જે ફિલ્મ કાજોલે ઠુકરાવી, તે જ ફિલ્મે આ `ગુજ્જુ ગર્લ`ને રાતોરાત લોકપ્રિયતાના શિખરે બેસાડી દીધી

બોલીવુડમાં એક સમયે ડંકો વગાડનારી આ ગુજ્જુ ગર્લે પોતાની કરિયરના 23 વર્ષમાં 44થી વધુ ફિલ્મો અને વીડિયોઝમાં કામ કર્યું છે. વર્ષ 2000માં તેણે એક સુપરહિટ ફિલ્મથી બોલીવુડમાં પર્દાપણ કર્યું અને પછી તો છવાઈ ગઈ. આ ફિલ્મ બોક્સ ઓફિસ પર સુપરહિટ રહી. પહેલી જ ફિલ્મથી તે સ્ટાર બની ગઈ. ત્યારબાદ સની દેઓલ સાથે આવેલી  ફિલ્મે તો જબરદસ્ત ધમાલ મચાવી દીધી. આ ફિલ્મ વાસ્તવમાં પહેલા કાજોલને ઓફર કરાઈ હતી પરંતુ કાજોલે આ ફિલ્મ કરવાની ના પાડી દીધી અને ફિલ્મમાં આ ગુજ્જુ ગર્લ લેવાઈ ગઈ. આમ આ ફિલ્મ બાદ તો તેનું ભાગ્ય ચમકી ગયું. 

અમે જે ગુજ્જુ ગર્લની વાત કરી રહ્યા છે તે અમિષા પટેલ છે. ગુજરાત પરિવારમાં અમિત પટેલ અને આશા પટેલનું સંતાન એટલે અમિષા પટેલ. અમિષાનો જન્મ 9 જૂન 1975ના રોજ થયો હતો. તેનો ભાઈ અશ્મિત પટેલ પણ અભિનય કરી ચૂક્યો છે. દાદા રજની પટેલ એ જાણીતા વકીલ હતા અને મુંબઈ ક્રોંગ્રેસ પ્રદેશ સમિતિના અધ્યક્ષ પણ હતા. અમિષાનો ઉછેર મુંબઈમાં થયો છે.