`પ્રતિજ્ઞા` ફેમ Anupam Shyam Ojha નું નિધન, 63 વર્ષની ઉંમરે લીધા છેલ્લા શ્વાસ

મુંબઈ: દિગ્ગજ કલાકાર અને પોપ્યુલર શો મન કી આવાઝ પ્રતિજ્ઞામાં ઠાકુર સજ્જન સિંહની  ભૂમિકા ભજવતા કલાકાર અનુપમ શ્યામ ઓઝાનું નિધન થયું છે. તેઓ છેલ્લા કેટલાક સમયથી બીમાર હતા. રવિવારે રાતે લાઈફ લાઈન હોસ્પિટલમાં તેમણે છેલ્લા શ્વાસ લીધા. મલ્ટિપલ ઓર્ગન ફેલિયરના કારણે તેમનું નિધન થયું. 

થોડા સમય પહેલા પણ અનુપમ શ્યામ ઓઝા પોતાની બગડતી હાલતના કારણે ચર્ચામાં હતા. અભિનેતાને કિડનીમાં સમસ્યાના કારણે હોસ્પિટલમાં દાખલ થવું પડ્યું. તે સમયે તેમના ભાઈએ હોસ્પિટલમાં બિલ ભરવા માટે લોકો પાસે મદદ માંગી હતી. ત્યારબાદ બોલીવુડ અને મનોરંજન જગત સાથે જોડાયેલા અનેક લોકોએ તેમની મદદ કરી હતી. પરંતુ સ્વાસ્થ્ય સારું થઈ શક્યું નહીં. હોસ્પિટલમાંથી રજા મળ્યા બાદ પણ તેમણે ડાયાલિસિસ માટે જવું પડતું હતું. પરંતુ આ વખતે અભિનેતા જિંદગીનો જંગ હારી ગયા.