ന്യൂഡല്‍ഹി: സിബിഎസ്ഇ പന്ത്രണ്ടാം ക്ലാസ് പരീക്ഷാഫലം നാളെ പ്രസിദ്ധീകരിക്കും. കഴിഞ്ഞ വർഷം സിബിഎസ്ഇ പന്ത്രണ്ടാം ക്ലാസ് പരീക്ഷാ ഫലം മേയ് 28നും പത്താം ക്ലാസിലെ ഫലം ജൂണ്‍ മൂന്നിനുമാണ് പ്രസിദ്ധീകരിച്ചത്. ഇത്തവണയും സിബിഎസ്ഇയുടെ വെബ്സൈറ്റ് ആയ cbse.nic.in ല്‍ എല്ലാ പരീക്ഷാർഥികൾക്കും ഫലം അറിയാനാകും.
സിബിഎസ്ഇ 10,12 ക്ലാസുകളിലെ കണക്ക്, സാമ്പത്തിക ശാസ്ത്രം പരീക്ഷകളുടെ ചോദ്യപേപ്പർ ചോർന്നത് രാജ്യത്താകെ വലിയ പ്രതിഷേധത്തിന് ഇടയാക്കിയിരുന്നു. ഇതിനെ തുടർന്ന് മാനവശേഷി മന്ത്രാലയം മുൻ സെക്രട്ടറി വിനയ് ഷീൽ ഒബറോയിയുടെ നേതൃത്വത്തിൽ ഏഴംഗ സമിതിയെ കേന്ദ്രം നിയോഗിച്ചിരുന്നു.
സിബിഎസ്ഇ പന്ത്രണ്ടാം ക്ലാസ് ഇക്കണോമിക്സ് പരീക്ഷയുടെ ചോദ്യപേപ്പർ പരീക്ഷയ്ക്ക് മുന്നു ദിവസം മുന്‍പേ മാർച്ച് 23ന് ചോർന്നുവെന്നാണ് പോലീസ് കണ്ടെത്തിയത്. ഈ കേസിൽ ഹിമാചൽപ്രദേശ്, ജാർഖണ്ഡ്, ബിഹാർ എന്നിവിടങ്ങളിൽ നിന്ന് അധ്യാപകൻ അടക്കം ചില പ്രതികളെ അറസ്റ്റു ചെയ്തിരുന്നു.
പത്താം ക്ലാസിലെ കണക്ക് പരീക്ഷയുടെ ചോദ്യം ചോർന്നതായി സിബിഎസ്ഇയും സർക്കാരും സമ്മതിച്ചെങ്കിലും ചോർച്ച വ്യാപകമല്ലെന്ന പറഞ്ഞ് വീണ്ടും പരീക്ഷ നടത്തേണ്ടതില്ലെന്ന് തീരുമാനിക്കുകയായിരുന്നു.
