Freedom 125: जगातील पहिली CNG बाईक अखेर लॉंच; एकदा टॅंक फूल केला की विषय संपला!
Bajaj Freedom: ज्या बाईकची भारतीय मोठ्या आतुरतेने वाट पाहत होते ती बाईक देशात लॉंच झाली. देशातील आघाडीची वाहन उत्पादक कंपनी बजाज ऑटोने जगातील आणि देशातील पहिली CNG बाईक आणली आहे.
कंपनीने ही बाईक तीन व्हेरियंटमध्ये लॉन्च केली असून ही बाईक 7 ड्युअल टोन रंगांमध्ये उपलब्ध आहे. केंद्रीय रस्ते वाहतूक मंत्री नितीन गडकरींच्या उपस्थितीत ही बाईक लॉंच करण्यात आली.
यात विशेष म्हणजे बाईकमध्ये CNG आणि पेट्रोलसाठी एकच स्विच आहे. म्हणजे पेट्रोलवरून सीएनजीवर किंवा सीएनजीवरून पेट्रोलवर जाताना बाइक थांबवावी लागणार नाही. याशिवाय बाइकमध्ये अनेक दमदार फीचर्स देण्यात आले आहेत.
बाईकमध्ये मोठे साइड बॉडी पॅनल आहेत जे बाईकचे सौंदर्य तर वाढवतातच पण सुरक्षितता देखील देतात. स्प्लिट 5-स्पोक डिझाइन अलॉय व्हील्स डिझाइनमुळे बाइकचा प्रिमियम लूक दिसतो. तसेच टिकाऊपणा देखील वाढवतो.
स्टायलिश बेली पॅनमुळे बाइकला आधुनिक आणि स्पोर्टी लुक आलाय.फंक्शनल रिब्ड सीट आणि ग्रॅब रेलमुळे चालकाला आरामदायी आणि सुरक्षित प्रवासाचा अनुभव मिळतो.
जगातील पहिली CNG बाइक असलेल्या बजाज फ्रीडममध्ये कंपनीने 125 सीसी क्षमतेचे पेट्रोल इंजिन दिले आहे. हे इंजिन 9.5PS पॉवर आणि 9.7Nm टॉर्क जनरेट करते.
यामध्ये कंपनीने 2 लीटर पेट्रोल फ्युएल टँक आणि 2 किलो क्षमतेची सीएनजी टँक दिली आहे. बाईक पूर्ण टाकीमध्ये (पेट्रोल + CNG) 300 किमी पर्यंत ड्रायव्हिंग रेंज देते.
सीएनजी तंत्रज्ञानामुळे ही बाईक उत्तम मायलेज देईल आणि प्रवाशांना कमी खर्चात प्रवास करण्याची संधी देईल. यासोबतच सीएनजी वाहनांचा वापर पर्यावरणासाठीही अधिक फायदेशीर आहे, ज्यामुळे प्रदूषण कमी होण्यास मदत होते.
बजाज फ्रीडम 125 च्या आकर्षक लूकमुळे ती कमी वेळेत लोकांमध्ये लोकप्रिय झाली आहे. या बाईकचा पहिला फोटो सोशल मीडियावर मोठ्या प्रमाणात व्हायरल होतोय.
बजाजची ही नवीन बाईक पर्यावरण रक्षणाच्या दिशेने टाकलेले महत्त्वाचे पाऊल आहे. या सीएनजी बाईकच्या माध्यमातून प्रदूषण कमी करण्याचा आणि हरित ऊर्जेला प्रोत्साहन देण्याचा प्रयत्न केल्याचे कंपनीचे म्हणणे आहे. आगामी काळात इतर ऑटोमोबाईल कंपन्यांसाठीही हे प्रेरणादायी पाऊल ठरू शकते.
या बाईकची रनिंग कॉस्ट कोणत्याही पेट्रोल मॉडेलपेक्षा खूपच कमी असल्याचा दावा बजाज ऑटोने केला आहे. इतर बाईकच्या तुलनेत तुमचा 50 टक्के खर्च वाचू शकतो. म्हणजेच बाईकच्या मालकाचे 5 वर्षात अंदाजे 75 हजार रुपये वाचू शकतात.