धावण्याच्या टेस्टमध्ये नापास खेळाडूंना आणखी एक संधी अन्यथा संघात स्थान मिळणं कठीण

मुंबई : भारतीय क्रिकेट नियामक मंडळाने (बीसीसीआय) टीम इंडियाच्या खेळाडूंचा फिटनेस आणखी वाढवण्यासाठी यो-यो चाचणीबरोबरच दोन किमी धावण्याच्या फिटनेस टेस्टचा नवा नियम तयार केला होता. इंग्लंडविरुद्धच्या कसोटी मालिकेच्या अनुषंगाने ज्येष्ठ खेळाडूंना या कसोटीतून सूट देण्यात आली असली तरी आता प्रथमच कनिष्ठ-स्तरीय खेळाडूंसाठी मंडळाने ही चाचणी घेतली. संजू सॅमसन, राहुल तेवतिया, नितीश राणा, सिद्धार्थ कौल, ईशान किशन यासारखे खेळाडू या चाचणीत सहभागी झाले होते. आता बातमी येत आहे की या कसोटीत संजू सॅमसनसह सहा खेळाडू अपयशी ठरले.

हे खेळाडू अपयशी ठरल्यानंतर बीसीसीआयने त्यांची पहिली संधी असल्याने आणखी एक संधी देण्याचे म्हटले आहे. आता हे खेळाडू दुसऱ्या वेळी कसोटीत अपयशी ठरले तर संघात त्यांची निवड धोक्यात येऊ शकते. बीसीसीआयच्या एका सूत्राने टाईम्स ऑफ इंडियाला सांगितले की, ही एक नवीन प्रकारची फिटनेस टेस्ट असल्याने त्यांना दुसरी संधी दिली जाईल आणि काही दिवसात त्यासाठी नवीन तारीख निश्चित केली जाईल. जर खेळाडू दुसऱ्यांदा अपयशी ठरला तर इंग्लंडविरुद्ध पाच टी-20 आणि तीन एकदिवसीय सामन्यांसाठी निवडल्या जाणाऱ्या संघात त्यांना घेतलं जाणार नाही.

जेव्हा यो-यो चाचणीचा नियम प्रथमच आला, तेव्हा मो. शमी आणि अंबाती रायुडूसारखे खेळाडू त्यात पास होऊ शकले नव्हते. त्यांनी आपल्या तंदुरुस्तीवर काम केले आणि ते उत्तीर्ण झाल्यावरच भारतीय संघात परतू शकले. 2 किमी कसोटीत नापास झालेल्या खेळाडूंमध्ये संजू सॅमसन हे मोठे नाव आहे कारण तो इंग्लंडविरुद्धच्या टी -20 मालिकेसाठी टीम इंडियाचा भाग आहे.

बीसीसीआयच्या सूत्रांनी सांगितले की, इंग्लंडविरुद्धच्या मर्यादित स्वरूपाच्या मालिकेसाठी ज्यांना संघात यायचं आहे. त्यांची ही टेस्ट घेण्यात आली होती आणि ते भविष्यातील खेळाडू देखील आहेत. प्रथम यो-यो टेस्ट आली आणि आता दोन किलोमीटर धावण्याची फिटनेस टेस्ट. या कसोटीत फलंदाज, यष्टीरक्षक आणि फिरकी गोलंदाजांना दोन किमी अंतर 8 मिनिटं 30 सेकंदात पूर्ण करावे लागेल, तर वेगवान गोलंदाजांना 8 मिनिट 15 सेकंदाचा वेळ ठेवण्यात आला आहे. संघाचा कर्णधार विराट कोहली आणि प्रशिक्षक रवी शास्त्री यांना देखील यो-यो टेस्ट प्रमाणे प्रत्येकजणांसाठी ही चाचणी अनिवार्य करायची आहे.