Higher PF Pension: പെൻഷൻ ഫണ്ടിലേക്ക് 28.29 ലക്ഷം രൂപ അധികമടച്ചാൽ ലഭിക്കും 35,594 രൂപ പെൻഷൻ

Higher PF Pension Update: ഇപിഎഫ്ഒയുടെ വിശദീകരണം രേഖപ്പെടുത്തിയ ജസ്റ്റിസ് ദേവൻ രാമചന്ദ്രൻ, അറിയിച്ചതിനെക്കാൾ കൂടുതൽ തുക നൽകേണ്ടതുണ്ടെന്ന് കോടതി കണ്ടെത്തിയാൽ അത് നൽകണമെന്നും നിർദ്ദേശിച്ചിട്ടുണ്ട്

കൊച്ചി: ഉയർന്ന പിഎഫ് പെൻഷനുവേണ്ടി 28.29 ലക്ഷം രൂപ പെൻഷൻ ഫണ്ടിലേക്ക് അധികമായി അടച്ചാൽ മാസം 35,594 രൂപ പെൻഷനായി ലഭിക്കുമെന്ന് ഇപിഎഫ്ഒ.  ഇക്കാര്യം ഇപിഎഫ്ഒ ഹൈക്കോടതിയിലാണ് അറിയിച്ചത്.  

ശമ്പളത്തിന് ആനുപാതികമായ ഉയർന്ന പിഎഫ് പെൻഷൻ ഓപ്ഷൻ നൽകി പെൻഷൻ ഫണ്ടിലേക്കു കൂടുതൽ തുക അടച്ചവരുടെയും പെൻഷൻ പ്രൊ റേറ്റ (Pro Rata) പ്രകാരം കണക്കാക്കാനുള്ള പ്രോവിഡന്റ് ഫണ്ട് അതോറിറ്റിയുടെ സർക്കുലർ ചോദ്യം ചെയ്തു കേരള ഇൻഡസ്ട്രിയൽ ഇൻഫ്രാസ്ട്രക്ചർ ഡെവലപ്‌മെൻ്റ് കോർപ്പറേഷനിൽ നിന്നും വിരമിച്ച  തിരുവനന്തപുരം സ്വദേശി വിആർ ബാലു നൽകിയ ഹർജിയിലാണ് ഇപിഎഫ്ഒ ഇക്കാര്യം കോടതിയിലറിയിച്ചത്.   

ഇപിഎഫ്ഒയുടെ വിശദീകരണം രേഖപ്പെടുത്തിയ ജസ്റ്റിസ് ദേവൻ രാമചന്ദ്രൻ, അറിയിച്ചതിനെക്കാൾ കൂടുതൽ തുക നൽകേണ്ടതുണ്ടെന്ന് കോടതി കണ്ടെത്തിയാൽ അത് നൽകണമെന്നും നിർദ്ദേശിച്ചിട്ടുണ്ട്. ഹർജി വീണ്ടും ഏപ്രിൽ രണ്ടിന് പരിഗണിക്കും. 2022 ൽ സർവീസിൽ നിന്നു വിരമിച്ച ഹർജിക്കാരനോട് ഉയർന്ന പെൻഷൻ ലഭിക്കുന്നതിനു പെൻഷൻ ഫണ്ടിലേക്ക് ഏപ്രിൽ 30 നകം 2829782 രൂപ അടയ്ക്കണമെന്ന് കാണിച്ച് ഇപിഎഫ്ഒ നോട്ടീസ് നൽകിയിരുന്നു.  

എന്നാൽ ഈ തുക അടച്ചാൽ മാസം 52,361 രൂപ തനിക്കു പെൻഷൻ ലഭിക്കേണ്ടതാണെന്നും എന്നാൽ പ്രോറേറ്റ സ്കീം പ്രകാരമാണ് ഒഎൻഷൻ നിശ്ചയിക്കുന്നതെങ്കിൽ 31,161 രൂപയെ ലഭിക്കുകയുള്ളുവെന്നും ഹർജിയിൽ ചൂണ്ടിക്കാട്ടിയിരുന്നു.  ശമ്പളത്തിന് ആനുപാതികമായി പെൻഷൻ വിഹിതം അടയ്ക്കുന്നവർക്കു പ്രോ റേറ്റ ബാധകമാക്കുന്നതു സുപ്രീം കോടതിയുടെ ഉത്തരവിന് വിരുദ്ധമായ നടപടിയാണെന്നും ഹർജിയിൽ വ്യക്തമാക്കിയിട്ടുണ്ട്.