ભાવનગરમાં એરપોર્ટ રોડ ફિલ્મી સ્ટાઇલે જાહેરમાં છરાના ઘા ઝીંકી યુવાનની હત્યાથી ચકચાર

ભાવનગર : શહેરના સુભાષનગર એરપોર્ટ રોડ પર બાલા હનુમાન મંદિર નજીક આજે બપોરના સુમારે બાઇક લઇને જઇ રહેલા રૂવા ગામના યુવાન પર બે અજાણ્યા વ્યક્તિઓ દ્વારા હુમલો કર્યો હતો. યુવાનને છરીના ઘા ઝીંકાતા ઘટના સ્થળે જ તેનું મોત નિપજ્યું હતું. બનાવને પગલે સમગ્ર વિસ્તારમાં સનસનાટી મચી જવા પામી હતી. પોલીસે હત્યાનો ગુનો નોંધીને હત્યારાઓને શોધવા માટેની કામગીરી હાથ ધરી હતી. 

શહેરના એરપોર્ટ રોડ પર રૂવા ગામે રહેતા અને કડીયાકામની છુટક મજુરી કરતા જીતેશભાઇ બીજલભાઇ ડાભી નામનો યુવાન આજે સવારે અગિયાર વાગ્યાની આસપાસ પોતાના સ્પલેન્ડર બાઇક GJ 04 BG 1591 લઇને બાલા હનુમાન મંદિર રોડ પરતી પસાર થઇ રહ્યો હતો. ત્યારે અચાનક ધસી આવેલા બે અજાણ્યા બાઇક ચાલકોએ તેના ગળા પર છરીના ઘા ઝીંકીને નાસી છુટ્યા હતા. છરીના ઘા વાગતા જીજ્ઞેશભાઇ બાઇક પરથી રોડ પર પટકાયો હતો. બનાવ બનતા સ્થાનિક લોકોમાં સનસનાટી મચી જવા પામી હતી. 

લોકોએ તત્કાલ 108ને ફોન કરીને ઇજાગ્રસ્ત જિજ્ઞેશને સારવાર માટે સર.ટી હોસ્પિટલ ખાતે ખસેડ્યો હતો. જો કે ફરજ પરનાં તબીબ દ્વારા તેને મૃત જાહેર કરવામાં આવ્યો હતો. ઘટના અંગે જાણ થતા પોલીસનો કાફલો ઘટના સ્થળે દોડી આવ્યો હતો. લોકોની પુછપરછ સાથે હત્યારાને ઝડપી લેવા માટે તજવીજ હાથ ધરી હતી. પોલીસ દ્વારા અજાણ્યા લોકો સામે હત્યાનો ગુનો નોંધીને તપાસ હાથ ધરવામાં આવી હતી.