शिवसेना - भाजप जागावाटपाची डेडलाईन आज संपतेय, काय होणार युतीचे?

मुंबई : महापालिका निवडणुकीच्या जागावाटपाबाबतची शिवसेना-भाजप या दोन्ही पक्षांनी एकत्र ठरवलेली डेडलाईन आज संपत आहे. आज काय होणार, याकडे सगळ्यांचं लक्ष लागले आहे. 

गेल्या आठवड्यात भाजप सेनेच्या पहिल्या बैठकीच्या वेळी दोन्ही पक्षांनी चर्चा जास्त ताणली जाऊ नये, शेवटच्या दिवसापर्यंत वेळकाढू पणा होऊ नये यासाठी 21 जानेवारी ही डेडलाईन ठरवली होती.

विधानसभा निवडणुकीच्या वेळी चर्चा ताणली जाऊन उमेदवारी अर्ज भरतांना उमेदवारांची जास्त धांदल उडाली होतीच, पण त्याहीपेक्षा दोन्ही पक्षांमध्ये कटुता चांगलीच टोकाला गेली होती. 

उमेदवारी अर्ज भरायला आता जेमतेम आठवडा उरलाय. 27 जानेवारी ते 3 फेब्रुवारी हे उमेदवारी अर्ज भरण्याचा कालावधी आहे. मात्र आज भाजप सेनेची डेडलाईन संपत असतांना साधी यादी एकमेकांना देण्याची प्रक्रिया सुद्धा झालेली नाही. त्यामुळे आज काय होणार, याकडे सगळ्यांचं लक्ष लागले आहे.