હિતેશ બારોટની EXIT અને દેવાંગ દાણીની ENTRY! AMCમાં અમિત શાહ જૂથનો રહ્યો દબદબો, ડેપ્યુટી મેયર પદ પર પણ કબજો

Ahmedabad News સપના શર્મા/અમદાવાદ : અમદાવાદ મનપા  રાજ્યની સૌથી વધુ બજેટ ધરાવતી મહાનગરપાલિકા છે. 2.5 વર્ષની ટર્મ પુરી થયા બાદ નવા હોદ્દેદારોના નમોની જાહેરાત આજે થઇ ગઈ. જો કે જે નામોની જાહેરાત થઇ છે તેમાં કેન્દ્રીય ગૃહ અને સહકારીતા મંત્રી અમિત શાહનો દબદબો રહ્યો છે. મનપામાં સ્ટેન્ડિંગ કમિટી ચેરમેન સૌથી મહત્વનો વિભાગ છે. અને નવા હોદ્દેદારોની પસંદગીમાં સ્ટેન્ડિંગ કમિટી ચેરમેન તરીકે દેવાંગ દાણીના નામની પસંદગી થઇ છે. જેઓ અમિત શાહના ગ્રુપના માનવામાં આવે છે. આ પહેલા સ્ટેન્ડિંગ કમિટી ચેરમેન તરીકે રહી ચૂકેલા હિતેશ બારોટ પણ અમિત શાહના વિશ્વાસુ માનવામાં આવે છે. વધુમાં દેવાંગ દાણી બોડકદેવના કાઉન્સિલર છે. જે ગાંધીનગર લોકસભામાં આવે છે. દેવાંગ દાણી વૈષ્ણવ સંપ્રદાયમાંથી આવે છે. અને સ્ટેન્ડિંગ કમિટી ચેરમેન બનતા પહેલા તેમને હોસ્પિટલ અને ટાઉનપ્લાનિંગ કમિટી ચેરમેનની પણ જવાબદારીનો પણ અનુભવ છે.

બીજી તરફ ડેપ્યુટી મેયર તરીકે જતીન પટેલની પસંદગી કરવામાં આવી છે. જેઓ પણ ખુબ અનુભવી છે. અગાઉ પણ સ્ટેન્ડિંગ કમિટી ચેરમેન તરીકે તેમના નામની ચર્ચા હતી. તેમનો વોર્ડ પણ અમિતશાહની લોકસભામાં આવે છે. સુત્રો પાસેથી મળતી માહિતી મુજબ તેઓ અમિત શાહ અને આનંદી પટેલના બંને ગ્રુપમાં સારી છવી ધરાવે છે.

સ્ટેન્ડિંગ કમિટી ચેરમેન તરીકે દેવાંગ દાણીનું નામ જાહેર
દેવાંગ દાણી ભાજપના જુના, વિશ્વાસુ અને અનુભવી કાર્યકર્તા છે. તેમની પાસે અગાઉ ઘણા મહત્વના ખાતાઓની જવાબદારી રહી ચુકી છે. તેઓ બોડકદેવના કાઉન્સિલર છે. અને અગાઉ તેમને હોસ્પિટલ અને ટાઉન પ્લાનિંગ કમિટી ચેરમેન તરીકેની પણ જવાબદારી મળી ચુકી છે.