दंगलखोरांना बुद्ध समजणार नाही; सुजात आंबेडकरांची संभाजी भिडेंवर टीका

मोदी आणि संघाला विदेशात गेल्यानंतर बुद्धाची आठवण येते.

मुंबई: जगासाठी बुद्ध उपयोगाचा नाही, असे वादग्रस्त विधान करणाऱ्या संभाजी भिडे यांच्यावर वंचित बहुजन आघाडीचे नेते सुजात आंबेडकर यांनी टीका केली आहे. त्यांनी म्हटले की, संभाजी भिडे ही दंगली घडवणारी व्यक्ती आहे. त्यांना बुद्ध समजणार नाही. लोकशाही व्यवस्थेवर विश्वास नसणाऱ्यांकडून काय अपेक्षा करणार, अशी जळजळीत टीका सुजात आंबेडकर यांनी केली. 

यावेळी त्यांनी पंतप्रधान नरेंद्र मोदी आणि राष्ट्रीय स्वयंसेवक संघावरही निशाणा साधला. त्यांनी म्हटले की, पंतप्रधान मोदी आणि संघाचे नेते भारतात असताना स्वत:ला नथुराम गोडसेचे समर्थक म्हणवून घेतात. मात्र, विदेशात गेल्यानंतर त्यांना बुद्धाची आठवण येते, असे सुजात यांनी म्हटले. 

त्यामुळे आता भाजपकडून या टीकेला कशाप्रकारे प्रत्युत्तर दिले जाणार, हे पाहणे महत्त्वाचे ठरेल. 

संभाजी भिडे यांनी रविवारी सांगलीत शिवप्रतिष्ठान संघटनेकडून आयोजित करण्यात आलेल्या दुर्गामाता दौडीच्यावेळी उपस्थितांशी संवाद साधला. यावेळी त्यांनी भारताने जगाला बुद्ध दिला, या पंतप्रधान नरेंद्र मोदींच्या वक्तव्यावर आक्षेप नोंदवला. पंतप्रधान मोदी चुकीचे बोलले. ती चूक महाराष्ट्र दुरुस्त करू शकतो. ते आपलं काम आहे. भारताने जगाला बुद्ध दिला असला तरी बुद्ध काही उपयोगाचा नाही. विश्वाचा संसार सुखाने चालवण्यासाठी छत्रपती संभाजी महाराजच हवे असल्याचे यावेळी भिडे यांनी सांगितले. 

संभाजी भिडे यांच्या या वक्तव्यावर विरोधकांनी टीका केली आहे. आचारसंहिता लागू झाली असताना संभाजी भिडे अशाप्रकारची विधाने करतात. त्यामुळे निवडणूक आयोगाने त्यांच्यावर कारवाई करावी, अशी मागणी विरोधकांनी केली आहे.