री उद्धव ठाकरे यांच्यातही कोणताही दुरावा नसल्याचे राऊत यांनी या भेटीनंतर स्पष्ट केले. राज्यपाल आणि मुख्यमंत्र्यांचेही मधूर संबंध आहेत. दोघांमध्ये पिता-पुत्राचं नातं आहे. सरकार आणि राज्यपालांमध्ये कोणतीही दरी नाही. आमच्यात दऱ्या वैगैरे वाढत नाही. ते पालक असून घटनात्मक प्रमुख आहेत. राज्यपाल हे सर्वांना प्रियच असतात. पण विरोधक जेव्हा राजकारण करतात तेव्हा आम्ही भाष्य करत असतो, असे राऊत यांनी सांगितले.