વડોદરા: સાવલીની મહિલા કોન્સ્ટેબલે આત્મહત્યા કરતા ચકચાર, કારણ અકબંધ

વડોદરા : સાવલી પોલીસ સ્ટેશનમાં ફરજ બજાવતી 22 વર્ષીય મહિલા કોન્સ્ટેબલે ગળેફાંસો ખાઇને આત્મહત્યા કરી લેતા ચકચાર મચી જવા પામી છે. સાવલી પોલીસ દ્વારા ઘટના સ્થળે પહોંચીને મૃતદેહને ઉતારીને પોસ્ટમોર્ટમ અર્થે મોકલી આપવામાં આવ્યો છે. ઉપરાંત તેના પરિવારનાં લોકોને પણ જાણ કરવમાં આવી છે.

વડોદરા જિલ્લાના સાવલી પોલીસ સ્ટેશનમાં ફરજ બજાવતા 22 વર્ષીય મહિલા પોલીસ કોન્સ્ટેબલ શિલ્પા વિનોદસિંહ દરબાર વડોદરા ખાતે ગોકુલવાટિકા સોસાયટીમાં ભાડેથી રહેતા હતા. શિલ્પાએ ગત રાત્રીએ પોતાનાં ઘરે જ અગમ્ય કારણોથી ગળેફાંસો ખાઇને આત્મહત્યા કરી લીધી હતી. જો કે ઘરમાં કોઇ જ નહી હોવાના કારણે વહેલી સવારે ઘટના અંગે જાણ થઇ હતી. ઘટના અંગે જાણ થતા સાવલી પોલીસ ઘટના સ્થળે પહોંચી હતી.

જો કે હાલ તો સાવલી પોલીસ દ્વારા આત્મહત્યાનો ગુનો દાખલ કરીને આગળની તપાસ હાથ ધરી છે. પોલીસ દ્વારા સાથી કર્મચારીઓની પુછપરછ કરવામાં આવી રહી છે. પારિવારિક કલહના એંગલથી પણ તપાસ ચાલી રહી છે. તેના વ્હોટ્સએપ અને કોલ ડિટેઇલ માટે પણ મોબાઇલ મોકલી અપાયો છે. આ ઉપરાંત પરિવાર અને પાડોશીઓની પણ પુછપરછ ચાલી રહી છે.