JNUની હિંસાના પડઘા અમદાવાદમાં : ભાજપ અને કોંગ્રેસની વિદ્યાર્થીપાંખો વચ્ચે જાહેરમાં પથ્થરમારો

અમદાવાદ : દિલ્હીમાં જવાહરલાલ નહેરુ યુનિવર્સિટી (JNU)ની હિંસાના પડઘા અમદાવાદમાં પડ્યા છે. અહીં પાલડી ખાતે ABVP અને NSUI વચ્ચે ઘર્ષણ થયું હોવાની ઘટના બની છે. ભાજપની વિદ્યાર્થીપાંખ ABVP અને કોંગ્રેસની વિદ્યાર્થીપાંખ NSUIના સભ્યો વચ્ચે સામસામે પથ્થરમારો થયો છે અને લાકડીઓ સાથે પ્રદર્શનકારીઓ રસ્તા પર ઉતરી આવ્યા છે. આ મામલામાં હાલમાં ABVP કાર્યાલય ખાતે પોલીસનો ચુસ્ત બંદોબસ્ત ગોઠવવામાં આવ્યો છે.

આ ઘટનાની વિગતો જોઈએ તો ABVPનાં કાર્યકર્તાઓ CAAના સમર્થન માટે અને NSUIનાં કાર્યકર્તાઓ વિરુદ્ધમાં પ્રદર્શન કરવા માટે અમદાવાદના પાલડી વિસ્તારમાં આવેલા ABVP કાર્યાલય ખાતે પહોંચ્યાં હતાં. અહીં બંન્ને વિદ્યાર્થી જૂથ વચ્ચે ઘર્ષણ અને મારામારી થઇ હતી અને હળવો પથ્થરમારો પણ થયો હતો. ABVPનાં કાર્યકર્તાઓનો આક્ષેપ છે કે એનએસયુઆઈનાં કાર્યકર્તાઓ લાકડી, ચપ્પા અને અન્ય હથિયારો લઇને પ્રદર્શનમાં આવ્યાં હતાં અને પછી હુમલો કર્યો હતો. આ ઘર્ષણ દરમિયાન NSUIના રાષ્ટ્રીય મહામંત્રી નિખિલ સવાણીને પાઈપ અને ધોકા વડે મારી લોહીલુહાણ કરવામાં આવ્યો છે. જેને પગલે નિખિલ સવાણી આક્ષેપ કરતા કહ્યું કે, ABVPના કાર્યકરોએ દાદાગીરી કરી છે.

આ મામલા વિશે NSUIનાં કાર્યકર્તા ભાવિક સોનીએ નિવેદન આપ્યું છે કે અમે શાંતિપૂર્વક દેખાવ કરતા હતા ત્યારે ABVPનાં કાર્યકર્તાઓએ અમારી પર હુમલો કર્યો હતો. અમે પોલીસને આ અંગેની જાણ પોલીસને કરી હતી. કોંગ્રેસ નેતા મનીષ દોશીએ સ્પષ્ટતા કરી છે કે JNUમાં ABVPની ગુંડાગીરી પછી આ વલણ સામે અમદાવાદમાં દેખાવ કરવામાં આવ્યો હતો પણ એમાં ભાજપના વિદ્યાર્થી સંગઠને નકારાત્મક રીતે હિંસક હુમલો કર્યો છે જેમાં અમારા નેતાઓ ઘવાયા છે અને તેમને વી.એસ. હોસ્પિટલમાં દાખલ કરવામાં આવ્યા છે.